ສະຫະພັນແມ່ຍິງ ສະຖາບັນການເມືອງ ແລະ ການປົກຄອງແຫ່ງຊາດ ສະເຫຼີມສະຫຼອງວັນທີ 8 ມີນາ ຄົບຮອບ 109 ປີ

ໃນວັນທີ 6 ມີນາ ທ່ານ ສຈ ປອ ບຸນທີ ເຄືອມີໄຊ ຄະນະບໍລິຫານງານພັກ, ຫົວໜ້າກົມຄຸ້ມຄອງການຄົ້ນຄວ້າວິທະຍາສາດ, ຜູ້ຊີ້ນຳວຽກງານອົງການຈັດຕັ້ງມະຫາຊົນ ໄດ້ໃຫ້ກຽດເປັນປະທານໃນພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 109 ປີ (8.3.1910-8.3.2019) ພ້ອມດ້ວຍ ທ່ານ ປທ ນ. ພອນໄຊ ລາດຊະວົງ ຄະນະບໍລິຫານງານ ສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງ ສມປຊ ພ້ອມດ້ວຍຄະນະ ເພື່ອເປັນການຫວນຄືນມູນເຊື້ອວັນແມ່ຍິງສາກົນ (International Women's Day) ກົງກັບວັນທີ 8 ມີນາ, ພ້ອມທັງ ຜ່ານຜົນງານການເຄື່ອນໄຫວວຽກງານຮອບດ້ານປີ 2018 ແລະ ທິດທາງແຜນການ, ບັນດາຜູ້ເຂົ້າຮ່ວມມີສະມາຊິກແມ່ຍິງພາຍໃນໜ່ວຍຮາກຖານຂອງ ພະນັກງານ, ຄູ, ອາຈານ, ແມ່ຍິງໜ່ວຍຮາກຖານ ນັກສຶກສາ ແລະ ແມ່ຍິງໜ່ວຍເສດຖະກິດຄອບຄົວ ເຂົ້າຮ່ວມ 200 ກວ່າທ່ານ.

 

ໃນພິທີ ທ່ານ ສຈ ປອ ບຸນທີ ເຄືອມີໄຊ ໄດ້ເຫຼົ່າຫວນຄືນປະຫວັດຄວາມເປັນມາຂອງວັນແມ່ຍິງວ່າ: ວັນແມ່ຍິງສາກົນ ແມ່ນເຫດການໜຶ່ງທີ່ເກີດຂຶ້ນໃນທ່າມກາງສະພາບເສດຖະກິດຂອງພວກສັກດີນາ ແລະ ນາຍທຶນມີການຂະຫຍາຍຕົວ. ເມື່ອໂຮງງານອຸດສາຫະກໍາຂອງນາຍທຶນຂະຫຍາຍຕົວ ກໍໄດ້ສ້າງຄວາມຮັ່ງມີໃຫ້ແກ່ພວກນາຍທຶນ, ແຕ່ຊໍ້າພັດຍິ່ງເພີ່ມຄວາມທຸກຍາກ ແລະ ລຳບາກໃຫ້ແກ່ຊາວຜູ້ອອກແຮງງານ ໂດຍສະເພາະກຳມະກອນ ທີ່ເປັນແມ່ຍິງຢູ່ພາຍໃຕ້ລະບອບສັກດີນາ ແລະ ນາຍທຶນ; ເຊິ່ງແມ່ຍິງໄດ້ຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງ, ແຕ່ພັດໄດ້ຮັບຄ່າຈ້າງຖືກ, ເຮັດວຽກແບບບໍ່ມີການຮັບປະກັນ, ບໍ່ມີການຮັກສາສຸຂະພາບຂອງແມ່ຍິງ ແລະ ເດັກນ້ອຍ. ນອກຈາກນີ້, ແມ່ຍິງຍັງຖືກດູຖູກ, ໝິ່ນປະໝາດ, ຖືເປັນສິນຄ້າ, ເປັນເຄື່ອງຫຼິ້ນ, ຖືກຂົ່ມຂືນກະທຳຊຳເລົາ ແລະ ຖືກໄລ່ອອກຈາກວຽກ. ເວລາຖືພາ, ເວລາເກີດລູກ ຫຼື ເຈັບເປັນ, ໂດຍທີ່ເຂົາເຈົ້າບໍ່ໄດ້ຮັບການປິ່ນປົວ.

ເມື່ອເປັນແນວນັ້ນ, ບັນດາແມ່ຍິງໃນໂຮງງານຕໍ່າແຜ່ນ ແລະ ຕັດຫຍິບ ຢູ່ເມືອງ ນິວຢອກ, ສະຫະລັດອາເມລິກາ ຈຶ່ງໄດ້ຈັດຕັ້ງການໂຮມຊຸມນຸມປະທ້ວງ ເພື່ອທວງເອົາສິດຂອງຕົນ. ຈົນມາຮອດກາງເດືອນກຸມພາ 1909, ແມ່ຍິງ ອາເມລິກາ ໄດ້ຈັດພິທີສະເຫຼີມສະຫຼອງວັນແມ່ຍິງເປັນປີທຳອິດ. ເມື່ອເຖິງປີ 1910, ຂະບວນການຕໍ່ສູ້ຂອງ ແມ່ຍິງ ໄດ້ແຜ່ຂະຫຍາຍກວ້າງອອກໄປສູ່ປະເທດນາຍທຶນ. ໃນປີດຽວກັນ, ກອງປະຊຸມສາກົນກ່ຽວກັບບັນຫາຂອງແມ່ຍິງຄັ້ງທຳອິດໄດ້ຈັດຂຶ້ນຢູ່ ໂກເປນຮາກ, ນະຄອນຫຼວງຂອງປະເທດເດນມາກ (Copenhagen, Denmark). ກອງປະຊຸມໄດ້ຮັບຮອງ ແລະ ຕົກລົງເອົາວັນທີ 8 ມີນາ ຂອງທຸກໆປີ ເປັນວັນແມ່ຍິງສາກົນ ຖືເປັນເຫດການ-ການເມືອງສຳຄັນ, ເປັນຂີດໝາຍແຫ່ງໄຊຊະນະອັນເປັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທຳໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ ແລະ ເປັນວັນລະນຶກເຖິງການຕໍ່ສູ້ຂອງແມ່ຍິງ, ເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ,ປະຊາທິປະໄຕ ຄືກັບຜູ້ຊາຍ ແລະ ຫຼຸດເວລາການເຮັດວຽກໃຫ້ເຫຼືອມື້ລະ 8 ຊົ່ວໂມງ, ພ້ອມທັງໄດ້ຮັບການປົກປ້ອງທຸກຮູບການ. ນັບແຕ່ມື້ນັ້ນມາຈຶ່ງຖືເອົາວັນທີ 8 ມີນາ ເປັນວັນແມ່ຍິງສາກົນ.

 ພ້ອມກັນນັ້ນ, ໃນພິທີ ຍັງໄດ້ຮັບຟັງບົດສະຫຼຸບລາຍງານວຽກງານຮອບດ້ານ ປີ 2018 ຈາກ ທ່ານ ປທ ນ ພອນໄຊ ລາດຊະວົງ ເຊິ່ງທ່ານໄດ້ຍົກໃຫ້ເຫັນເຖິງຜົນສຳເລັດ ໃນ 1 ປີຜ່ານມາ ທີ່ ສະຫະພັນແມ່ຍິງ ສມປຊ ສາມາດຍາດມາໄດ້ຫຼາຍດ້ານເປັນຕົ້ນເອື້ອຍນ້ອງແມ່ຍິງທີ່ເປັນຄູ-ອາຈານ ທີ່ໄດ້ປະກອບສ່ວນໃນການຂຶ້ນຫ້ອງສິດສອນ, ການໄປທັດສະນະຢ້ຽມຢາມ ແລະ ແລກປ່ຽນບົດຮຽນພາຍໃນ ແລະ ຕ່າງປະເທດ, ເຂົ້າຮ່ວມເຊື່ອມຊຶມແນວທາງ ແລະ ບັນດານິຕິກຳທີ່ສຳຄັນຂອງພັກ-ລັດ, ຂອງສະຖາບັນ ແລະ ອົງການຈັດຕັ້ງອື່ນໆ, ເຂົ້າຮ່ວມຝຶກອົບຮົມໃນການເປັນພະນັກງານນຳພາ-ຄຸ້ມຄອງ ແລະ ເຂົ້າຮ່ວມສະເຫຼີມສະເຫຼີມສະຫຼອງວຽກງານຂອງ 3 ອົງການຈັດຕັ້ງມະຫາຊົນ ແລະ ໃນບົດສະຫຼຸບຍັງໄດ້ຍົກໃຫ້ເຫັນການເຄື່ອນໄຫວຂອງສະຫະພັນແມ່ຍິງລາວຕໍ່ຂະບວນການລວມຂອງ ສມປຊ. ເຊິ່ງທຸກຜົນສໍາເລັດທີ່ຍາດມາໄດ້ນັ້ນ ກໍ່ຍ້ອນໄດ້ຮັບຄວາມເອົາໃຈໃສ່ໃນການຊີ້ນຳ ແລະ ນຳພາຂອງຄະນະພັກ, ຄະນະນໍາ ສມປຊ ເວົ້າລວມ, ເວົ້າສະເພາະກໍຄືສະຫະພັນແມ່ຍິງ ສມປຊ ຈຶ່ງເຮັດໃຫ້ການເຄື່ອນໄຫວວຽກງານມີບາດກ້າວຂະຫຍາຍຕົວໃໝ່ດີຂຶ້ນເລື້ອຍໆ.

ໂອກາດດຽວກັນນີ້, ທ່ານ ປທ ນ. ອານົງ ຂັນທະຍົງ ຮອງປະທານ ສະຫະພັນແມ່ຍິງ ສມປຊ ໄດ້ຜ່ານບົດສະຫຼຸບການເຄື່ອນໄຫວ ເນື້ອໃນຂໍ້ແຂ່ງຂັນແມ່ຍິງ 3 ດີ ສາມາດເລືອກໄດ້ບຸກຄົນ 3 ດີຄື: ສະມາຊິກແມ່ຍິງທັງໝົດ 235 ທ່ານ, ໃນນັ້ນໄດ້ຮັບຄັດເລືອກເປັນແມ່ຍິງ 3 ດີ ປະເພດ 1 ມີ 111 ທ່ານ ເຊິ່ງໃຫ້ກຽດຂຶ້ນມອບໃບຍ້ອງຍໍ ໂດຍທ່ານ ສຈ ປອ ບຸນທີ ເຄືອມີໄຊ, ແລະ ຮັບຄັດເລືອກເປັນແມ່ຍິງ 3 ດີ ປະເພດ 2 ມີ 69 ທ່ານເຊິ່ງໃຫ້ກຽດຂຶ້ນມອບໃບຍ້ອງຍໍໂດຍ ທ່ານ ປທ ນ. ພອນໄຊ ລາດຊະວົງ, ສາມາດເລືອກເປັນໜ່ວຍແມ່ຍິງ 3 ດີ ໄດ້ທັງໝົດ 10 ໜ່ວຍ. ນອກຈາກນີ້ ເພື່ອເປັນການຕ້ອນຮັບວັນສຳຄັນດັ່ງກ່າວ ຍັງມີການສ້າງຂະບວນການແຂ່ງຂັນການເຕັ້ນແອໂຣບິກ ເປັນຄັ້ງທຳອິດ ທີ່ໄດ້ມີການຊ້ອມເຕັ້ນມາເປັນເວລາເກືອບ 1 ເດືອນ ເຊິ່ງຂະບວນການດັ່ງກ່າວແມ່ນເປັນການເປີດໂອກາດໃຫ້ບັນດາແມ່ຍິງໜ່ວຍຮາກຖານຕ່າງໆພາຍໃນ ສມປຊ ໄດ້ມີການແຂ່ງຂັນກັນ ເຊິ່ງຜົນຂອງການແຂ່ງຂັນການເຕັ້ນແອໂຣບິກ ເພື່ອສຸຂະພາບ ຕະຫຼອດເວລາ 3 ມື້ນັ້ນ ມີດັ່ງນີ້:

- ທີມທີ່ຊະນະເລີດ ລາງວັນທີ 1 ແມ່ນໜ່ວຍຮາກຖານແມ່ຍິງວິຊາການ 2.

- ທີມທີ່ຊະນະເລີດ ລາງວັນທີ 2 ແມ່ນໜ່ວຍຮາກຖານແມ່ຍິງລະບົບປະລິນຍາໂທ ຮຸ່ນທີ 14.

- ທີມທີ່ຊະນະເລີດ ລາງວັນທີ 3 ແມ່ນໜ່ວຍຮາກຖານແມ່ຍິງວິຊາການ 1.

- ລາງວັນຊົມເຊີຍ ແມ່ນໜ່ວຍຮາກຖານແມ່ຍິງລະບົບປະລິນຍາຕີ ຮຸ່ນທີ່ 23.

ບັນນາທິການ: ທ່ານ ປທ ນ. ອາພອນ ຂາວພັນ 

ຂ່າວ/ພາບ: ທ່ານ ຕາອັອດ ແສນທະວີສຸກ