ສມປຊ ຈັດຕັ້ງສະເຫຼີມສະຫຼອງວັນຊາດທີ 2 ທັນວາຄົບຮອບ 43 ປີ ແລະສະຫຼຸບຜົນງານປະຈຳປີ 2018

ໄດ້ຈັດຕັ້ງພິທີສະເຫຼີມສະຫຼອງໃນຕອນເຊົ້າຂອງວັນທີ 05 ທັນວາ 2018 ທີ່ ສະໂມສອນໃຫຍ່ ສມປຊ ໂດຍການເປັນປະທານຂອງ ທ່ານ ຮສ ປອ ທອງສະລິດ ມັງໜ່ໍເມກ ກໍາມະການສູນກາງພັກ, ສະມາຊິກສະພາຊຸດທີ VIII, ເລຂາຄະນະບໍລິຫານງານພັກຫົວໜ້າ ສມປຊ; ມີຄະນະພັກຄະນະອຳນວຍການພະນັກງານຄູ-ອາຈານ ແລະນັກສຶກສາທຸກຮຸ່ນທຸກລະບົບເຂົ້າຮ່ວມ.

ໃນພິທີທ່ານ ປທ ນ. ຄຳຫຼ້າ ແກ້ວອຸ່ນຄຳ ຫົວໜ້າຫ້ອງການ ສມປຊ ໄດ້ຂຶ້ນຜ່ານບົດ ສະຫຼຸບຜົນງານປະຈຳປີ 2018 ໂດຍທ່ານໃຫ້ຮູ້ວ່າ: ພະນັກງານແຕ່ລະພາກສ່ວນ ຍັງມີແນວຄິດໜັກແໜ້ນອຸ່ນອ່ຽງທຸ່ນທ່ຽງເຊື່ອໝັ້ນ ຕໍ່ການນຳພາຂອງພັກ, ຈັດຕັ້ງປະຕິບັດໜ້າທີ່ການເມືອງຂອງຕົນ ໃນຂະແໜງການຕ່າງໆຢ່າງຕັ້ງໜ້າ ແລະມີຄວາມຮັບຜິດຊອບສູງເອົາໃຈໃສ່ຈັດຕັ້ງປະຕິບັດວຽກງານການຮຽນ-ການສອນການຄົ້ນຄວ້າວິທະຍາສາດ ແລະການພົວພັນຮ່ວມມືກັບຕ່າງປະເທດ ເຂົ້າສູ່ລວງເລິກເປັນກ້າວໆຕັ້ງໜ້າຫ້າວຫັນເຂົ້າໃນຂະບວນການລວມ ຢ່າງຟົດຟື້ນ.

ໃນໂອກາດດັ່ງກ່າວ ທ່ານ ປທ ນ. ໃບຊ່ຽນ ມູນຕີວົງ ຄະນະບໍລິຫານງານພັກ, ຫົວໜ້າກົມຈັດຕັ້ງ ໄດ້ຂຶ້ນຜ່ານຂໍ້ຕົກ ລົງຍ້ອງຍໍຂອງ ຫົວໜ້າ ສມປຊ ວ່າດ້ວຍການອະນຸມັດຍ້ອງຍໍພະນັກງານດີເດັ່ນກົມກອງດີເດັ່ນ ແລະຫ້ອງຮຽນດີເດັ່ນປະເພດຕ່າງໆ ພ້ອມທັງຈັດຕັ້ງພິທີມອບຮັບຢ່າງສົມກຽດ ເຊິ່ງມີພະນັກງານດີເດັ່ນປະເພດ ມີຈຳນວນ 41 ທ່ານ, ຍິງ 20 ທ່ານ, ພະນັກງານດີເດັ່ນ ປະເພດ II ມີຈຳນວນ 23 ທ່ານຍິງ 13, ພະນັກງານດີເດັ່ນ ປະເພດ III ມີຈຳນວນ 09 ທ່ານຍິງ 06 ທ່ານກົມກອງດີເດັ່ນ ປະເພດ ມີຈຳນວນ 03 ກົມກອງປະເພດ II ມີຈຳນວນ 04 ກົມກອງ ແລະປະເພດ III ມີ 03 ກົມກອງ, ຫ້ອງຮຽນດີເດັ່ນປະເພດມີຈຳນວນ 03 ຫ້ອງຮຽນປະເພດ III ມີ 02 ຫ້ອງຮຽນ.

ພ້ອມກັນນັ້ນ, ທ່ານປະທານພິທີໄດ້ໃຫ້ຄຳໂອ້ລົມບັນດາຜູ້ເຂົ້າຮ່ວມທັງໝົດ ໂດຍທ່ານໄດ້ເນັ້ນໃຫ້ພະນັກງານຄູອາຈານ ແລະນັກສຶກສາທັງໝົດ ຈົ່ງພາກັນເອົາໃຈໃສ່ຍຶດໝັ້ນຢ່າງເດັດດ່ຽວຕໍ່ອຸດົມການ ແລະການນຳພາຂອງພັກຕັ້ງໜ້າສຶກສາອົບຮົມການເມືອງ-ແນວຄິດ, ຄວາມສາມັກຄີຕໍ່ແນວທາງຂອງພັກ, ປັບປຸງການຄົ້ນຄວ້າສຶກສາຮ່ຳຮຽນໃຫ້ມີບາດກ້າວໃໝ່ຄຽງຄູ່ ນິໄສ ໃນການມັກຂຽນມັກອ່ານມັກຄົ້ນຄວ້າ-ນຳສະເໜີ ແລະສືບຕໍ່ຂະຫຍາຍພັກໃຫ້ມີຄຸນນະພາບຕີລາຄາໃຫ້ຖືກຕ້ອງຕາມລະບຽບຫຼັກການ, ຖອດຖອນບົດຮຽນຂອງຕ່າງປະເທດທີ່ເຫັນວ່າເປັນແບບຢ່າງໃນການຮຽນ-ການສອນທີ່ມີຄຸນນະພາບດີ ແລະປະກອບສ່ວນຢ່າງຕັ້ງໜ້າ ໃນພາລະກິດປົກປັກຮັກສາ ແລະພັດທະນາປະເທດຊາດ ພັດທະນາຕົນເອງ ແລະອົງການຈັດຕັ້ງໃຫ້ມີຄວາມກ້າວໜ້າຂຶ້ນໄປເລື້ອຍໆ.