ພະແນກແຜນການ-ການເງິນ ສະຫຼຸບການຈັດຕັ້ງງົບປະມານ ແຫ່ງລັດ ປີ 2018 ແລະ ທິດທາງແຜນການ 2019 ຂອງ ສມປຊ

ເພື່ອເຮັດໃຫ້ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2018 ໃຫ້ບັນລຸຜົນສໍາເລັດຕາມແຜນການ ແລະຮັບປະກັນການໃຊ້ຈ່າຍງົບປະມານຂອງລັດໃຫ້ຖືກກັບເປົ້າໝາຍ ແລະ ຖືກຕ້ອງຕາມລະບຽບຫຼັກການການເງິນວາງອອກ, ດັ່ງນັ້ນມາໃນຕອນເຊົ້າຂອງວັນທີ 29 ມັງກອນ ພະແນກແຜນການ-ການເງິນ ສມປຊ ໄດ້ຈັດຕັ້ງກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານ 2018 ຂຶ້ນ ພາຍໃຕ້ການເປັນປະທານຂອງ ທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊເຂົ້າຮ່ວມໃນກອງປະຊຸມຄັ້ງນີ້ມີທ່ານຫົວໜ້າຫ້ອງການ, ຂັ້ນກົມຄະນະວິຊາ ແລະ ສູນຂໍ້ມູນຂ່າວສານ ການເມືອງ-ການປົກຄອງ.

 

ໃນທີ່ປະຊຸມ ທ່ານ ນ. ອານົງ ສີໂພນໄຊ ຫົວໜ້າພະແນກແຜນການ-ການເງິນ ໄດ້ຂຶ້ນກ່າວບົດສະຫຼຸບສະພາບການຈັດຕັ້ງປະຕິບັດແຜນງົບປະມານແຫ່ງລັດສົກປີ 2018 ແລະ ທິດທາງແຜນການ ສົກປີ 2019 ເຊິ່ງເນື້ອໃນບົດສະຫຼຸບດັ່ງກ່າວ ໄດ້ຍົກໃຫ້ເຫັນການປະຕິບັດລາຍຮັບ ແລະລາຍຈ່າຍ ໃນປີ 2018, ໂດຍທ່ານໃຫ້ຮູ້ວ່າໃນສົກປີຜ່ານມາທາງພະແນກການເງິນ ໄດ້ເປັນເຈົ້າການໃນການພົວພັນປະສານງານ, ສູ້ຊົນຍາດແຍ່ງຕົວເລກງົບປະມານການລົງທຶນຂອງລັດ ປີ 2018 ທີ່ສະພາແຫ່ງຊາດໄດ້ຮັບຮອງ ແລະ ກະຊວງແຜນການ ແລະ ການລົງທຶນ ອະນຸມັດທັງໝົດ 11.789.470.000 ກີບເຊິ່ງຈຳນວນເງິນດັ່ງກ່າວໄດ້ຈັດສັນເຂົ້າໃນການຊຳລະໃຫ້ແກ່ບັນດາໂຄງການສືບຕໍ່ ແລະ ໂຄງການສະເໜີໃໝ່ ຈຳນວນ 17 ໂຄງການ, ໃນນັ້ນໂຄງການສຶບຕໍ່ 11 ໂຄງການ ແລະ ໂຄງການສະເໜີໃໝ່ 6 ໂຄງການ, ສາມາດຈັດຕັ້ງປະຕິບັດສໍາເລັດ 100% ແລະໄດ້ສືບຕໍ່ປະສານພົວພັນກັບກະຊວງການເງິນ ກ່ຽວກັບການນຳໃຊ້ຮ່ວງງົບປະມານແຫ່ງລັດເຂົ້າໃນການພັດທະນາຫຼັກສູດການຮຽນ-ການສອນ, ການຄົ້ນຄວ້າວິທະຍາສາດ ແລະວຽກງານອື່ນໆ ຂອງສະຖາບັນເຊິ່ງສາມາດດຳເນີນການເຄື່ອນໄຫວໄດ້ຢ່າງເປັນປົກກະຕິສາມາດປະຕິບັດລາຍຈ່າຍ ທີ່ເປັນບູລິມະສິດເຊັ່ນ: ເງິນເດືອນ, ເງິນອຸດໜູນຕ່າງໆ ໃຫ້ແກ່ພະນັກງານຄູ-ອາຈານ, ພະນັກງານບໍານານ, ເງິນເບ້ຍລ້ຽງນັກສຶກສາ, ພ້ອມນີ້ ຍັງສະໜອງລາຍຈ່າຍຮັບໃຊ້ວຽກງານບໍລິຫານ-ວິຊາການ ໄດ້ຢ່າງເປັນປົກກະຕິ.ຄຽງຄູ່ກັນນັ້ນ ບົດລາຍງານຍັງໄດ້ຊີ້ໃຫ້ເຫັນດ້ານທີ່ເປັນບັນຫາຂໍ້ຄົງຄ້າງທີ່ພະແນກການເງິນ ສມປຊ ຈະຕ້ອງໄດ້ພ້ອມກັນປັບປຸງແກ້ໄຂໃຫ້ດີຂຶ້ນກວ່າເກົ່າ. ພ້ອມທັງສະເໜີແຜນການການເຄື່ອນໄຫວຽກງານການເງິນໃນຕໍ່ໜ້າຕື່ມອີກ ໂດຍສະເພາະແມ່ນແຜນການເຄື່ອນໄຫວງົບປະມານປະຈຳປີ 2019 ຂອງ ສມປຊ.

ນອກຈາກນັ້ນແລ້ວ, ໃນທີ່ປະຊຸມຍັງໄດ້ເຜີຍແຜ່ເຊື່ອມຊຶມເອກະສານນິຕິກຳ ຂອງກະຊວງການເງິນ ເພື່ອເປັນແນວທາງໃຫ້ພາກສ່ວນທີ່ກ່ຽວຂ້ອງຕ່າງໆພາຍໃນ ສມປຊ ຄວນໄດ້ກຳແໜ້ນໃນການສ້າງແຜນການ ແລະ ການນຳໃຊ້ງົບປະມານຂອງລັດ ໃຫ້ມີຄວາມເປັນເອກະພາບກັນໃນການຈັດຕັ້ງປະຕິບັດ ແລະ ມີໝາກຜົນດີ.

ບັນນາທິການໂດຍ: ທ່ານ ປທ ນ. ອາພອນ ຂາວພັນ

 

ຂ່າວ/ພາບ: ທ່ານ ຕາອັອດ ແສນທະວີສຸກ