ນັກສຶກສາປະລິນຍາຕີ ຮຸ່ນທີ XXI ສາຂາຄຸ້ມຄອງເສດຖະກິດ ທັດສະນະສຶກສາສວນປູກພືດປອດສານພິດ

 

         ວັນທີ 25 ມັງກອນ 2019 ນັກສຶກສາປະລິນຍາຕີ ຮຸ່ນທີ XXI ສາຂາຄຸ້ມຄອງເສດຖະກິດ ຈໍານວນ 27 ຄົນ, ຍິງ 2 ຄົນ. ໄດ້ເດີນທາງໄປທັດສະນະສຶກສາສວນປູກພືດປອດສານພິດ ທີ່ບ້ານນາແກ່ວ ເມືອງທຸລະຄົມແຂວງວຽງຈັນ, ນຳພາຄະນະໂດຍ ທ່ານ ນ. ສຸລິໄຊ ບຸດດາຮ່າວ ເຊິ່ງເປັນອາຈານປະຈຳຫ້ອງນັກສຶກສາຮຸ່ນດັ່ງກ່າວ.

        ບັນດາຜູ້ເຂົ້າຮ່ວມໃນການໄປທັດສະນະໃນຄັ້ງນີ້ ກໍໄດ້ຮັບຟັງການບັນຍາຍຈາກທ່ານ ຫັດສະດີ  ດວງບຸບຜາ ເຈົ້າຂອງສວນຜັກປອດສານພິດ ກ່ຽວກັບຂັ້ນຕອນຂອງການເຮັດທຸລະກິດດັ່ງກ່າວ ນັບຕັ້ງແຕ່ການກະກຽມດິນ, ໂຮງເຮືອນທີ່ຈະໃຊ້ປູກ, ການຊອກຝຸ່ນຊີວະພາບ, ຂັ້ນຕອນການທົດລອງປູກພືດແຕ່ລະຊະນິດ, ຂັ້ນຕອນຂອງການບົວລະບັດຮັກສາ, ການນຳຜະລິດຕະພັນ ທີ່ປູກໄດ້ເຂົ້າໄປກວດຫາສານເຄມີ ເພື່ອໃຫ້ແນ່ໃຈວ່າຜັກທີ່ປູກໄດ້ເປັນຜັກທີ່ປອດສານພິດທີ່ແທ້ຈິງ, ວຽກງານການຕະຫຼາດຈຳໜ່າຍ ລວມເຖິງຂັ້ນຕອນການເບີກຈ່າຍຄ່າແຮງງານໃຫ້ກັບພະນັກງານ ແລະອື່ນໆ.

      ການໄປທັດສະນະໃນຄັ້ງນີ້ ນອກຈາກຈະໄດ້ຄວາມຮູ້ທາງດ້ານ ແບບແຜນວິທີການເຮັດທຸລະກິດແລ້ວນັ້ນ ຍັງເຮັດໃຫ້ທຸກຄົນໄດ້ຮັບຮູ້ເຖິງວິທີການປູກຜັກປອດສານພິດ ທີ່ທຸກຄົນສາມາດຮຽນຮູ້ ແລະ ນຳເອົາບົດຮຽນດ່ັງກ່າວ ໄປໝູນໃຊ້ເຂົ້າໃນຊີວິດປະຈຳວັນໄດ້ ແລະ ໃນຕອນທ້າຍຂອງການທັດສະນະ ທ່ານ ຫັດສະດີ ດວງບຸບຜາ ຍັງໄດ້ກ່າວຕື່ມວ່າ: ການທີ່ຄິດຈະເຮັດສວນຜັກປອດສານພິດ ແມ່ນຕ້ອງເປັນຄົນທີ່ເຮັດດ້ວຍໃຈມັກ, ເປັນເສດຖະກິດພໍພຽງ ຕົ້ນທຶນສູງແຕ່ຜົນກຳໄລຕ່ຳ ແຕ່ສິ່ງທີ່ໄດ້ຈາກການເຮັດທຸລະກິດນີ້ແມ່ນມີຄວາມສຸກທີ່ໄດ້ເຮັດ,  ມີຄວາມສຸກທີ່ໄດ້ແບ່ງປັນລາຍຮັບເລັກໆນ້ອຍໆ ໃຫ້ແກ່ປະຊາຊົນທີ່ຢູ່ອ້ອມຂ້າງ ຈາກການຮັບຊື້ຝຸ່ນຊີວະພາບ ແລະການໃຊ້ແຮງງານໃນການກໍ່ສ້າງ; ໃນຕໍ່ໜ້າມີແຜນສືບຕໍ່ປູກຜັກແຕ່ລະປະເພດ,​ ມີແຜນຈະລ້ຽງປາ, ລ້ຽງກົບ, ລ້ຽງໄກ່, ຕົ້ມເຫຼົ້າ,​ ຕົ້ມວາຍດ້ວຍມື. ຫຼັງຈາກໄດ້ຮັບການຟັງບັນຍາຍແລ້ວ ນັກສຶກສາກໍໄດ້ເຂົ້າທ່ຽວຊົມສວນຜັກປອດສານພິດຊະນິດຕ່າງໆພາຍໃນສວນຕື່ມອີກ.

ບັນນາທິການ: ທ່ານ ປທ ອາພອນ ຂາວພັນ

ຂ່າວ/ພາບ: ນ ດອກໄມ້ ຈັນດາລາ