ຄະນະຈັດຕັ້ງສູນກາງພັກ ສະຫຼຸບການຈັດຕັ້ງຝຶກອົບຮົມ ທິດສະດີິການເມືອງ-ການປົກຄອງ ໄລຍະສັ້ນ 45 ວັນ ຊຸດທີ II

ປະຕິບັດຕາມແຜນການບຳລຸງ-ກໍ່ສ້າງພະນັກງານ ປະຈໍາປີ 2018 ຄະນະຈັດຕັ້ງສູນກາງພັກໄດ້ຈັດຕັ້ງການຝຶກອົບຮົມທິດສະດີການເມືອງ-ການປົກຄອງ ໃຫ້ສະມາຊິກພັກ-ພະນັກງານພາຍໃນຂອງຕົນ ໂດຍການສົມທົບກັບ ສະຖາບັນການເມືອງ ແລະ ການປົກຄອງແຫ່ງຊາດ ໃນການສະໜອງຫຼັກສູດການຮຽນ-ການສອນ ລວມທັງວິທະຍາກອນ.

 

ການຝຶກອົບຮົມໄດ້ໄຂຂຶ້ນໃນວັນທີ 22 ຕຸລາ ຈົນເຖິງວັນທີ 21 ທັນວາ ຈຶ່ງໄດ້ຈັດຕັ້ງການສະຫຼຸບການຈັດຕັ້ງປະຕິບັດ. ໃຫ້ກຽດເຂົ້າຮ່ວມເປັນປະທານຂອງທ່ານ ນ. ວິໄລວັນ ເພັງສະຫວັດ ຄະນະບໍລິຫານງານພັກ, ຫົວໜ້າກົມກໍ່ສ້າງພະນັກງານ, ຄະນະຈັດຕັ້ງສູນກາງພັກ ແລະທ່ານ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ.

     ທ່ານ ນ. ແກ້ວຕາ ພັນດານຸວົງ ຮອງຫົວໜ້າກົມຈັດຕັ້ງ-ພະນັກງານ ໄດ້ຜ່ານບົດລາຍງານການຝຶກອົບຮົມຊຸດທີ II ເຊິ່ງລວມມີສຳມະນາກອນຈໍານວນ 33 ສະຫາຍ, ຍິງ 15 ສະຫາຍ; ເປັນສະມາຊິກພັກສົມບູນ ແລະ ສໍາຮອງ ທີ່ເປັນຫຼັກ ແຫຼ່ງ, ມີຕໍາແໜ່ງບໍລິຫານປະເພດ 5 ຈໍານວນ 5 ສະຫາຍ, ຍິງ 2 ສະຫາຍ ແລະວິຊາການ 28 ສະຫາຍ, ຍິງ 13 ສະຫາຍ. ເຊິ່ງຜ່ານການຈັດຕັ້ງຝຶກອົບຮົມ ແລະການຄົ້ນຄວ້າຮ່ຳຮຽນເຫັນວ່າ: ຄູ-ອາຈານແຕ່ລະທ່ານໄດ້ເອົາໃຈໃສ່ກະກຽມເນື້ອໃນບົດຮຽນ ແລະ ໄດ້ຖ່າຍທອດບົດຮຽນຄຽງຄູ່ກັບພຶດຕິກໍາຕົວຈິງ ເຮັດໃຫ້ສຳມະນາກອນໄດ້ຮັບຮູ້ເຂົ້າໃຈແຈ້ງ; ມີເອກະສານປະກອບການບັນຍາຍທີ່ຄົບຖ້ວນພຽງພໍ, ສະໜອງໃຫ້ສຳມະນາກອນ ເພື່ອຄົ້ນຄ້ວາ; ນອກຈາກການຮຽນໃນຫ້ອງຍັງມີການຈັດຕັ້ງໄປທັດສະນະແລກປ່ຽນຕາມສະຖານທີ່ຕ່າງໆ ເພື່ອສົມທຽບກັບທິດສະດີທີ່ໄດ້ຮຽນມາ ຕື່ມອີກ.

     ທາງດ້ານສຳມະນາກອນສ່ວນຫຼາຍໄດ້ເອົາໃຈໃສ່ປະຕິ ບັດໂມງເວລາຂຶ້ນຫ້ອງຢ່າງເຂັ້ມງວດ, ຕັ້ງໃຈຮັບຟັງການບັນລະຍາຍ ພ້ອມທັງປະກອບຄໍາຄິດຄໍາເຫັນເພື່ອແລກປ່ຽນບົດ ຮຽນ ກັບຄູ-ອາຈານ ແລະຄົ້ນຄວ້າເອກະສານດ້ວຍຕົນເອງຢ່າງສຸດກົກສຸດປາຍ. ໃນຊ່ວງການຝຶກອົບຮົມສໍາມະນາກອນ ໄດ້ແບ່ງເວລາສ້າງຂະບວນການເຊັ່ນ: ຈັດຕັ້ງການແຂ່ງຂັນກິລາມິດຕະພາບລະຫວ່າງຄູອາຈານກັບສໍາມະນາກອນ ແລະ ລະຫວ່າງສໍາມະນາກອນດ້ວຍກັນ; ຈັດຕັ້ງການອະນາໄມຖາງຫຍ້າບໍລິເວນຕຶກອາຄານຮຽນ ເພື່ອເຮັດໃຫ້ຮ່າງກາຍແຂງແຮງ, ຈິດໃຈເບີກບານທັງເປັນການເພີ່ມທະວີຮັດແໜ້ນຄວາມສາ ມັກຄີ.ຕະຫຼອດໄລຍະຂອງການຝຶກອົບຮົມ, ຄະນະຮັບຜິດຊອບກໍ່ໄດ້ເອົາໃຈໃສ່ອໍານວຍຄວາມສະດວກ ໃຫ້ຊຸດຮຽນດໍາເນີນໄປຕາມແຜນການທີ່ວາງໄວ້. ເຊິ່ງຜົນການປະເມີນສໍາມະນາກອນແມ່ນ ຮັບຮູ້ລະດັບດີຫຼາຍມີ 85%, ຮັບຮູ້ລະດັບກາງມີ 15% ແລະ ເພື່ອເປັນການຢັ້ງຢືນຜົນສໍາເລັດດັ່ງກ່າວ ທ່ານ ຮສ ພູວົງ ອຸ່ນຄໍາແສນ ໄດ້ຂຶ້ນມອບໃບຢັ້ງຢືນຝຶກອົບຮົມທິດສະດີິການເມືອງ-ການປົກຄອງໃຫ້ແກ່ສຳມະນາກອນທັງໝົດ.

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ