ພິທີປິດຊຸດຝຶກອົບຮົມທິດສະດີ ການເມືອງ-ການປົກຄອງ ສຳລັບເລຂາພັກເມືອງ-ຄະນະປະຈຳພັກເມືອງ

ໃນຕອນແລງຂອງວັນທີ 8 ມີນາ ທ້າຍອາທິດຜ່ານມານັ້ນ, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີປິດຊຸດຝຶກອົບຮົມທິດສະດີການເມືອງ-ການປົກຄອງ ສຳລັບເລຂາພັກເມືອງ-ຄະນະປະຈຳພັກເມືອງ ຊຸດທີ I, ເຊິ່ງຊຸດຝຶກອົບຮົມຄັ້ງນີ້ແມ່ນເປັນຊຸດທໍາອິດສຳລັບຫຼັກສູດເລຂາພັກເມືອງ-ຄະນະປະຈຳພັກເມືອງ ທີ່ທາງສະຖາບັນຈັດຂຶ້ນ ທີ່ໄດ້ດຳເນີນມາແຕ່ວັນທີ 25 ກຸມພາ ເຖິງ ວັນທີ 8 ມີນາ 2019 ເປັນອັນສິ້ນສຸດການຝຶກອົບຮົມ.

 

ໃຫ້ກຽດເປັນປະທານພິທີດັ່ງກ່າວ ຂອງ ທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ສະມາຊິກສະພາແຫ່ງຊາດຊຸດ 8, ເລຂາຄະນະບໍລິຫານງານພັກ, ຫົວໜ້າ ສມປຊ ພ້ອມດ້້ວຍຄະນະບໍລິຫານງານພັກ, ຕາງໜ້າຫ້ອງການ, ກົມ, ຄະນະວິຊາ, ສູນຂໍ້ມູນຂ່າວສານ ແລະ ຕາງໜ້າຄະນະຈັດຕັ້ງສູນກາງພັກ.

ອີງຕາມບົດສະຫຼຸບຂອງ ທ່ານ ປອ ນ ໄກສອນ ຈັນສີນາ ຮັກສາການຫົວໜ້າກົມວິຊາການ ທີ່ໄດ້ລາຍງານຜົນສຳເລັດຊຸດຝຶກອົບຮົມຕະຫຼອດໄລຍະ 10 ກວ່າວັນຜ່ານມາ, ທີ່ທາງຄະນະຮັບ ຜິດຊອບໄດ້ລາຍງານ ກໍເຫັນໄດ້ຜົນສໍາເລັດອັນໃຫຍ່ຫຼວງໃນແຕ່ລະດ້ານ, ເຊິ່ງຜ່ານການປະເມີນຊຸດຝຶກອົບຮົມແມ່ນຢູ່ໃນລະດັບດີຫາດີຫຼາຍ (4,47) ອັນນີ້ມັນສະແດງໃຫ້ເຫັນເຖິງຄວາມເອົາໃຈໃສ່ຂອງວິທະຍາກອນ ແລະ ສຳມະນາກອນ ຕະຫຼອດຮອດຄະນະຮັບຜິດຊອບ ຂອງການຝຶກອົບຮົມ ແມ່ນໄດ້ມີຄວາມຕັ້ງໜ້າ, ຍາດແຍ່ງເອົາຄວາມຮູ້, ປະສົບການດ້ວຍກັນ ລະຫວ່າງ ສຳມະນາກອນກັບວິທະຍາກອນ ຕະຫຼອດໄລຍະຂອງການຝຶກອົບຮົມ ຜ່ານການຄົ້ນຄວ້າທິດສະດີການເມືອງ-ການປົກຄອງ, ການສົນທະນາຕ່າງໆມາແລ້ວ, ແຕ່ຄຽງຄູ່ກັບຜົນສໍາເລັດດັ່ງກ່າວ ກໍ່ຍັງມີບາງຈຸດທີ່ເປັນຂໍ້ຄົງຄ້າງຖ້າທຽບໃສ່ຈຸດປະສົງ ແລະ ລະດັບຄາດໝາຍຂອງຫຼັກສູດຍັງມີຫຼາຍດ້ານ ທີ່ຄວນໄດ້ຮັບການປັບປຸງຕື່ມເຊັ່ນ: ທາງດ້ານເນື້ອໃນ, ດ້ານປະສານງານ ແລະ ສິ່ງອໍານວຍຄວາມສະດວກຕ່າງໆ ຄວນໄດ້ຮັບການປັບປຸງ ເພື່ອຮັບປະກັນໃຫ້ຊຸດຕໍ່ໄປມີຜົນສໍາເລັດດີຂຶ້ນກວ່າເກົ່າ.

ສຳມະນາກອນທີ່ເຂົ້າຮ່ວມ ມີທັງໝົດ 50 ທ່ານ, ຍິງ 4 ທ່ານ ມາຈາກ 50 ເມືອງ ທົ່ວປະເທດໃນຄັ້ງນີ້ ແມ່ນໄດ້ຜ່ານການຮ່ຳຮຽນ ກ່ຽວກັບທິດສະດີການເມືອງ-ການປົກຄອງ ສຳລັບເລຂາພັກເມືອງ-ຄະນະປະຈຳພັກເມືອງ  ໄດ້ມີການແລກ ປ່ຽນພຶດຕິກຳປະສານສົມທົບກັບທິດສະດີ ຈາກວິທະຍາກອນທັງພາຍໃນ ສມປຊ ແລະ ຈາກບັນດາກະຊວງ, ອົງການ ທີ່ປິ່ນອ້ອມວຽກງານການເມືອງ-ການປົກຄອງ, ພ້ອມກັນນັ້ນ, ສຳມະນາກອນທຸກຄົນກໍໄດ້ຮຽນຮູ້ພື້ນຖານ, ຫຼັກມູນຂອງທິດສະດີ ທີ່ສອດຄ່ອງກັບແນວທາງນະໂຍບາຍຂອງພັກ-ລັດ ເຮັດໃຫ້ກຳແໜ້ນສະພາບຄວາມເປັນຈິງທາງດ້ານເສດຖະກິດສັງຄົມຂອງປະເທດເຮົາໄດ້.

 

ບັນນາທິການ: ທ່ານ ປທ ນ. ອາພອນ ຂາວພັນ 

ຂ່າວ/ພາບ: ທ່ານ ຕາອັອດ ແສນທະວີສຸກ