ພິທີມອບ-ຮັບໃບຢັ້ງຢືນຊາວໜຸ່ມ 4 ບຸກ ຊາວໜຸ່ມຮາກຖານ ພະນັກງານ, ຄູ-ອາຈານ ຄ

ໃນຕອນແລງຂອງວັນທີ 22 ເມສາ 2019, ທີ່ຫ້ອງປະຊຸມຊັ້ນ 5 ຕຶກສູນຂໍ້ມູນຂ່າວສານ ການເມືອງ-ການປົກຄອງ ສມປຊ ໄດ້ມີພິທີ ມອບ-ຮັບໃບຢັ້ງຢືນຊາວໜຸ່ມ 4 ບຸກ ປະຈຳສົກປີ 2017-2018 ໃຫ້ແກ່ໜ່ວຍຊາວໜຸ່ມຮາກຖານ ພະນັກ ງານ, ຄູ-ອາຈານ ຄ ພາຍໃຕ້ການເປັນປະທານຂອງ ສະຫາຍ ປອ ສາຍຄຳ ມູນມະນີວົງ ກຳມະການຄະນະບໍລິຫານງານສູນກາງ ຊປປ ລາວ, ເລຂາຄະນະບໍລິຫານງານຊາວໜຸ່ມ ສມປຊ, ມີສະຫາຍ ວິໄລສັກ ບຸນຕາບັນດິດ ເລຂາຊາວໜຸ່ມຮາກຖານພະນັກງານ, ຄູ-ອາຈານ ຄ ພ້ອມດ້ວຍຄະນະ, ມີຊາວໜຸ່ມຮາກຖານພະນັກງານ, ຄູ-ອາຈານ ຄ ແລະ ຕາງໜ້າບັນດາຊາວໜຸ່ມແຕ່ລະຮາກຖານພາຍໃນ ສມປຊ.

 

 ໃນພິທີ ສະຫາຍ ປທ ສະນຸກສິນ ໂກສີພັນ ຮອງເລຂາຊາວໜຸ່ມຮາກຖານ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານ 4 ບຸກ, ເຊິ່ງໃນບົດສະຫຼຸບໄດ້ຍົກໃຫ້ເຫັນຜົນງານແຕ່ລະດ້ານນັ້ນ ມີການພັດທະນາເປັນແບບຢ່າງນໍາໜ້າເປັນຕົ້ນວຽກງານສຶກສາອົບຮົມການເມືອງແນວຄິດ, ວຽກງານການຝຶກຝົນຫຼໍ່ຫຼອມຮໍ່າຮຽນ, ວຽກງານປັບປຸງ ແລະ ກໍ່ສ້າງທາງດ້ານການຈັດຕັ້ງ ແລະ ວຽກງານວິຊາອາຊີບ-ສ້າງວຽກເຮັດງານທໍາ. ເຊິ່ງຜົນການປະຕິບັດຂໍ້ແຂ່ງຂັນ 4 ບຸກ ໄດ້ປະກອບສ່ວນເຮັດໃຫ້ວຽກງານລວມຂອງຊາວໜຸ່ມຮາກຖານພະນັກງານ, ຄູ-ອາຈານ ຄ ເປັນທີ່ຍອມຮັບໃຫ້ແກ່ຮາກຖານອື່ນໆຂະບວນການມີຄວາມຟົດຟື້ນ. ຄຽງຄູກັນນັ້ນ, ຍັງຖືເອົາວຽກງານ 4 ບຸກ ໃນໄວໜຸ່ມຂອງພະນັກງານ, ຄູ-ອາຈານ ໃນຂະແໜງການຮຽນ-ການສອນ ເວົ້າລວມ ເວົ້າສະເພາະ ແມ່ນແນວທາງການປ່ຽນແປງໃໝ່ເຮັດໃຫ້ເຂົາເຈົ້າມີຄວາມຕື່ນຕົວໃນພາລະກິດປົກປັກຮັກສາສ້າງສາພັດທະນາປະເທດຊາດ ແລະ ສົ່ງເສີມໃຫ້ສະມາຊິກຊາວໜຸ່ມຮາກຖານ ຄ ມີຫົວຄິດປະຄິດສ້າງທີ່ສ້າງສັນ, ມີຄວາມກ້າສະແດງອອກ, ມີນ້ຳໃຈເສຍສະຫຼະ, ຮັກສາມູນເຊື້ອ, ຮັກບ້ານເກີດເມືອງນອນ, ກ້າຕັດສິນໃຈ ແລະ ກ້າຮັບຜິດຊອບ ໃຫ້ແທດເໜາະກັບ 3 ລັກສະນະ ແລະ 5 ຫຼັກມູນຂອງການສຶກສາ ຄູ-ອາຈານ ສມປຊ ໃຫ້ປະກົດຜົນເປັນຈິງເທື່ອລະກ້າວ.

ຈາກຜົນສຳເລັດດັ່ງກ່າວ, ສະແດງໃຫ້ເຫັນວ່າຊາວໜຸ່ມຮາກຖານພະນັກງານ, ຄູ-ອາຈານ ຄ ໄດ້ປະຕິບັດ ແລະ ເຄື່ອນໄຫວວຽກງານການຈັດຕັ້ງຊາວໜຸ່ມ ໂດຍສະເພາະວຽກງານ 4 ບຸກ ຢ່າງຕັ້ງໜ້າ ແລະ ເອົາໃຈໃສ່ ພາຍໃຕ້ການຊີ້ນຳ-ນຳພາ ຂອງຄະນະບໍລິຫານງານຊາວໜຸ່ມ ສມປຊ ພ້ອມທັງເປັນການຜັນຂະຫຍາຍເນື້ອໃນມະຕິກອງປະຊຸມຜູ້ແທນຊາວໜຸ່ມທົ່ວປະເທດສະໄໝທີ VII. ເຊິ່ງໃນນັ້ນ, ໄລຍະໃນການປະຕິບັດຂໍ້ແຂ່ງຂັນດັ່ງກ່າວ ຊາວໜຸ່ມຮາກຖານພະນັກງານ, ຄູ-ອາຈານ ຄ ແມ່ນມີຄວາມສາມັກຄີ ແລະ ໜັກແໜ້ນ ໃນການປະກອບສ່ວນແຂ່ງຂັນ 4 ບຸກ ຈົນໄດ້ຮັບໃບຢັ້ງຢືນ 4 ບຸກ ຈາກຄະນະບໍລິຫານງານ ຊາວໜຸ່ມ ສມປຊ, ພາຍໃຕ້ມາດຖານ ແລະ ເງື່ອນໄຂ ຂອງສູນກາງຊາວໜຸ່ມ ປະຊາຊົນ ປະຕິວັດລາວ ວາງອອກ ແລະ ຜົນງານດັ່ງກ່າວນັ້ນ ກໍລ້ວນແລ້ວແຕ່ແມ່ນການປະກອບສ່ວນຂອງ ສະມາຊິກທຸກສະຫາຍພາຍໃນຮາກຖານທັງໝົດ ທີ່ມີຄວາມສາມັກຄີເປັນເອກກະພາບ ແລະ ພ້ອມໃຈກັນຈົນໄດ້ຮັບໃບຢັ້ງຢືນ ຊາວໜຸ່ມ 4 ບຸກ ຢ່າງຕັ້ງໜ້າ.

ໃນພິທີອັນມີຄວາມໝາຍນີ້ ສະຫາຍ ປອ ສາຍຄຳ ມູນມະນີວົງ ໄດ້ຂຶ້ນມອບໃບຢັ້ງຢືນຊາວໜຸ່ມ 4 ບຸກ ແລະ ຂຶ້ນກ່າວຮັບຂອງ ສະຫາຍ ວິໄລສັກ ບຸນຕາບັນດິດ.

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ