ຊາວໜຸ່ມ ສມປຊ ແລະນັກສຶກສາ ເຂົ້າຟັງການເຜີຍແຜ່ ສະພາບການລະບາດຂອງເຮສໄອວີ/ພະຍາດເອດ ເນື່ອງໃນວັນຕ້ານເອດສາກົນ

   ເພື່ອເປັນການຕ້ານ ແລະສະກັດກັ້ນການແຜ່ລະບາດຂອງເຊື້ອເຮສໄອວີ/ພະຍາດເອດ ແລະພະຍາດຕິດຕໍ່ທາງເພດສຳພັນ ໃນທົ່ວໂລກເວົ້າລວມ, ເວົ້າສະເພາະແມ່ນຢູ່ ສປປ ລາວ ໃຫ້ນັບມື້ນັບຫຼຸດລົງນັ້ນ ໃນເວລາ 13:30 ຂອງວັນທີ 7 ມີນາ ທີ່ສະໂມສອນໃຫຍ່ ສມປຊ ກໍໄດ້ຈັດພິທີເຜີຍແຜ່ສະພາບການລະບາດຂອງເຊື້ິອເຮສໄອວີ/ພະຍາດເອດ ແລະ ພະຍາດຕິດຕໍ່ທາງເພດສໍາພັນຂຶ້ນ. ໃຫ້ກຽດຂຶ້ນເຜີຍແຜ່ໂດຍທ່ານ ດຣ. ບຸນເລີດ ວິໄລຫົງ, ຫົວໜ້າຂະແໜງບໍລິຫານສູນຕ້ານເອດ ແລະ ພະຍາດຕິດຕໍ່ທາງເພດສຳພັນ ພ້ອມດ້ວຍຄະນະ.

 

ເຊິ່ງທ່ານໄດ້ລາຍງານໃຫ້ຮູ້ສະພາບການລະບາດຂອງເຊື້ອເຮສໄອວີ/ພະຍາດເອດທີ່ມີຢູ່ທົ່ວໂລກ ໂດຍສະເພາະຢູ່ປະເທດລາວ, ມີການແນະນໍາວິທີການປ້ອງກັນໃຫ້ແກ່ຊາວໜຸ່ມ ສມປຊ ແລະນັກສຶກສາ; ພ້ອມທັງໄດ້ລາຍງານສະຖິຕິການລະບາດຂອງເຊື້ອເຮສໄອວີໃນທົ່ວໂລກຕັ້ງແຕ່ເລີ່ມການລະບາດມາຮອດປີ 2017 ມີຄົນຕິດເຊື້ອເຮສໄອວີ ຈໍານວນ 77,3 ລ້ານຄົນ ແລະ ເສຍຊີວິດຍ້ອນເປັນພະຍາດເອດ ຈຳນວນ 35,4 ລ້ານຄົນ. ສະເພາະພາຍໃນປີ 2017 ນີ້ທົ່ວໂລກມີຜູ້ຕິດເຊື້ອເຮສໄອວີຈໍານວນ 36,9 ລ້ານຄົນ; ໃນນີ້ຜູ້ຕິດເຊື້ອເຮສໄອວີໄດ້ເຂົ້າຮັບການປິ່ນປົວດ້ວຍຢາຕ້ານເຊື້ອເຮສໄອວີມີພຽງ 21,7 ລ້ານຄົນ, ມີຜູ້ຕິດເຊື້ອເຮສໄອວີໃໝ່ຈໍານວນ 1,8 ລ້ານຄົນ, ເສຍຊີວິດຍ້ອນການເປັນພະຍາດເອດ ຈໍານວນ 940.000 ຄົນ. ສໍາລັບ ຢູ່ ສປປ ລາວ ມີຜູ້ຕິດເຊື້ອເຮສໄອວີ ແລະ ເປັນພະຍາດເອດນັບແຕ່ກໍລະນີທຳອິດຕັ້ງແຕ່ປີ 1990 ຮອດເດືອນກັນຍາ 2018 ທົ່ວປະເທດມີຈຳນວນຕົວຢ່າງເລືອດທີ່ໄດ້ກວດທັງໝົດ 864,116 ຄົນ ໃນນັ້ນມີຜູ້ຕິດເຊື້ອເຮສໄອວີ ຈຳນວນ 11.980 ຄົນ, ຜູ້ຕິດເຊື້ອຍັງມີຊີວິດ 9.900 ຄົນ, ເປັນພະຍາດເອດ 5.392 ຄົນ ແລະ ເສຍຊີວິດຍ້ອນພະຍາດເອດຈໍານວນ 2.080 ຄົນ. ຫຼັງຈາກໄດ້ຮັບຟັງການເຜີຍແຜ່ແລ້ວນັ້ນ ກໍໄດ້ມີການຈັດກິດຈະກຳຖາມ-ຕອບ ກ່ຽວກັບເຊື້ອໄວລັດເຮສໄອວີ/ພະຍາດເອດ ແລະ ພະ ຍາດຕິດຕໍ່ທາງເພດສຳພັນ ເພື່ອເປັນການທົດສອບການຮັບຮູ້ແລະ ຄວາມເຂົ້າໃຈກ່ຽວກັບການເຜີນແຜ່ພະຍາດດັ່ງກ່າວ ຢ່າງເປັນຂະບວນຄຶກຄື້ນ ແລະ ເປັນຂະບວນການ.

 

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ: ທ່່ານ ນ. ພູວຽງ ແກ້ວສີມີໄຊ

ພາບ: ທ່ານ ຕາອັອດ ແສນທະວີສຸກ