ສະຫະພັນແມ່ຍິງ ສະຖາບັນການເມືອງ ແລະ ການປົກຄອງແຫ່ງຊາດ ສຳເລັດການທາບທາມລາຍຊື່ລົງສະໝັກຄະນະຊຸດໃໝ່

ອີງຕາມຄຳສັ່ງຂອງຄະນະບໍລິຫານງານພັກ ສມປຊ ວ່າດ້ວຍການກະກຽມຈັດຕັ້ງດຳເນີນກອງປະຊຸມໃຫຍ່ຂອງ 3 ອົງການຈັດຕັ້ງມະຫາຊົນທີ່ຂຶ້ນກັບອົງຄະນະພັກ ສມປຊ, ເຊິ່ງໃນນັ້ນ ສະຫະພັນແມ່ຍິງ ສມປຊ ກໍແມ່ນໜຶ່ງໃນອົງການຈັດຕັ້ງມະຫາຊົນ ໄດ້ສຳເລັດການທາບທາມລາຍຊື່ ຄັ້ງທີ 3 ເພື່ອປະກອບເຂົ້າເປັນບຸກຄະລາກອນລົງສະໝັກ ເປັນຄະນະສະຫະພັນແມ່ຍິງ ສມປຊ ຊຸດໃໝ່ ທີ່ກຳລັງຈະດຳເນີນຈັດກອງປະຊຸມຂຶ້ນໃນໄວໄວນີ້.

 

ກອງປະຊຸມທາບທາມຮອບທີ 1 ແມ່ນເລີ່ມແຕ່ຕອນເຊົ້າ ວັນທີ 22 ພຶດສະພາ  ເຊິ່ງລາຍຊື່ລົງທີ່ຄົບເງື່ອນໄຂ ຂອງຜູ້ລົງສະໝັກ ມີທັງໝົດ 32 ສະຫາຍ ຄັດເອົາ 17 ສະຫາຍ, ຮອບທີ 2 ຈັດຕັ້ງຂຶ້ນໃນຕອນແລງ ຂອງວັນດຽວກັນ ເຊິ່ງລາຍຊື່ຜູ້ລົງສະໝັກມີ 17 ສະຫາຍ ຄັດເລືອກເອົາ 13 ສະຫາຍ ແລະ ໃນວັນທີ 27 ພຶດສະພາ ຮອບທີ 3ມີລາຍຊື່ຜູ້ລົງສະໝັກທັງໝົດ 17 ສະຫາຍ ຄັດເອົາ 11 ສະຫາຍ ເປັນອັນສິ້ນສຸດການທາບທາມ.

ນອກຈາກນັ້ນແລ້ວ, ສະຫາຍ ປທ ນ. ພອນໄຊ ລາດຊະວົງ ປະທານສະຫະພັນແມ່ຍິງ ສມປຊ ຍັງໄດ້ຂຶ້ນຜ່ານຮ່າງບົດລາຍງານການເມືອງ ແລະ ສະຫາຍ ປທ ນ. ອານົງ ຂັນທະຍົງ ຮອງປະທານສະຫະພັນແມ່ຍິງຜ່ານຮ່າງບົດສຳຫຼວດການຊີ້ນຳ ແລະ ນຳພາ ຂອງຄະນະໃນສະໄໝຜ່ານມາ ຕໍ່ກັບຜູ້ເຂົ້າຮ່ວມໃນກອງປະຊຸມທາບທາມຄັ້ງນີ້, ພ້ອມທັງເປີດກວ້າງໃຫ້ບັນດາຜູ້ເຂົ້າຮ່ວມໄດ້ມີການປະກອບຄຳຄິດເຫັນ ເພື່ອເປັນການປັບປຸງເນື້ອໃນບາງດ້ານທີ່ເຫັນສົມຄວນ ເພື່ອເຮັດໃຫ້ບົດລາຍງານການເມືອງ ແລະ ບົດສຳຫຼວດດັ່ງກ່າວມີເນື້ອໃນສົມບູນຂຶ້ນຕື່ມ.

ພິທີຈັດຕັ້ງບັ້ນທາບທາມດັ່ງກ່າວນີ້, ພາຍໃຕ້ການເປັນປະທານຊີ້ນຳ ແລະ ດຳເນີນກອງປະຊຸມ ຂອງສະຫາຍ ສຈ ປອ ບຸນທີ ເຄືອມີໄຊ ຄະນະບໍລິຫານງານພັກ, ຫົວໜ້າກົມຄຸ້ມຄອງການຄົ້ນຄວ້າວິທະຍາສາດ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ ສມປຊ, ເຂົ້າຮ່ວມມີສະຫາຍ ປທ ນ. ພອນໄຊ ລາດຊະວົງ ປະທານສະຫະພັນແມ່ຍິງ ສມປຊ ພ້ອມດ້ວຍຄະນະ, ລວມເຖິງສະມາຊິກແມ່ຍິງທຸກຮາກຖານພາຍໃນ ສມປຊ ກໍເຂົ້າຮ່ວມຢ່າງພ້ອມພຽງ.

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ