ບັນດາໜ່ວຍພັກນັກສຶກສາໄດ້ສຳເລັດການ ຮັບຮອງແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ

ເພື່ອປະຕິບັດຕາມຄຳສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 3 ມັງກອນ 2018 ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນຕອນບ່າຍວັນທີ 29-31 ຕຸລາ 2018 ທີ່ຫ້ອງປະຊຸມໃຫຍ່ຊັ້ນ 3 ບັນດາໜ່ວຍພັກເຊິ່ງປະກອບມີ ໜ່ວຍພັກນັກສຶກສາປະລິນຍາໂທ 13, ໜ່ວຍພັກນັກສຶກສາປະລິນຍາຕີ ຮຸ່ນທີ 22 ຫ້ອງ ກ ແລະໜ່ວຍພັກນັກສຶກສາປະລິນຍາຕີ ຮຸ່ນທີ 22 ຫ້ອງ ຂ  ໄດ້ຈັດກອງປະຊຸມຮັບຮອງແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຂຶ້ນ; ໂດຍການເປັນປະທານຂອງສະຫາຍ ຮສ ພູວົງອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ, ມີສະຫາຍ  ປທ ນ. ບຸນມີ ຈຸນລະຈັກ ປະທານກວດກາພັກ-ລັດ ສມປຊ, ຫົວໜ້າສູນຂໍ້ມູນຂ່າວສານ ສມປຊ, ຄະນະກຳມະການກວດກາຊຸກຍູ້ການປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະບັນດາສະມາຊິກພັກນັກສຶກສາທັງໝົດເຂົ້າຮ່ວມຢ່າງພ້ອມພຽງລາຍລະອຽດຂອງ ແຕ່ລະໜ່ວຍພັກມີດັ່ງນີ້.

 

ໃນຕອນບ່າຍຂອງວັນທີ 29, ສະຫາຍ ນ. ແຍງເພັດ ບຸນມີໄຊ ເລຂາຄະນະພັກຮາກຖານນັກສຶກສາປະລິນຍາໂທຮຸ່ນທີ 13 ໄດ້ຂຶ້ນຜ່ານບົດສະຫຼຸບການຊີ້ນໍາ-ນຳພາສະມາຊິກຄົ້ນຄວ້າຮ່ຳຮຽນ ປະຈຳສົກປີ 2017-2018 ໂດຍສະຫາຍໄດ້ລາຍງານໃຫ້ເຫັນເຖິງ ການເອົາໃຈໃສ່ຈັດຕັ້ງເຊື່ອມຊຶມແນວ ທາງນະໂຍບາຍຂອງພັກ, ກົດໝາຍຂອງລັດ ກໍຄືມະຕິ, ຄຳສັ່ງຕ່າງໆ ຂອງສມປຊ ໃຫ້ແກ່ຖັນແຖວສະມາຊິກພັກ ຢ່າງເປັນປົກກະຕິ ແລະຕໍ່ເນື່ອງ; ເຮັດໃຫ້ໜ່ວຍພັກມີຄວາມເປັນເອກະພາບ, ເຊື່ອໝັ້ນ ແລະປະຕິບັດຕາມແນວທາງປ່ຽນແປງໃໝ່ຂອງພັກ, ຢຶດໝັ້ນອຸດົມການສັງຄົມນິຍົມ, ມີຄວາມອົດທົນແຂງແກ່ນບໍ່ຫວັ່ນໄຫວຄອນແຄນຕໍ່ສະພາບການທີ່ຜັນແປຕ່າງໆ, ເອົາໃຈໃສ່ສຶກສາຄົ້ນຄວ້າທັງພາຍໃນຫ້ອງ ແລະຫ້ອງສະໝຸດຢ່າງຕັ້ງໜ້າ ເຊິ່ງສະແດງອອກມີ​ຄະ​ແນນ​ອອກ​ແລ້ວ 11 ວິ​ຊາ ​ສາ​ມາດ​ຍາດ​ໄດ້​ຄະ​ແນນ​ຕາມ​ຄາດ​ໝາຍຄື: ມີຄະແນນເກດ A ກວມ 60,78%; ຄະແນນ ເກດ B+ ກວມ 35,13% ແລະຄະແນນ​ເກດ B ກວມ 4,08% ແລະນັກສຶກສາຮຽນເກັ່ງ​-ມີວິໄນດີປະຈຳສົກປີ 2017-2018 ເຊິ່ງມີນັກຮຽນດີເດັ່ນປະເພດ ຕ່າງໆ ຈຳນວນ 46 ສະຫາຍ, ຍິງ 9 ສະຫາຍ ສະເລ່ຍ 79,31% ຂອງຈຳນວນນັກສຶກສາພາຍໃນຫ້ອງ ແລະນອກຈາກນີ້, ຍັງໄດ້ເປັນເຈົ້າການເຂົ້າຮ່ວມຂະບວນການອອກແຮງງານ, ກີລາ-ສິລະປະວັນນະຄະດີທີ່ສະມາ ຊິກທຸກຄົນໄດ້ເອົາໃຈໃສ່ຫ້າວຫັນເຂົ້າຮ່ວມຢ່າງພ້ອມພຽງ.

ໃນຕອນບ່າຍຂອງວັນທີ 31 ຕຸລາແມ່ນການຈັດຕັ້ງກອງປະຊຸມຂອງໜ່ວຍພັກນັກສຶກສາປະລິນຍາຕີຮຸ່ນທີ 22 ຫ້ອງ ກ, ສະຫາຍ ບົວຜັນ ວັນວິໄລ ເລຂາຄະນະພັກຮາກຖານນັກສຶກສາຫ້ອງຮຽນດັ່ງກ່າວ ໄດ້ຂຶ້ນຜ່ານບົດສະຫຼຸບການຊີ້ນຳ-ນຳພາສະມາຊິກຄົ້ນຄວ້າຮ່ຳຮຽນປະຈຳສົກປີ 2017-2018 ໂດຍສະຫາຍໄດ້ຍົກໃຫ້ເຫັນວ່າ ບັນດາສະມາຊິກພັກພາບໃນໜ່ວຍ ຍັງມີຄວາມອຸ່ນອ່ຽນທຸ່ນທ່ຽນເຊື່ອໝັ້ນໃນການນຳພາຂອງພັກ, ຄວາມສາມັກຄີ, ຄວາມດຸໝັ່ນຂະຫຍັນພຽນ, ຄວາມຮັບຜິດຊອບສູງຕໍ່ໜ້າທີ່ທີ່ໄດ້ຮັບມອບໝາຍໃຫ້, ຄວາມປະຢັດ, ຊື່ສັດ, ມີລະບຽບວິໄນ ແລະໄດ້ພ້ອມກັນຕັ້ງໜ້າເຊື່ອມຊຶມມະຕິ, ຄຳສັ່ງ, ລະບຽບການຕ່າງໆ, ບັນດາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມູນເຊື້ອສຳຄັນຂອງຊາດຂອງພັກຢ່າງເປັນປົກກະຕິ. ນອກນີ້, ຍັງໄດ້ພ້ອມຍຶດໝັ້ນ ແລະປະຕິບັດຢ່າງເຂັ້ມງວດ 5 ຫຼັກການ 3 ທິດນຳ ໃນການກໍ່ສ້າງ ແລະປັບປຸງພາຍໃນພັກ ເຊິ່ງເຮັດໃຫ້ໜ່ວຍພັກຮາກຖານຫ້ອງມີສະມາຊິກພັກສົມບູນ ແລະໄດ້ຮັບບັດສະມາຊິກພັກ 100%; ພົ້ນເດັ່ນອີກອັນໜຶ່ງກໍແມ່ນຄວາມເອົາໃຈໃສ່ສຶກສາຄົ້ນຄວ້າທັງພາຍໃນຫ້ອງ ແລະຫ້ອງສະໝຸດຢ່າງຕັ້ງໜ້າ ເຊິ່ງສະແດງອອກໃນຄະແນນທີ່ອອກແລ້ວຈໍານວນ 1 ວິຊາສາມາດຍາດໄດ້ ເກຣດ A ກວມ 3,63%, ເກຣດ  B+ ກວມ 17,40 %, ເກຣດ B 21,04 % ແລະໄດ້ເປັນນັກຮຽນເກັ່ງມີວິໄນດີ ປະເພດ 1 ກວມ 3,63% , ປະເພດ 2 ກວມ 5,45% ແລະປະເພດ 3 21,81% ແລະນອກຈາກນີ້, ຍັງໄດ້ເປັນເຈົ້າການເຂົ້າຮ່ວມຂະບວນການອອກແຮງງານ, ກີລາ-ສິລະປະວັນນະຄະດີທີ່ສະມາຊິກທຸກຄົນໄດ້ເອົາໃຈໃສ່ຫ້າວຫັນເຂົ້າຮ່ວມຢ່າງຫ້າວຫັນ.

ໃນຕອນບ່າຍຂອງວັນທີ 1 ຕຸລາ ໄດ້ຈັດກອງປະຊຸມໜ່ວຍພັກນັກສຶກສາປະລິນຍາຕີຮຸ່ນ 22 ຫ້ອງ ຂ, ໃນກອງປະຊຸມ ສະຫາຍ ພອນສະຫວັນ ບຸນທະວົງ ເລຂາຄະນະພັກຮາກຖານນັກສຶກສາຫ້ອງຮຽນດັ່ງກ່າວ ໄດ້ຂຶ້ນຜ່ານບົດສະຫຼຸບການຊີ້ນຳ-ນຳພາສະມາຊິກຄົ້ນຄວ້າຮ່ຳຮຽນປະຈຳສົກປີ 2017-2018 ແລະແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກຕົນ ໂດຍໃນບົດສະຫຼຸບໄດ້ເອົາໃຈໃສ່ຖືວຽກງານການເມືອງແນວຄິດເປັນຕົ້ນຕໍ, ເນັ້ນການຍົກລະດັບການກຳແໜ້ນແນວທາງ, ແຜນນະໂຍບາຍຂອງພັກ-ລັດ, ກໍຄືຂອງ ສມປຊ ວາງອອກເປັນຢ່າງດີ. ພ້ອມນັ້ນ, ຍັງໄດ້ພ້ອມຍຶດໝັ້ນ ແລະປະຕິບັດຢ່າງເຂັ້ມງວດ 5 ຫຼັກການ 3 ທິດນຳໃນການກໍ່ສ້າງ ແລະປັບປຸງພາຍໃນພັກ ເຊິ່ງສະເໜີຂັ້ນເທິງເພື່ອອອກບັດ ແລະຮັບບັດໄດ້ທັ້ງໝົດ 22 ສະຫາຍ, ຍິງ 7 ສະຫາຍ ແລະເລື່ອນສະມາຊິກສຳຮອງຂຶ້ນເປັນສະມາຊິກສົມບູນ 4 ສະຫາຍ ປັດຈຸບັນໄດ້ເປັນສະມາຊິກພັກສົມບູນພັກ 100%; ເອົາໃຈໃສ່ສຶກສາຄົ້ນຄວ້າທັງພາຍໃນຫ້ອງ, ຫ້ອງສະໝຸດ ແລະດ້ວຍຕົນເອງຢ່າງຕັ້ງໜ້າ ເຊິ່ງສະແດງອອກໃນຄະແນນທີ່ອອກແລ້ວຈໍານວນ 17 ວິຊາສາມາດຍາດໄດ້ ເກຣດ A ກວມ 57,41%, ເກຣດ  B+ ກວມ 12,96%, ເກຣດ B 29,63%.

ໃນວາລະດຽວກັນນີ້, ເພື່ອເປັນທິດເຍືອງທາງໃນການຊີ້ນຳ-ນຳພາແຕ່ລະດ້ານ: ດ້ານການເມືອງແນວຄິດ, ດ້ານການຈັດຕັ້ງ, ດ້ານແບບແຜນວິທີນຳພາ ແລະນຳພາປະຕິບັດໜ້າທີ່ການເມືອງ ເປັນແບບຢ່າງນຳໜ້າໃຫ້ສະມາຊິກພັກແຕ່ລະສະຫາຍ ເພື່ອໃຫ້ສົມຄູ່ກັບໜ້າທີ່ການເມືອງທີ່ໄດ້ຮັບມອບໝາຍ ຂອງແຕ່ລະໜ່ວຍພັກ, ສະຫາຍ ພູວົງ ອຸ່ນຄໍາແສນ ໄດ້ໃຫ້ຄຳໂອ້ລົມ ໂດຍສະຫາຍໄດ້ເນັ້ນໜັກບັນຫາຕົ້ນຕໍດັ່ງນີ້:

1/. ເພື່ອເສີມຂະຫຍາຍຜົນງານທີ່ຍາດມາໄດ້ ກໍຄືການຈັດຕັ້ງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນນີ້ ແມ່ນໃຫ້ສືບຕໍ່ຈັດຕັ້ງຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ x ຂອງພັກປະຊາຊົນ ປະຕິວັດລາວ ໃນການກໍ່ສ້າງບໍາລຸງໜ່ວຍພັກຂອງພວກເຮົາໃຫ້ຕໍ່ເນື່ອງ ແລະຍືນຍົງ, ສ້າງສະມາຊິກພັກໃຫ້ມີຄວາມຮູ້, ຄວາມສາມາດໃນການປະຕິບັດໜ້າທີ່ການເມືອງຂອງພັກ, ເຮັດໃຫ້ການຊີ້ນໍາ-ນໍາພາເປັນລະບົບ ແລະເຂັ້ມແຂງ, ໜັກແໜ້ນ, ຮຽກຮ້ອງໃຫ້ພັກຕ້ອງປອດໃສ, ບໍ່ມີການສໍ້ລາດບັງຫຼວງ, ຊື່ສັດບໍລິສຸດ, ສ້າງຄວາມເຊື່ອໝັ້ນແກ່ມະຫາຊົນ.

2/. ນໍາເອົາແຜນການກໍ່ສ້າງໜ່ວຍພັກ, ປອດໃສ, ເຂັ້ມແຂງ, ໜັກແໜ້ນ ຈັດຕັ້ງເຊື່ອມຊຶມ ໃຫ້ບັນລຸເຖິງຈຸດໝາຍ, ຈັດຕັ້ງປະຕິບັດໃຫ້ເອກະພາບກັນໃຫ້ເປັນອັນລະອຽດ ເພື່ອເປັນແຜນການໃນແຕ່ລະເດືອນ, 3 ເດືອນ ສຸມໃສ່ຈັດຕັ້ງປະຕິບັດໃຫ້ເປັນລະບົບ, ຮຽນຮູ້ພຶດຕິກຳຕົວຈິງ ແລະສະຫຼຸບຖອດຖອນບົດຮຽນ ຕີລາຄາກັນ, ຈັດຕັ້ງມອບໝາຍກັນເປັນແຜນໃຫ້ລະອຽດ ແລະຫາວິທີແກ້ໄຂແຕ່ລະຂອດ.

3/. ເປັນເຈົ້າການໃນການຊີ້ນຳ-ນຳພາມອບໃຫ້ແຕ່ລະຈຸພັກເປັນເຈົ້າການ,  ບັນດາສະຫາຍທີ່ໄດ້ແຕ່ງຕັ້ງເປັນຄະນະກວດກາຕ້ອງໄດ້ເປັນເຈົ້າການຈັດຕັ້ງປະຕິບັດວຽກງານຢ່າງເອົາຈິງເອົາຈັງ, ຢາກໃຫ້ມີການກວດຈັດຕັ້ງປະຕິບັດສ່ອງແສງຄວາມເປັນຈິງ ຕີລາຄາແບ່ງປະເພດສະມາຊິກພັກ ໃຫ້ອີງໃສ່ມາດຖານໃຫ້ມີຄຸນນະພາບ, ພາວະວິໄສ; ໃນການຕີລາຄາທຸກຄັ້ງຕ້ອງຖືກຕ້ອງຊັດເຈນ ບໍ່ຢາກໃຫ້ແລ່ນນຳປະລິມານ.

4/. ເພີ່ມທະວີຄວາມສາມັກຄີເປັນເອກະພາບ, ພ້ອມຮຽງຮຽງໜ້າເປັນຈິດໜຶ່ງໃຈດຽວພ້ອມກັນຈັດຕັ້ງປະຕິບັດແກ້ໄຂຂໍ້ຂາດຕົກບົກຜ່ອງໃຫ້ໜ່ວຍພັກປອດໃສ, ເຂັ້ມແຂງ, ໜັກແໜ້ນໄດ້ນຳໄປຈັດຕັ້ງຜັນຂະຫຍາຍຢູ່ໃນກົມກອງທ້ອງຖິ່ນຂອງຕົນໃຫ້ເກີດດອກອອກຜົນສູງສຸດ.

ຂ່າວ/ພາບໂດຍ: ນ ດອກໄມ້ ຈັນດາລາ

ບກ: ທ່ານ ປທ ນ. ຄໍາຮູ້ ວິລະທອນ