ສະຖາບັນການເມືອງ ແລະ ການປົກຄອງແຫ່ງຊາດ ມອບບັດສະມາຊິກພັກສົມບູນ ຊຸດທີ XI

ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີມອບ-ຮັບບັດສະມາຊິກພັກຄັ້ງທີ XI ໃຫ້ບັນດາສະມາຊິກພັກຜູ້ທີ່ມີເງື່ອນໄຂມາດຖານຄົບຖ້ວນ ໃນວັນທີ 5 ເມສາ 2019 ນີ້ ທີ່ຫ້ອງປະຊຸມ 302. ໂດຍການເປັນປະທານຂອງ ສະຫາຍ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ, ຜູ້ເຂົ້າຮ່ວມມີຕາງໜ້າກົມຈັດຕັ້ງ-ພະນັກງານ, ມີບັນດາໜ່ວຍພັກຮາກຖານ ນັກສຶກສາພາຍໃນ ຕະຫຼອດຮອດສະມາຊິກພັກພາຍໃນສະຖາບັນ.

ທ່ານ ປທ ອຳໄພ ອັກຄະລາດ ຮອງຫົວໜ້າກົມຈັດຕັ້ງ-ພະນັກງານ ໄດ້ຂຶ້ນຜ່ານມະຕິຕົກລົງຂອງຄະນະບໍລິຫານງານພັກ ສມປຊ ວ່າດ້ວຍການມອບບັດສະມາຊິກພັກໃຫ້ແກ່ບັນດາສະມາຊິກພັກຂອງຫ້ອງຮຽນປະລິນຍາຕີ ຮຸ່ນທີ XXI ຫ້ອງ ກ 11 ສະຫາຍ, ຍິງ 1 ສະຫາຍ ແລະ ຫ້ອງຮຽນ ປະລິນຍາຕີ ຮຸ່ນທີ XXIII ຂ 26 ສະຫາຍ, ຍິງ 11 ສະຫາຍ.

ໃນໂອກາດທີ່ມີຄວາມໝາຍຄວາມສຳຄັນດັ່ງກ່າວນີ້: ສະຫາຍ ພູວົງ ອຸ່ນຄຳແສນ ໄດ້ໃຫ້ກຽດຂຶ້ນມອບບັດສະມາຊິກພັກໃຫ້ແກ່ສະມາຊິກພັກຈຳນວນດັ່ງກ່າວ ພ້ອມທັງໂອ້ລົມສະຫາຍສະມາຊິກພັກ ທີ່ໄດ້ຮັບບັດສະມາຊິກພັກວ່າ ການມອບບັດສະມາຊິກພັກນີ້ ແມ່ນເປັນການຢັ້ງຢືນເຖິງໝາກຜົນ ແລະ ຜົນງານດີເດັ່ນຂອງໜ່ວຍພັກ ກໍຄືສະມາຊິກພັກທຸກສະຫາຍ ໃນການເຄື່ອນໄຫວຈັດຕັ້ງປະຕິບັດແນວທາງນະໂຍບາຍຂອງພັກ, ກົດລະບຽບຂອງພັກ ແລະ ກົດໝາຍຂອງລັດໃນໄລຍະຜ່ານມາໄດ້ເປັນຢ່າງດີ, ມີລະບຽບວິໄນ ແລະ ແບບແຜນໃນການເຮັດວຽກຢ່າງປອດໄສ ແລະ ມີຈຸດສຸມ. ສະຫາຍສະມາຊິກພັກທີ່ໄດ້ຮັບບັດໃນຄັ້ງນີ້ ໃຫ້ສືບຕໍ່ເສີມຂະຫຍາຍ ແລະ ຮັກສາໄດ້ຜົນງານທີ່ຍາດມາໄດ້ ພ້ອມທັງສືບຕໍ່ຝຶກຝົນຫຼໍ່ຫຼອມຕົນເອງ ໃຫ້ກາຍເປັນສະມາຊິກພັກທີ່ປອດໃສ, ເຂັ້ມແຂງ ແລະ ໜັກແໜ້ນ ຂຶ້ນເລື້ອຍໆ.

 

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ