ຄະນະນຳ ສະຖາບັນການເມືອງ ແລະ ການປົກຄອງແຫ່ງຊາດ ສຳເລັດການໄປຮ່ວມກອງປະຊຸມສຳມະນາວິທະຍາສາດ ຢູ່ສະຖາບັນໂຄສະນາ ແລະ ຂ່າວສານ ສສ ຫວຽດນາມ

   

    ອີງຕາມການເຊື້ອເຊີນ ຂອງສະຖາບັນໂຄສະນາ ແລະ ຂ່າວສານ, ສສ ຫວຽດນາມ, ສະຫາຍ ຮສ. ພູວົງ ອຸ່ນຄໍາແສນ ຮອງເລຂາຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ໄດ້ເດີນທາງໄປເຂົ້າຮ່ວມກອງປະຊຸມສຳມະນາວິທະຍາສາດ ແລະ ເຮັດວຽກ ຢູ່ສະຖາບັນໂຄສະນາ ແລະ ຂ່າວສານ ຢ່າງເປັນທາງການ ນັບແຕ່ວັນທີ 28 ພະຈິກ ຫາ ວັນທີ 1 ທັນວາ 2018 ຜ່ານມາ. ເຊິ່ງໄດ້ຮັບການຕ້ອນຮັບຢ່າງອົບອຸ່ນຈາກຄະນະພັກ, ຄະນະນໍາ ຂອງສະຖາບັນໂຄສະນາ ແລະ ຂ່າວສານ ນຳໂດຍສະຫາຍ ຮສ.ປອ ເຈືອງ ຫງອັກ ນາມ ອຳນວຍການ, ປະທານສະພາວິທະຍາສາດ ແລະ ກໍ່ສ້າງ, ສະຖາບັນໂຄສະນາ ແລະ ຂ່າວສານ ພ້ອມດ້ວຍພະນັກງານ ຂອງສະຖາບັນໂຄສະນາ ແລະ ຂ່າວສານ.

 

ໃນວັນທີ 29 ພະຈິກ ໄດ້ເຂົ້າຮ່ວມສຳມະນາວິທະຍາສາດ ພາຍໃຕ້ຫົວຂໍ້: ລັດທິສັງຄົມນິຍົມສະຕະວັດທີ CCI: ຄວາມຮັບຮູ້ໃໝ່ ແລະ ບົດຮຽນ” ເຊິ່ງ​ເປັນ​ກອງ​ປະຊຸມ​ທີ່​ມີ​ຄວາມ​ໝາຍ​ສຳຄັນຕໍ່​ກັບບັນດາປະເທດທີ່ຍັງຍຶດໝັ້ນຕາມທິດສັງຄົມນິຍົມ ໂດຍມີນັກວິທະຍາສາດຈາກ 3 ປະເທດເຂົ້າຮ່ວມຄື: ສສ ຫວຽດນາມ, ສປປ ລາວ ແລະ ສປ ຈີນ, ກອງປະຊຸມໄດ້ຮັບຟັງການສະເໜີບົດຫົວຂໍ້ຕ່າງໆ ກ່ຽວກັບການສ້າງສັງຄົມນິຍົມໃນສະຕະວັດທີ XXI ຈາກ ສສ ຫວຽດນາມ 11 ຫົວຂໍ້, ສປປ ລາວ 2 ຫົວຂໍ້ ແລະ ສປ ຈີນ 7 ຫົວຂໍ້. ພ້ອມກັນນັ້ນ, ບັນດານັກວິທະຍາສາດ ໄດ້ແລກປ່ຽນຄຳຄິດຄຳເຫັນ, ບົດຮຽນ, ທັດສະນະນຳກັນ ແລະຕີລາຄາຢ່າງກົງໄປກົງມາກ່ຽວກັບຫຼາຍບັນຫາທີ່ພົວພັນເຖິງການສ້າງສັງຄົມນິຍົມໃນເງື່ອນໄຂໃໝ່. 

ນອກຈາກການເຂົ້າຮ່ວມກອງປະຊຸມສຳມະນາວິທະຍາສາດແລ້ວ, ໃນວັນທີ 30 ພະຈິກ 2018 ຍັງໄດ້ ພົບປະກັບຄະນະພັກ, ຄະນະນຳ ຂອງສະຖາບັນໂຄສະນາ ແລະ ຂ່າວສານ; ສະຖາບັນການເມືອງ ແລະ ການປົກຄອງແຫ່ງຊາດໂຮ່ຈິມິນ ເພື່ອແນໃສ່ແລກປ່ຽນບົດຮຽນ ແລະ ເພີ່ມທະວີການພົວພັນຮ່ວມມືໃຫ້ເລິກເຊິ່ງກວ່າເກົ່າ.

ບັນນາທິການ: ທ່ານ ປທ ນ. ຄຳຮູ້ ວິລະທອນ

 

ຂ່າວ/ພາບ: ທ່ານ ປອ ນ. ລຳພູນ ດວນສຸວັນ