ໜ່ວຍພັກຮາກຖານນັກສຶກສາ ປະລິນຍາຕີ ຮຸ່ນທີ XXIII ຫ້ອງ ຂ ຜ່ານແຜນການກໍ່ສ້າງໜ່ວຍພັກປອດໃສ, ໜັກແໜ້ນ ແລະ ເຂັ້ມແຂງ

ໃນວັນທີ 11 ມີນາ 2019, ໜ່ວຍພັກຮາກຖານ ນັກສຶກສາ ປະລິນຍາຕີ ຮຸ່ນທີ XXIII ຫ້ອງ ຂ ໄດ້ເປີດກອງປະຊຸມສະຫຼຸບ, ກວດກາ ແລະ ແຜນກໍ່ສ້າງໜ່ວຍພັກປອດໃສ, ໜັກແໜ້ນ ແລະ ເຂັ້ມແຂງປະຈຳປີ ທີ່ຫ້ອງປະຊຸມ 302 (ຕຶກ H) ພາຍໃຕ້ການເປັນປະທານຂອງ ສະຫາຍ ປທ ນ. ບຸນມີ ຈຸນລະຈັກ ປະທານກວດກາພັກ, ຮອງປະທານ ກຳມະການກວດກາຊຸກຍູ້ການປະຕິບັດແຜນການກໍ່ສ້າງໜ່ວຍພັກປອດໃສ, ໜັກແໜ້ນ ແລະ ເຂັ້ມແຂງ, ພ້ອມດ້ວຍ ສະຫາຍ ປທ ແສງທອງ ພຸດທະວົງ ຮອງປະທານກວດກາ.

 

ໃນພິທີ ສະຫາຍ ດວງປັນຍາ ເຝືອມະນີວົງ ເລຂາໜ່ວຍພັກຮາກຖານນັກສຶກສາ ປະລິນຍາຕີ ຮຸ່ນທີ XXIII ຫ້ອງ ຂ ໄດ້ຂຶ້ນຜ່ານບົດສະຫຼຸບ ແລະ ແຜນການກໍ່ສ້າງ ເພື່ອເປັນການສະຫລຸບຕີລາຄາຄືນ ການເຄື່ອນໄຫວວຽກງານການຊີ້ນຳນໍາພາໜ່ວຍພັກ ໄລຍະໜຶ່ງປີຜ່ານມາສາມາດຕີລາຄາໄດ້ທັງດ້ານດີ, ດ້ານອ່ອນ ແລະ ຂໍ້ຄົງຄ້າງ. ພ້ອມທັງວາງທິດທາງແຜນການຕໍ່ໜ້າ ເພື່ອສືບຕໍ່ປັບປຸງການຈັດຕັ້ງໜ່ວຍພັກຮາກຖານໃຫ້ມີການຫັນປ່ຽນດີຂຶ້ນ, ເຮັດໃຫ້ການຈັດຕັ້ງພັກ ມີຄວາມປອດໃສ, ເຂັ້ມແຂງ ແລະ ໜັກແໜ້ນ.

 

ພ້ອມສືບຕໍ່ເພີ່ມທະວີການຊີ້ນຳ-ນຳພາຂອງພັກ ໃນການສຶກສາອົບຮົມການເມືອງແນວຄິດ ໃຫ້ສະມາຊິກໃນຫ້ອງຮັບຮູ້ເຂົ້າໃຈ, ສາມາດຜັນຂະຫຍາຍ ແລະ ໝູນໃຊ້ແນວທາງນະໂຍບາຍ, ມະຕິຄຳສັ່ງຂອງພັກ, ກົດໝາຍຂອງລັດ ໄດ້ຢ່າງຖືກຕ້ອງ, ທັງປັບປຸງເນື້ອໃນຮ່ວມຊີວິດພາຍໃນໜ່ວຍພັກໃຫ້ເລິກເຊິ່ງ ຮັບປະກັນ 3 ລັກສະນະ ຄື: ລັກສະນະນຳພາ, ລັກສະນະສຶກສາອົບຮົມ ແລະ ລັກສະນະຕໍ່ສູ້ ຕິດພັນກັບການການຄົ້ນຄວ້າ, ການຮຽນ-ການສອນ ຢ່າງຕັ້ງໜ້າ ແລະ ການແກ້ໄຂບາງບັນຫາຫຍໍ້ທໍ້ພາຍໃນໜ່ວຍພັກຂອງຫ້ອງ. ໃນນັ້ນ, ການສອບເສັງຂອງຫ້ອງສາມາດຍາດມາໄດ້ຄະແນນສະເລ່ຍໄດ້ເກຼດ B+ 32 ສະຫາຍ, ເກຼດ B 26 ສະຫາຍ (ສະມາຊິກໃນຫ້ອງທັງໝົດມີ 58 ສະຫາຍ) ຈາກຕົວເລກດັ່ງກ່າວ ໜ່ວຍພັກຮາກຖານນັກສຶກສາປະລິນຍາຕີ ຮຸ່ນທີ XXIII ຫ້ອງ ຂ ໄດ້ວາງແຜນການໃນຕໍ່ໜ້າເອົາໃຈໃສ່ຄຸ້ມຄອງ ແລະ ກວດກາການເຄື່ອນໄຫວ ຂອງສະມາຊິກພັກຕໍ່ກັບການສຶກສາຕ້ອງໃຫ້ໜັກແໜ້ນຂຶ້ນຕື່ມ, ຄຽງຄູ່ກັບການປະຕິບັດກົດລະບຽບຂອງພັກ, ກົດໝາຍຂອງລັດ, ກວດກາຕິດຕາມຄວາມເປັນແບບຢ່າງ ແລະ ຄວາມຕັ້ງໜ້າຝຶກຝົນຫລໍ່ຫລອມຂອງຂອງສະມາຊິກພັກຢ່າງຕໍ່ເນື່ອງເປັນປະຈຳ ແນໃສ່ຕ້ານ ແລະ ສະກັດກັ້ນປະກົດການຫຍໍ້ທໍ້ ທີ່ອາດຈະເກີດຂຶ້ນໃນຖັນແຖວສະມາຊິກພັກ.

ກອງປະຊຸມດັ່ງກ່າວດຳເນີນໃນເວລາຕອນແລງ ຂອງວັນທີ 11 ມີນາ ເຊິ່ງມີບັນດາຜູ້ຕາງໜ້າໜ່ວຍພັກຮາກຖານນັກສຶກສາ, ອາຈານປະຈຳຫ້ອງ, ສະມາຊິກພັກພາຍໃນໜ່ວຍພັກຮາກຖານນັກສຶກສາ ປະລິນຍາຕີ ຮຸ່ນທີ XXIII ຫ້ອງ ຂ ເຂົ້າຮ່ວມທັງໝົດ 58 ສະຫາຍ, ຍິງ 18 ສະຫາຍ.

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ