ໜ່ວຍພັກຮາກຖານ ກົມວິິຊາການ-ກົມຄຸ້ມຄອງການຄົ້ນຄວ້າວິທະຍາສາດ ຮັບສະມາຊິກພັກໃໝ່ 4 ສະຫາຍ

ພິທີຄັ້ງນີ້ໄດ້ຈັດຂຶ້ນໃນວັນທີ 14 ທັນວາ ໃຫ້ກຽດຮ່ວມເປັນປະທານໂດຍ ສະຫາຍ ສຈ ປອ ບຸນທີ ເຄືອມີໄຊ ຄະນະບໍລິຫານງານພັກ, ເລຂາໜ່ວຍພັກຮາກຖານກົມວິຊາການ-ກົມຄຸ້ມຄອງການຄົ້ນຄວ້າວິທະຍາສາດ, ມີການເຂົ້າຮ່ວມຂອງບັນດາຜູ້ຕາງໜ້າແຕ່ລະໜ່ວຍພັກຮາກຖານພາຍໃນ ສມປຊ ແລະຕາງໜ້າຈາກ 3 ອົງການຈັດຕັ້ງມະຫາຊົນ.

 ໃນພິທີທັງ 4 ສະຫາຍ ລວມມີ ສະຫາຍ ຄຳໄຊ ມະນີລຸນ, ສະຫາຍ ພອນປະສົງ ທຳມະບຸນມີ, ສະຫາຍ ນ. ແສງດາວ ຊົງດາວເພັດ ແລະ ສະຫາຍ ທົງໄຊ ວົງແພງສີ ໄດ້ຂຶ້ນອ່ານຄຳຮ້ອງຂໍເຂົ້າເປັນສະມາຊິກພັກສຳຮອງ ເຊິ່ງເນື້ອໃນໃບຄຳຮ້ອງໄດ້ຍົກໃຫ້ເຫັນຂະບວນການຝຶກຝົນຫຼໍ່ຫຼອມຕົນເອງຮອບດ້ານມີຄວາມຈົ່ງຮັກພັກດີຕໍ່ພັກ-ລັດ, ມີຄວາມເປັນເອກະພາບຕໍ່ແນວທາງນະໂຍບາຍຂອງພັກ, ລະບຽບກົດໝາຍ ແລະຂໍ້ກຳນົດຕ່າງໆຂອງລັດ, ເປັນແບບຢ່າງທີ່ດີໃຫ້ແກ່ມະຫາຊົນ. ຈາກນັ້ນ, ບັນດາສະມາຊິກພັກສົມບູນຜູ້ທີ່ຖືກມອບໝາຍໃຫ້ຕິດຕາມມະຫາຊົນກ້າວໜ້າ ໄດ້ຂຶ້ນຜ່ານຜົນຂອງການຕິດຕາມ ແລະປະເມີນທັງ 4 ສະຫາຍ.

ເພື່ອເປັນການຢັ້ງຢືນການຮັບສະມາຊິກພັກໃໝ່ນັ້ນ ສະຫາຍ ສຈ ປອ ບຸນທີ ເຄືອມີໄຊ ໄດ້ຂຶ້ນຜ່ານມະຕິຕົກລົງພ້ອມທັງມອບຂໍ້ຕົກລົງໃຫ້ພວກກ່ຽວ.

ໃນວາລະທ້າຍຂອງພິທີ ສະຫາຍ ປະທານ ໄດ້ມີທິດເຍືອງທາງໃຫ້ ສະມາຊິກພັກໃໝ່ ເຊິ່ງເນື້ອໃນບາງຕອນ ສະຫາຍໄດ້ເນັ້ນໜັກວ່າ: ຈົ່ງເພີ່ມທະວີຄວາມຮັບຜິດຊອບ ແລະຊອກຮູ້ຮ່ຳຮຽນໃນປື້ມກົດລະບຽບພັກຕື່ມ ເພື່ອໃຫ້ມີທັດສະນະຫຼັກໝັ້ນທີ່ແໜ້ນແກ່ນຍຶດໝັ້ນອຸດົມການການເມືອງ, ມີຫົວຄິດປະດິດສ້າງເປັນແບບເປັນຢ່າງທີ່ດີແກ່ມະຫາຊົນ ພ້ອມທັງປຸກລະດົມຂົນຂວາຍມະຫາຊົນ ໃນການປະຕິບັດໜ້າທີ່ວຽກງານຢ່າງຫ້າວຫັນ, ຮັກສາຄວາມສາມັກຄີ ແລະເປັນກຳລັງແຮງແກ່ພັກ.

 

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ