ຄະນະກວດກາພັກ-ລັດ ສະຖາບັນການເມືອງ ແລະ ການປົກຄອງແຫ່ງຊາດ ເຜີຍແຜ່ເອກະສານ ແລະ ເຊື່ອມຊຶມ ວຽກງານກວດກາ

ໃນວັນທີ 28-29 ມີນາທ້າຍເດືອນທີ່ຜ່ານມາ, ຄະນະກວດກາ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດຕັ້ງກອງປະຊຸມເຜີຍແຜ່ເຊື່ອມຊືມ ຕໍ່ກັບເນື້ອໃນກອງປະຊຸມວຽກງານກວດກາທົ່ວປະເທດ ປະຈຳປີ 2018 ແລະ ຜ່ານບົດສະຫຼຸບວຽກງານກວດກາຂອງ ສມປຊ ແລະ ກໍເພື່ອເປັນການສະຫຼຸບຖອດຖອນບົດຮຽນຄືນຜົນຂອງການຈັດຕັ້ງປະຕິບັດວຽກງານກວດກາໃນໄລຍະຜ່ານມາ. ໂດຍການເປັນປະທານຂອງ ທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກສະມາຊິກສະພາແຫ່ງຊາດ ຊຸດທີ VIII, ເລຂາຄະນະບໍລິຫານງານພັກຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ແລະ ທ່ານ ປອ ດາວບົວລະພາ ບາວົງເພັດ ຮອງຄະນະກວດກາສູນກາງພັກ, ພ້ອມດ້ວຍຄະນະພັກ, ເຂົ້າຮ່ວມມີບັນດາຄະນະກວດກາພັກ-ລັດ ສມປຊ, ຫົວໜ້າຂັ້ນກົມ, ຫ້ອງການ, ຄະນະວິຊາ,ສູນຂໍ້ມູນຂ່າວສານການເມືອງ-ການປົກຄອງ ແລະ ນັກສຶກສາ.

 

      ໃນທີ່ປະຊຸມໄດ້ຮັບຟັງການເຜີຍແຜ່ບົດສະຫຼຸບລາຍງານວຽກງານກວດກາ ສມປຊ ຈາກ ທ່ານ ປອ ຄຳໃບ ມາລາສິງ ຄະນະກວດກາພັກ ສມປຊ, ເຊິ່ງເນື້ອໃນບົດສະຫຼຸບໄດ້ຍົກໃຫ້ເຫັນຜົນສຳເລັດທີ່ພົ້ນເດັ່ນຂອງການເຄື່ອນໄຫວວຽກງານກວດກາຕະຫຼອດໄລຍະຜ່ານມາ ໃນຖັນແຖວສະມາຊິກພັກພະນັກງານລັດຖະກອນ ແລະ ນັກສຶກສາເຊິ່ງມັນໄດ້ສະແດງອອກຄື: ພາຍໃນມີຄວາມສະຫງົບ, ມີຄວາມສາມັກຄີມີຄວາມອຸ່ນອ່ຽນທຸ່ນທ່ຽງ ເຊື່ອໝັ້ນຕໍ່ການຊີ້ນຳນຳພາຂອງຄະນະພັກພ້ອມນັ້ນ ຄະນະກວດກາ ພັກ-ລັດ ສມປຊ ໄດ້ເອົາໃຈໃສ່ດຳເນີນການຕິດຕາມກວດກາຢ່າງຕໍ່ເນື່ອງໃນຂົງເຂດວຽກງານຕິດຕາມ, ກວດກາ ພັກ-ລັດວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ, ວຽກງານຄົ້ນຄວ້າຄຳຮ້ອງຄຳສະເໜີ ແລະ ວຽກງານປັບປຸງກົງຈັກການຈັດຕັ້ງ ແລະ ບຳລຸງພະນັກງານ ພາຍໃນ ສມປຊ ຢ່າງເປັນປົກກະຕິ.

ໃນພິທີ ທ່ານ ປທ ແສງທອງ ພຸດທະວົງ ຮອງປະທານຄະນະກວດກາ ໄດ້ຂຶ້ນເຜີຍແຜ່ບົດສະຫຼຸບຫຍໍ້ ຂອງຄະນະກວດກາສູນກາງພັກ ກ່ຽວກັບການເຄື່ອນໄຫວວຽກງານກວດກາ ປະຈຳປີ 2018 ແລະ ທິດທາງປີ 2019, ໃນນັ້ນວຽກງານ ການກວດກາດ້ານການລົງທຶນຂອງລັດມີ 131 ໂຄງການ, ມູນຄ່າຕາມສັນຍາ 5.683,29 ຕື້ກີບ 124,06 ລ້ານໂດລາ, ໃນນີ້ອົງການກວດກາລັດຖະບານໄດ້ກວດກາ 14 ໂຄງການກະຊວງ, ອົງການ ແລະ ຂັ້ນແຂວງກວດກາ 117 ໂຄງການ, ກວດກາໄມ້ຕາມຄຳສັ່ງ 15/ນຍ ແລະ ອື່ນໆ. ນອກນັ້ນ, ບັນດາຄະນະກວດກາ ສມປຊ ໄດ້ຂຶ້ນຜັດປ່ຽນກັນລາຍງານນິຕິກຳ, ເອກະຕ່າງໆ ທີ່ຕິດພັນກັບວຽກງານກວດກາ ແລະ ບັນດາຜູ້ເຂົ້າຮ່ວມກໍ່ໄດ້ສະແດງຄວາມເຫັນແລກປ່ຽນໃນທີ່ປະຊຸມ.

ໃນຕອນທ້າຍພິທີ ປະທານກອງປະຊຸມໄດ້ກ່າວສະແດງຄວາມຊົມເຊີຍຕໍ່ກັບຄະນະກວດກາພັກລັດ ສມປຊ ທີ່ໄດ້ສຸມທຸກກຳລັງເຮັດໜ້າໃນການປະຕິບັດວຽກງານກວດກາ ຕະຫຼອດມາຈົນເຖິງປັດຈະບັນ ມີຜົນສຳເລັດພົ້ນເດັ່ນຫຼາຍຢ່າງ. ເຊິ່ງການຈັດຕັ້ງກອງປະຊຸມໃນຄັ້ງນີ້ ກໍເພື່ອເປັນການສຶກສາອົບຮົມໃຫ້ສະມາຊິກພັກພະນັກງານ ສມປຊ ແລະ ນັກສຶກສາ ໄດ້ມີຄວາມຮັບຮູ້ເຂົ້າໃຈ ຖືກຕ້ອງກ່ຽວກັບຄວາມໝາຍຄວາມສຳຄັນ ກໍຄືມູນເຊື້ອການເຄື່ອນໄຫວ ຂອງອົງການກວດກາພັກ-ລັດ ທັງເປັນການປຸກລະດົມຂົນຂວາຍທຸກການຈັດຕັ້ງ, ທຸກຊັ້ນຄົນໃນທົ່ວສັງຄົມເຂົ້າຮ່ວມວຽກງານຕິດຕາມກວດກາຢ່າງຕັ້ງໜ້າ ແລະ ມີຄວາມຮັບຜິດຊອບສູງຕາມສິດພັນທະ ແລະ ໜ້າທີ່ຂອງຕົນ ພ້ອມນີ້ຍັງຮຽກຮ້ອງໃຫ້ຄະນະກວດກາ ພັກ-ລັດ ສມປຊ ລວມເຖິງນັກສຶກສາ ເຂົ້າຮ່ວມການກວດກາແຕ່ລະຂັ້ນຢ່າງເປັນປົກກະຕິ ເພື່ອເປັນການຍົກສູງຄວາມຮັບຜິດຊອບປະຕິບັດບົດບາດເປັນເສນາທິການໃນການຕິດຕາມກວດກາ ໃຫ້ຄະນະພັກ ແນໃສ່ໃຫ້ກົງຈັກພັກ-ລັດ ມີຄວາມປອດໃສໜັກແໜ້ນ ແລະ ເຂັ້ມແຂງ.

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ