ສະຖາບັນການເມືອງ ແລະ ການປົກຄອງແຫ່ງຊາດ ຮັບຟັງປາຖະກະຖາ ລະນຶກເຖິງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ

ພະນັກງານ ແລະນັກສຶກສາທົ່ວສະຖາບັນການເມືອງ ແລະ ການປົກຄອງແຫ່ງຊາດ ໄດ້ຮັບຟັງການປາຖະກະຖາ ລະນຶກວັນສ້າງຕັ້ງກອງທັບປະຊາຊົນລາວ 70 ປີ (20ມັງກອນ1949-20 ມັງກອນ 2019) ໃນຕອນເຊົ້າຂອງວັນທີ 21 ທັນວາ 2018 ຢູ່ທີ່ສະໂມສອນໃຫຍ່ ສມປຊ ໃຫ້ກຽດບັນລະຍາຍໂດຍ ທ່ານ ພົຈວ ວົງສັກ ພັນທະວົງ ກຳມະການ ຄະນະພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ພະລາທິການກອງທັບ.

 

ໃນພິທີບັນດາຜູ້ເຂົ້າຮ່ວມໄດ້ຮັບຮູ້ເຖິງປະຫວັດຄວາມເປັນມາຂອງວັນສ້າງຕັ້ງກອງທັບປະຊາຊົນລາວ ແລະການເຄື່ອນໄຫວສູ້ຮົບໃນແຕ່ລະໄລຍະ ເຊິ່ງລວມມີ 4 ເນື້ອໃນຕົ້ນຕໍຄື: 1). ການກຳເນີດຂອງກອງທັບປະຊາຊົນລາວ; 2). ຜົນງານ, ໄຊຊະນະ ແລະ ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວຕະຫຼອດໄລຍະ 70 ປີ; 3). ທາດແທ້ ແລະ ມູນເຊື້ອສະຫງ່າອົງອາດຂອງກອງທັບປະຊາຊົນລາວ; 4). ສືບຕໍ່ເສີມຂະຫຍາຍມູນເຊື້ອສະຫງ່າອົງອາດ ຂອງກອງທັບປະຊາຊົນລາວ ຄວນຈັດຕັ້ງປະຕິບັດຫຍັງແດ່?. ທັງ 04 ເນື້ອໃນລ້ວນແຕ່ສ່ອງແສງໃຫ້ເຫັນມູນເຊື້ອ, ຈິດໃຈຮັກຊາດ, ຮັກລະບອບປະຊາທິປະໄຕປະຊາຊົນ, ສ້າງຄວາມສາມັກຄີໃຫ້ເປັນປຶກແຜ່ນ, ສ້າງສະຕິເປັນເຈົ້າຕົນເອງຂອງ ກອງທັບປະຊາຊົນລາວ ແລະ ວັນດັ່ງກ່າວ ແມ່ນເຫດການປະຫວັດສາດໜຶ່ງທີ່ສຳຄັນ, ແມ່ນບາດກ້າວແຫ່ງການຂະຫຍາຍຕົວຂອງການປະຕິວັດເວົ້າລວມ, ເວົ້າສະເພາະແມ່ນການເຕີບໃຫຍ່ເຂັ້ມແຂງຂອງກຳລັງປະກອບອາວຸດ.

ຕະຫຼອດການຕໍ່ສູ້, ອັນທີ່ພົ້ນເດັ່ນແມ່ນກອງທັບປະຊາຊົນລາວເຮົາ ໄດ້ປະເຊີນໜ້າໂດຍກົງກັບສັດຕູທີ່ມີກຳລັງແຮງ ເໜືອກວ່າຕັ້ງຫຼາຍທົບທາງດ້ານເສດຖະກິດ, ກຳລັງພົນ ແລະ ອາວຸດຍຸດໂທປະກອນ, ແຕ່ດ້ວຍການເສີມຂະຫຍາຍນໍ້າໃຈຮັກຊາດອັນສູງສົ່ງ, ມູນເຊື້ອຕໍ່ສູ້ບໍ່ຍອມຈຳນົນຂອງບັນພະບູລຸດ ແລະ ປະຊາຊົນເຮົາ, ຜ່ານການຝຶກຝົນທົດສອບໃນແປວໄຟແຫ່ງການຕໍ່ສູ້ກູ້ຊາດໃນເງື່ອນໄຂທີ່ຫຍຸ້ງຍາກລຳບາກທີ່ສຸດນັ້ນ ກອງທັບເຮົາໄດ້ສ້າງວິລະກຳອັນລໍ້າເລີດຈາລຶກໄວ້ ໃນໜ້າປະຫວັດສາດຂອງກອງທັບ ແລະ ຂອງຊາດລາວເຮົາ.

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ