ກອງປະຊຸມເຊື່ອມຊຶມມະຕິກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 7 ສະໄຫມທີ X

ໃນວັນທີ 30 ມັງກອນ 2019 ຢູ່ທີ່ ສະໂມສອນ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດກອງປະຊຸມເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ຂອງ ສມປຊ, ໂດຍການເປັນປະທານຂອງ ທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ສະມາຊິກສະພາແຫ່ງຊາດ ຊຸດທີ 8, ເລຂາຄະນະບໍລິຫານງານພັກ, ມີບັນດາພະນັກງານ, ຄູ-ອາຈານ, ຄະນະກົມ, ຫ້ອງການ, ຄະນະວິຊາ, ສູນຂໍ້ມູນຂ່າວສານ ການເມືອງ-ການປົກຄອງ ແລະ ນັກສຶກສາທຸກຮຸ່ນທຸກລະບົບ.

 

ຈຸດປະສົງຂອງການຈັດຕັ້ງກອງປະຊຸມເຊື່ອມຊຶມເອກະສານໃນຄັ້ງນີ້ ກໍເພື່ອເຜີຍແຜ່ ກ່ຽວກັບການຈັດຕັ້ງແຜນເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ໃຫ້ບັນລຸຕາມຈຸດປະສົງ, ຄາດໝາຍທີ່ວາງໄວ້, ທັງເປັນການຜັນຂະຫຍາຍ ເນື້ອໃນມະຕິກອງປະຊຸມ ຄົບຄະນະບໍລິຫານງານສູນກາງພັກຄັ້ງທີ 7 ສະໄໝທີ x ໃຫ້ມີຄວາມ ໝາຍຄວາມສຳຄັນ, ມີເນື້ອໃນເລິກເຊິ່ງ ແລະ ໄດ້ຮັບການເຜີຍແຜ່ຢ່າງກວ້າງຂວາງທົ່ວເຖິງທຸກເປົ້າໝາຍ. ເຊິ່ງເນື້ອໃນ ປະທານກອງປະຊຸມທີ່ປະທານໄດ້ນຳມາເຜີຍແຜ່ມີ 2 ມະຕິ ທີ່ສຳຄັນ ຄື: ມະຕິວ່າດ້ວຍເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ ແລະ ມະຕິວ່າດ້ວຍການປັບ ປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ.

ເຊິ່ງທັງ 2 ມະຕິດັ່ງກ່າວ ລ້ວນແລ້ວເພື່ອແນໃສ່ເຮັດໃຫ້ຄະນະພັກ-ຄະນະນຳ, ສະມາຊິກພັກ ກໍຄືພະນັກງານ-ຄູູ-ອາຈານ ແລະ ນັກສຶກສາ ພາຍໃນ ສມປຊ ໄດ້ຮັບຮູ້ເຂົ້າໃຈ, ກຳແໜ້ນ, ເຊື່ອມຊຶມ ແລະ ເປັນເອກະພາບສູງ ຕໍ່ບັນດາເນື້ອໃນທີ່ສຳຄັນ ຂອງມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານ ສູນກາງພັກສະໄໝທີ X ເພື່ອຫັນ​ເອົາມະຕິດັ່ງກ່າວ ເປັນທິດທາງ ແລະ ເປັນແຜນປະຕິບັດງານລະອຽດ, ຍົກສູງຄວາມເປັນເຈົ້າການນຳພາຈັດຕັ້ງຜັນຂະຫຍາຍ ແລະ ຊຸກຍູ້ຂະບວນການຮອບດ້ານໃຫ້ຟົດຟື້ນ, ແຂງແຮງ, ຕໍ່ເນື່ອງ ແລະ ເຂົ້າສູ່ລວງເລິກ. 

ບັນນາທິການ: ທ່ານ ປທ ນ. ອາພອນ ຂາວພັນ

 

ຂ່າວ/ພາບ: ທ່ານ ຕາອັອດ ແສນທະວີສຸກ