ຄະນະການນຳ ສະຖາບັນການເມືອງ ແລະ ການປົກຄອງແຫ່ງຊາດ ເຂົ້າຮ່ວມກອງປະຊຸມສຳມະນາລະດັບສາກົນ ກ່ຽວກັບ ການຄຸ້ມຄອງລັດໃນເງື່ອນໄຂການປະຕິວັດອຸດສາຫະກຳ 4.0 ຢູ່ລາວ ແລະ ຫວຽດນາມ

   

   ວັນທີ 22 ມີນາ 2019 ຜ່ານມາ ທີ່ນະຄອນຮາຍຟອງ ສສ ຫວຽດນາມ, ສະຖາບັນການເມືອງແຫ່ງຊາດ ໂຮ່ຈີມິນ ຮ່ວມກັບສະຖາບັນດິດວິທະຍາສາດສັງຄົມແຫ່ງຊາດ, ສະຖາບັນການເມືອງ ແລະ ການປົກຄອງແຫ່ງຊາດລາວ, ສະຖາບັນວິທະຍາສາດສັງຄົມແຫ່ງຊາດລາວ ແລະ ຄະນະພັກນະຄອນຮາຍຟອງ ໄດ້ຈັດຕັ້ງກອງປະຊຸມສຳມະນາວິທະຍາສາດພາຍໃຕ້ຫົວຂໍ້: ຄຸ້ມຄອງລັດດ້ວຍກົດໝາຍ ຕອບສະໜອງການເຊື່ອມໂຍງສາກົນ ແລະ ການປະຕິວັດອຸດສາຫະກໍາ 4.0 ຢູ່ລາວ ແລະ ຫວຽດນາມ.

 

 

     ກອງປະຊຸມໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນດຽວກັນ ໂດຍ ສຈ.ປອ ຫງວຽນ ຊວນ ຖັງ ເລຂາທິການສູນກາງພັກຄອມມູນິດຫວຽດນາມ, ປະທານສະພາທິດສະດີສູນກາງ, ຫົວໜ້າສະຖາບັນການເມືອງແຫ່ງຊາດ ໂຮ່ຈີມິນ.ຈາກນັ້ນບັນດາທ່ານ ສຈ.ປອ ຫງວຽນ ຊວນ ຖັງ, ທ່ານ ເລວັນແທງ ກຳມະການສູນກາງພັກ, ເລຂາພັກນະຄອນ, ປະທານສະພາປະຊາຊົນ ນະຄອນຮາຍຟອງ, ທ່ານ ສຈ.ປອ ຫງວຽນກວ່າງຖ້ວນ ເລຂາຄະນະບໍລິຫານງານພັກ, ຫົວໜ້າສະຖາບັນດິດ ວິທະຍາສາດສັງຄົມ; ທ່ານ ຮສ.ປອ ທອງສະລິດ ມັງໜໍ່ເມກ ກຳມະການສູນກາງພັກ ປປລາວ, ຫົວໜ້າ ສມປຊ, ທ່ານ ປອ ສອນທະນູ ທຳມະວົງ ກຳມະການສູນກາງພັກ ປປລາວ, ຫົວໜ້າສະຖາບັນວິທະຍາສາດສັງຄົມແຫ່ງຊາດລາວ ຮ່ວມກັນດຳເນີນກອງປະຊຸມ.

     ກອງປະຊຸມສຳມະນາຄັ້ງນີ້ ປະກອບມີບັນດານັກວິທະຍາສາດທັງ 4 ຝ່າຍ (ລາວ-ຫວຽດນາມ) ໃນນັ້ນຝ່າຍລາວປະກອບມີ 9 ຫົວຂໍ້ ແລະ ໄດ້ລາຍງານຜ່ານເວທີສຳມະນາ ຈໍານວນ 3 ຫົວຂໍ້ຄື:

     ຫົວຂໍ້ທີ 1: ຄຸ້ມຄອງລັດດ້ວຍກົດໝາຍ ກ່ຽວກັບຄວາມໝັ້ນຄົງທາງການເມືອງ ຕອບສະໜອງຄວາມຮຽກຮ້ອງຕ້ອງການຂອງການເຊື່ອມໂຍງສາກົນ ແລະ ການປະຕິວັດອຸດສາຫະກຳ 4.0. ສະເໜີໂດຍ ທ່ານ ປອ ນ. ລຳພູນ ດວນສຸວັນ ຮອງຫົວໜ້າຄະນະວິຊາລັດທິສັງຄົມນິຍົມວິທະຍາສາດ ສມປຊ;

ຫົວຂໍ້ທີ 2: ຄຸ້ມຄອງລັດດ້ວຍກົດໝາຍກ່ຽວກັບຊັບພະຍາກອນທໍາມະຊາດ ແລະ ສິ່ງແວດລ້ອມໃນຍຸກປະຕິວັດອຸດສາຫະກຳ 4.0 ຢູ່ ສປປ ລາວ ເຊິ່ງສະເໜີໂດຍ ທ່ານ ປອ ຄໍາມອນ ຈັນທະຈິດ ຮອງຫົວໜ້າກົມຄຸ້ມຄອງການຄົ້ນຄວ້າວິທະຍາສາດ ສມປຊ;

ແລະຫົວຂໍ້ທີ 3: ຄຸ້ມຄອງລັດດ້ວຍວັດທະນະທໍາ ຕອບສະໜອງການເຊື່ີອມໂຍງສາກົນ ແລະ ການປະຕິວັດອຸດສາຫະກຳ 4.0. ຢູ່ ສປປ ລາວ. ສະເໜີໂດຍ: ທ່ານ ປອ ບຸນແທ່ງ ສຸກສະຫວັດ ຫົວໜ້າອະນຸສະຖາບັນຂໍ້ມູນຂ່າວສານ ແລະ ວາລະສານ ສະຖາບັນວິທະຍາສາດສັງຄົມແຫ່ງຊາດລາວ.

ເຊິ່ງເນື້ອໃນຂອງບົດວິທະຍາສາດ ໄດ້ປິ່ນອ້ອມການຄຸ້ມຄອງລັດດ້ວຍກົດໝາຍ ຮອງຮັບການເຊື່ອມໂຍງສາກົນ ແລະ ການປະຕິວັດ 4.0. ຢູ່ລາວ ເຊິ່ງທັງ 3 ຫົວຂໍ້ທີ່ຝ່າຍລາວໄດ້ສະເໜີິແມ່ນໄດ້ຮັບການຍ້ອງຍໍຈາກບັນດາທ່ານໃນທີ່ປະຊຸມ ແລະ ມີການປະກອບຄຳຄິດຄຳເຫັນຈາກນັກວິທະຍາສາດ ຫວຽດນາມ.

ການເດີນທາງໃນຄັ້ງນີ້ ໄດ້ໃຊ້ເວລາທັງໝົດ 4 ວັນ (ໄປ ແລະ ກັບ) ດ້ວຍຖ້ຽວບິນ QV 311 ເລີ່ມແຕ່ວັນທີ 20/3-24/3/2019 ມີພະນັກງານການນຳຂັ້ນຕ່າງໆພາຍໃນ ສມປຊ ເຂົ້າຮ່ວມທັງໝົດ 16 ທ່ານ ເຊິ່ງນຳຄະນະໂດຍທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ ປປລາວ, ຫົວໜ້າ ສມປຊ. ພາຍຫຼັງປິດກອງປະຊຸມສຳມະນາ ຄະນະໄດ້ເຂົ້າຮ່ວມການທັດສະນະ ສະຖານທີ່ສຳຄັນຂອງນະຄອນຮາຍຟອງເຊັ່ນ: ສະຖານທີ່ອະນຸລັກ ແບັກດັງຢ່າງ (Bach Dang Giang) ສະຖານທີ່ປະຫວັດສາດ ເປັນສູນລວມທາງດ້ານຈິດໃຈຊື່ດັງ ມີຮູບປັ້ນວິລະບູລຸດ 3 ທ່ານທີ່ໄດ້ສ້າງວິລະກໍານໍາພາການຕໍ່ສູ້ 3 ບັ້ນຮົບທາງນໍ້າ ຕັ້ງແຄມແມ່ນໍ້າແບັກດັງ; ຢ້ຽມຊົມຂົວຂ້າມທະເລທີ່ຍາວທີ່ສຸດໃນອາຊຽນ ຍາວເຖິງ 10 ກວ່າກິໂລແມັດ, ແນະນຳກຸ່ມບໍລິສັດ ວິນກຣຸບ ບໍລິສັດຜະລິດລົດຈັກ, ລົດໃຫຍ່ຍີ່ຫໍ້ ວິນຟາສຢູ່ຫວຽດນາມ, ຢ້ຽມຊົມຕະຫຼາດ ອາຫານທະເລ...

 

ຂ່າວ/ພາບ: ທ່ານ ປທ ນ. ຄຳຮູ້ ວິລະທອນ