ຄະນະຜູ້ແທນ ສະຖາບັນການເມືອງແຫ່ງຊາດ ໂຮ່ຈີມິນ ສສ ຫວຽດນາມ ພົບປະຢ້ຽມຢາມ ສະຖາບັນການເມືອງ ແລະ ການປົກຄອງແຫ່ງຊາດ

   ເພື່ອເປັນການເສີມສ້າງຄວາມສາມັກຄີພິເສດ, ການຮ່ວມມືຮອບດ້ານ ລະຫວ່າງ ສອງຊາດພວກເຮົາ ເວົ້າລວມ, ເວົ້າສະເພາະ ລະຫວ່າງສອງສະຖາບັນ ໃຫ້ ນັບມື້ນັບເຂົ້າສູ່ລວງເລິກ ແລະ ເກີດດອກອອກຜົນຢ່າງບໍ່ຢຸດຢັ້ງ. ໃນຕອນເຊົ້າຂອງວັນທີ 17 ທັນວາ ຢູ່ທີ່ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຕ້ອນຮັບຄະນະຜູ້ແທນ ສະຖາບັນການເມືອງແຫ່ງຊາດ ໂຮ່ຈີມິນ ສສ ຫວຽດນາມ, ເຊິ່ງລວມມີ ຄະນະຜູ້ແທນຈາກສະຖາບັນການເມືອງເຂດ II ແລະເຂດ III ຈຳນວນ 17 ທ່ານ, ຍິງ 05 ທ່ານ ເຊິ່ງນຳພາຄະນະໂດຍ ທ່ານ ຮສ ປອ ຮວ່າງ ວັນ ເຫງັຍ ຫົວໜ້າກົມພົວພັນສາກົນ ສະຖາບັນການເມືອງ ໂຮ່ຈີມິນ.

 

     ຕ້ອນຮັບຄະນະຜູ້ແທນຄັ້ງນີ້, ໂດຍ ທ່ານ ປທ ນ. ຄຳຫຼ້າ ແກ້ວອຸ່ນຄຳ ຫົວໜ້າຫ້ອງການ ສມປຊ ພ້ອມດ້ວຍຄະນະ. ຜົນຂອງການພົບປະຢ້ຽມຢາມແມ່ນທັງສອງຄະນະໄດ້ເອກະພາບກັນກະກຽມເນືຶ້ອໃນການເຊັນບົດບັນທຶກການຮ່ວມມື ໃນເດືອນ ມັງກອນປີ 2019 ທີ່ຈະມາເຖິງໃນມໍ່ໆນີ້ ເຊິ່ງປະກອບມີສະຫຼຸບຜົນການຈັດຕັ້ງບົດບັນທຶກການຮ່ວມມື ໄລຍະ 2014-2018 ແລະກະກຽມເນື້ອໃນຈິດໃຈບົດບັນທຶກການຮ່ວມມື ລະຫວ່າງ ສອງສະຖາບັນໃນ ໄລຍະ 2019-2023. ນອກນີ້ສອງສະຖາບັນໄດ້ລາຍງານຄວາມຄືບໜ້າຂອງໂຄງການແປປື້ມນິພົນໂຮ່ຈີມິນຄົບຊຸດຈາກພາກສາຫວຽດນາມເປັນພາສາລາວ ແລະວັດຈະນານຸກົມ ຄໍາສັບໃນນິພົນໂຮ່ຈີມິນ.

ໂອກາດນີ້ ທ່ານ ຮສ ປອ ຮວ່າງ ວັນເຫງັຍ ໄດ້ຕາງໜ້າໃຫ້ສະຖາບັນການເມືອງແຫ່ງຊາດ ໂຮ່ຈີມິນ ສະແດງຄວາມຂອບໃຈຕໍ່ກັບການຕ້ອນຮັບອັນອົບອຸ່ນ ແລະມອບເຄື່ອງອຸປະຖຳໃຫ້ແກ່ ໂຄງການຝ່າຍລາວ (ສມປຊ) ປະກອບມີຄອມພີວເຕີໂນດບຸກ 02 ເຄື່ອງ ແລະຈັກກ໋ອບປີ້ 01 ເຄື່ອງມູນຄ່າທັງໝົດ 99.858.000 ດົງ ເພື່ອເຮັດໃຫ້ການປະສານງານສະດວກຍິ່ງຂຶ້ນ ຕາງໜ້າກ່າວຮັບໂດຍ ທ່ານ ປທ ນ. ຄຳຫຼ້າ ແກ້ວອຸ່ນຄຳ.

ຈາກນັ້ນ, ຄະນະຜູ້ແທນດັ່ງກ່າວໄດ້ເຂົ້າພົບປະ ທ່ານ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ ເພື່ອລາຍງານສະພາບການເຄື່ອນໄຫວໂດຍລວມຂອງ ສະຖາບັນການເມືອງແຫ່ງຊາດ ໂຮ່ຈີມິນ ໂດຍສະເພາະແມ່ນການກະກຽມເນື້ອໃນບົດບັນທຶກການຮ່ວມມືໃນຕໍ່ໜ້າ, ເຊິ່ງທ່ານໄດ້ສະແດງຄວາມຍິນດີຕໍ່ຜົນສຳເລັດຂອງການປຶກສາຫາລືລະຫວ່າງສອງຝ່າຍ ແນໃສ່ສືບຕໍ່ສ້າງໃຫ້ເຂັ້ມແຂງ ແລະມີຄວາມກ້າວໜ້າ.

     ໃນໂອກາດດຽວກັນ ຄະນະຜູ້ແທນທັງສອງຝ່າຍໄດ້ແລກປ່ຽນຂອງທີ່ລະນຶກ ເຊິ່ງກັນ ແລະກັນ.

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ