ຄະນະນັກສຶກສາແຂວງຈຳປາສັກ ເລືອກຕັ້ງຄະນະຊຸດໃໝ່

ໃນແຕ່ລະປີສະຖາບັນການເມືອງ ແລະການປົກຄອງແຫ່ງຊາດ ມີນັກສຶກສາທົ່ວປະເທດມາສຶກສາຮ່ຳ ຮຽນ ໃນນັ້ນເພື່ອເຕົ້າໂຮມຄວາມສາມັກຄີພາຍໃນແຂວງໃຫ້ເປັນປຶກແຜ່ນແລະເປັນການຊ່ວຍເຫຼືອເບິ່ງແຍງເຊິ່ງກັນ ແລະກັນໃນເວລາຂັດສົນ ແຕ່ລະແຂວງຍັງມີການຈັດຕັ້ງເປັນສະມາຄົມຂອງແຂວງຂຶ້ນ; ແຂວງຈຳປາສັກ ກໍແມ່ນແຂວງໜຶ່ງທີ່ມີການຈັດຕັ້ງສະມາຄົມ ແລະມີການຈັດຕັ້ງຄະນະນັກສຶກສາແຂວງຂຶ້ນ ເພື່ອເຮັດໜ້າທີ່ໃນການຊີ້ນຳ-ນຳພາເຄື່ອນໄຫວວຽກງານຕ່າງໆຕະຫຼອດໄລຍະເວລາທີ່ສຶກສາຄົ້ນຄວ້າພາຍໃນ ສມປຊ. ສະນັ້ນ, ໃນວັນທີ 11 ທັນວາ 2018 ຜ່ານມາ ທີ່ ສມປຊ ຄະນະນັກສຶກສາແຂວງຈໍາປາສັກໄດ້ຈັດກອງປະຊຸມ ເພື່ອສະຫຼຸບຜົນຂອງການຈັດຕັ້ງປະຕິບັດວຽກງານປະຈຳປີ 2018 ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ປທ ອຸບົນ ມະຫາໄຊ  ຄະນະບໍລິຫານງານພັກ, ຮອງຫົວໜ້າ ສມປຊ ທັງເປັນຜູ້ຊີ້ນຳວຽກງານຄະນະນັກສຶກສາແຂວງຈຳປາສັກ, ມີສະມາຊິກພາຍໃນສະມາຄົມທັງໝົດນັກສຶກສາຈຳນວນ 27 ທ່ານ, ຍິງ 5 ທ່ານເຂົ້າຮ່ວມ.

 

ບັນດາຜູ້ເຂົ້າຮ່ວມໄດ້ຮັບຟັງການລາຍງານຜົນຂອງການຈັດຕັ້ງປະຕິບັດວຽກງານ 1 ປີຜ່ານມາ ຈາກ ທ່ານ ສີຈະເລີນ ງາມວິໄລ ຮອງປະທານ ຄະນະກອງທຶນນັກສຶກສາແຂວງ ໂດຍໄດ້ຍົກໃຫ້ເຫັນສະພາບການເຄື່ອນໄຫວຂອງສະມາຄົມໂດຍສັງເຂບ, ພ້ອມທັງສະຫຼຸບລາຍຮັບລາຍຈ່າຍ ແລະການປະຕິບັດນະໂຍ ບາຍຂອງກອງທຶນເຊິ່ງລວມມີ ການຈັດງານພົບປະນັກສຶກສາຊຸດໃໝ່, ການສ້າງຂະບວນການກັບພະນັກງານ,​ຄູ-ອາຈານ ພາຍໃນ ສມປຊ, ການສ້າງຂະບວນການກັບສະມາຄົມນັກສຶກສາແຂວງຕ່າງໆທົ່ວປະເທດ, ຊຸກຍູ້ຊື້ຕົ້ນໄມ້ປູກໃນວັນປູກຕົ້ນໄມ້, ຊ່ວຍເຫຼືອສະມາຊິກໃນກໍລະນີຄອບຄົວເສຍຊີວິດ, ຊຸກຍູ້ສະມາຊິກພາຍໃນແຂວງທຸກຮຸ່ນທຸກລະບົບທີ່ສຳເລັດການສຶກສາ, ການເຂົ້າຮ່ວມງານສັງສັນຂອງສະມາຄົມແຂວງຕ່າງໆ, ຊື້ກະ ຕ່າເຂົ້າອວຍພອນການນຳຂັ້ນຕ່າງໆຂອງ ສມປຊ ໃນວັນສໍາຄັນຕ່າງໆຂອງຊາດ ແລະໃຫ້ສະມາຊິກກູ້ຢືມອີກຈຳນວນໜຶ່ງ.  ທັງໄດ້ຕີລາຄາດ້ານດີ, ຂໍ້ຄົງຄ້າງ ແລະແລກປ່ຽນຄຳຄິດຄຳເຫັນພາຍໃນກອງປະຊຸມຢ່າງກົງໄປກົງມາ.

ນອກນັ້ນ, ກອງປະຊຸມຍັງໄດ້ມີການປ່ອນບັດ ຄັດເລືອກເອົາຄະນະນັກສຶກສາແຂວງຊຸດໃໝ່ ເຊິ່ງຜົນຂອງການຄັດເລືອກຄະນະຊຸດໃໝ່ຄື:

1.ທ່ານ ລັດຕະວັນ ແສງສະຫວ່າງ ເປັນປະທານ.

2.ທ່ານ ສີຈະເລີນ ງາມວິໄລ ຮອງປະທານ.

3.ທ່ານ ນ. ກິນນາລອນ ດວງມະນີ ຮອງປະທານ.

4.ທ່ານ ນ. ລັດສະໝີ ຈັນດາວົງ ເປັນຄະນະ.

5.ທ່ານ ຄຳປະສົງ ແສນສະຫວັດ ເປັນຄະນະ.

 ເຊິ່ງທັງ 5 ສະຫາຍຊຸດໃໝ່ນີ້ ຈະໄດ້ສືບຕໍ່ເຄື່ອນໄຫວເປັນຜູ້ຊີ້ນຳ-ນຳພາ ແລະຈັດຕັ້ງຜັນຂະຫຍາຍບັນດາຂໍ້ຕົກລົງແຕ່ງຕັ້ງຂັ້ນເທິງໃຫ້ປະກົດຜົນເປັນຈິງ; ແລະໃນຕອນທ້າຍ ທ່ານ ອຸບົນມະຫາໄຊ ໄດ້ໃຫ້ຄຳໂອ້ລົມແກ່ຄະນະຊຸດໃໝ່ ໂດຍທ່ານເນັ້ນໜັກໃຫ້ມີການກຳນົດ ເປົ້າໝາຍໃນການໃຊ້ຈ່າຍເງິນກອງທຶນຕ້ອງໃຫ້ ຈະແຈ້ງ ແລະຄວນມີນະໂຍບາຍແກ່ສະມາຊິກຢ່າງເໝາະສົມ ແລະທົ່ວເຖິງ; ພ້ອມກັນເຕົ້າໂຮມຄວາມສາມັກຄີ ເປັນປຶກແຜ່ນໝັ້ນໜຽວ, ປຸ້ມລຸມຊ່ວຍເຫຼືອເຊິ່ງກັນ ແລະກັນ, ເປັນເຈົ້າການເຄົາລົບການຈັດຕັ້ງທຸກຂັ້ນ ແລະ ປະຕິບັດລະບຽບວິໄນຂອງສະຖາບັນການເມືອງ ແລະການປົກຄອງແຫ່ງຊາດວາງອອກໃຫ້ເຂັ້ມງວດ; ສຸມໃສ່ສູ້ ຊົນອົດທົນຜ່ານຜ່າໃນການສຶກສາຄົ້ນຄວ້າຮໍ່າຮຽນໃຫ້ເກີດຄວາມຮູ້, ຄວາມສາມາດ; ເອົາໃຈໃສ່ໃນການອ່ານ, ການຂຽນ, ການຄົ້ນຄວ້າ ແລະພ້ອມກັນຊ່ວຍເຫຼືອເບິ່ງ ແຍງດ້ວຍຄວາມຈິງໃຈຕໍ່ຜູ້ທີ່ມີຫາງສຽງ ແລະມີທ່າອ່ຽງ ຫາງສຽງ ເພື່ອຊ່ວຍກັນແກ້ໄຂບັນຫາແຕ່ຫົວທີ ແລະຮຽກຮ້ອງໃຫ້ຮັກສາມູນເຊື້ອອັນດີ ແລະປະຕິບັດໜ້າທີ່ ຂອງຕົນໃຫ້ມີຜົນສຳເລັດກ້າວຂຶ້ນຢ່າງຕໍ່ເນື່ອງ.

ຂ່າວ: ນ ດອກໄມ້ ຈັນດາລາ

 

ພາບ: ວິໄລສັກ ເພັງສະຫວັນ