ຊົມເຊີຍການມອບ-ຮັບໃບຢັ້ງຢືນການຈັດຕັ້ງປະຕິບັດ ຂໍ້ແຂ່ງຂັນ 4 ບຸກ ແລະ 5 ເປັນເຈົ້າ

 

 

ໃນຕອນເຊົ້າຂອງວັນທີ 18 ທັນວາທີ່ຫ້ອງປະຊຸມ 302 ຕຶກ H, ສມປຊ ໄດ້ມີພິທີ ມອບ-ຮັບໃບຢັ້ງຢືນຊາວໜຸ່ມ 4 ບຸກ ປະຈຳສົກປີ 2017-2018 ໃຫ້ແກ່ໜ່ວຍຊາວໜຸ່ມຮາກຖານ ນັກສຶກສາ ປະລິນຍາຕີ ຮຸ່ນທີ XXI ຫ້ອງ ກ ແລະເຊື່ອມຕໍ່ ຮຸ່ນທີ XII. ພາຍໃຕ້ການເປັນປະທານຮ່ວມຂອງ ສະຫາຍ ປທ ແສງຈັນ ຈັນທະສຸກ ຮອງເລຂາຄະນະບໍລິຫານງານຊາວໜຸ່ມ ສມປຊ, ສະຫາຍເລຂາໜ່ວຍຊາວໜຸ່ມ ນັກສຶກສາ ສມປຊ ແລະສະຫາຍເລຂາໜ່ວຍພັກຮາກຖານ ນັກສຶກສາ ປະລິນຍາຕີ ຮຸ່ນທີ XXI ຫ້ອງ ກ ແລະເຊື່ອມຕໍ່ ຮຸ່ນທີ XII.

 

ໃນພິທີ ສະຫາຍ ສົມໂພດ ໝັ້ນທະວົງ ເລຂາຊາວໜຸ່ມຮາກຖານ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານ 4 ບຸກ ເຊິ່ງໃນບົດສະຫຼຸບໄດ້ຍົກໃຫ້ເຫັນຜົນງານແຕ່ລະດ້ານມີການພັດທະນາດີຂຶ້ນນັບມື້ ເປັນຕົ້ນວຽກງານສຶກສາອົບຮົມການເມືອງແນວຄິດ, ວຽກງານການຝຶກຝົນຫຼໍ່ຫຼອມຮໍ່າຮຽນ, ວຽກງານປັບປຸງ ແລະກໍ່ສ້າງທາງດ້ານການຈັດຕັ້ງ ແລະວຽກງານວິຊາອາຊີບ-ສ້າງວຽກເຮັດງານທໍາໃນການພັດທະນາວິຊາສະເພາະ ເຊິ່ງຜົນການປະຕິບັດຂໍ້ແຂ່ງຂັນໄດ້ປະກອບສ່ວນເຮັດໃຫ້ວຽກງານລວມຂອງຫ້ອງ ກໍຄືການຄົ້ນຄວ້າຮໍ່າຮຽນ ແລະຂະບວນການມີຄວາມຟົດຟື້ນ. ນອກນັ້ນ, ສະຫາຍຍັງໄດ້ຜ່ານທິດທາງແຜນການ ຕໍ່ທີ່ປະຊຸມໄດ້ຮັບຟັງ ແລະປະກອບຄຳຄິດຄຳເຫັນຢ່າງກົງໄປກົງມາ.

ຈາກນັ້ນ, ສະຫາຍ ວິໄລສິດ ພິມພັກດີ ໄດ້ຕາງໜ້າໃຫ້ພະແນກພັກ-ອົງການຈັດຕັ້ງມະຫາຊົນ, ກົມຈັດຕັ້ງ-ພະນັກງານ ຂຶ້ນຜ່ານມະຕິຕົກລົງວ່າດ້ວຍການມອບໃບຢັ້ງຢືນ 4 ບຸກ ເຊິ່ງໄດ້ໃຫ້ກຽດກ່າວມອບໂດຍ ສະຫາຍ ປທ ແສງຈັນ ຈັນທະສຸກ ແລະກ່າວຮັບໂດຍສະຫາຍ ສົມໂພດ ໝັ້ນທະວົງ ພ້ອມດ້ວຍຄະນະໜ່ວຍຊາວໜຸ່ມຫ້ອງ.

ໃນຕອນແລງຂອງວັນດຽວກັນ ສະຫາຍ ປທ ອິນທະວົງ ໂຄດປັນຍາ ປະທານສະຫະພັນກຳມະບານ ສມປຊ ໄດ້ເປັນກຽດເຂົ້າຮ່ວມເປັນປະທານ ແລະມອບໃບຢັ້ງຢືນ 5 ເປັນເຈົ້າ ໃຫ້ແກ່ຮາກຖານກຳມະບານ ນັກສຶກສາ ປະລິນຍາຕີ ຮຸ່ນທີ XXI ຫ້ອງ ກ ແລະເຊື່ອມຕໍ່ ຮຸ່ນທີ XII. ກ່າວຮັບໂດຍສະຫາຍ ຄຳຫຼ້າ ເຮືອງອຸນສອນ ປະທານຮາກຖານກຳມະບານຂອງຫ້ອງ.

ສະຫາຍ ຄຳຫຼ້າ ເຮືອງອຸນສອນໄດ້ຍົກໃຫ້ເຫັນສະພາບການເຄື່ອນໄຫວຈັດຕັ້ງປະຕິບັດວຽກງານກຳມະບານ ເຊິ່ງສາມາດຕີລາຄາໄດ້ວ່າມີທັງດ້ານຕັ້ງໜ້າ, ຂໍ້ຄົງຄ້າງ ແລະໄດ້ວາງທິດທາງແກ້ໄຂໃນຕໍ່ໜ້າ. ການຈັດຕັ້ງປະຕິບັດຂໍ້ແຂ່ງຂັນ 5 ເຈົ້າ ຢູ່ພາຍໃນຮາກຖານ ຜ່ານມາສາມາດປະຕິບັດໄດ້ 95 ສ່ວນຮ້ອຍຂຶ້ນໄປ. 

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ