ຄະນະຂົນຂວາຍປະຊາຊົນ ສູນກາງພັກກອມມູນິດ ສສ ຫວຽດນາມ ພົບປະຢ້ຽມຢາມ ສມປຊ

ສະຖາບັນການເມືອງ ແລະ ການປົກຄອງແຫ່ງຊາດ ໄດ້ໃຫ້ການຕ້ອນຮັບ ທ່ານ ຮ່າ ງັອກ ແອັງ ຮອງຫົວໜ້າ ຄະນະຂົນຂວາຍປະຊາຊົນ ສູນກາງພັກກອມມູນິດ ສສ ຫວຽດນາມ ພ້ອມດ້ວຍຄະນະ 5 ທ່ານ ເນື່ອງໃນໂອກາດເດີນທາງມາເຮັດວຽກທີ່ ສປປ ລາວ ພ້ອມທັງເຂົ້າພົບປະຢ້ຽມຢາມ ສະຖາບັນການເມືອງ ແລະ ການປົກຄອງແຫ່ງຊາດ. ເຊິ່ງຕາງໜ້າໃຫ້ແກ່ ສມປຊ ໃນການຕ້ອນຮັບຄະນະດັ່ງກ່າວ ໂດຍ ທ່ານ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ ພ້ອມດ້ວຍຕາງໜ້າ ຄະນະກົມ, ຫ້ອງການ ແລະ ຄະນະວິຊາ.

 

ໃນພິທີພົບປະຢ້ຽມຢາມ ທັງສອງຝ່າຍໄດ້ມີການຜັດປ່ຽນກັນລາຍງານ ກ່ຽວກັບສະພາບຈຸດພິເສດ ແລະ ແລກປ່ຽນບົດຮຽນບາງດ້ານກ່ຽວກັບຄວາມ​ຮຽກຮ້ອງ​ຕ້ອງການ​ພຶດຕິ​ກຳ​ຂອງ​ການ​ປ່ຽນ​ແປງ​​ໃໝ່, ວຽກ​ງານ​ຂົນຂວາຍ​ມະຫາຊົນ​ຂອງ​ພັກ​ ທີ່ມີ​ການ​ປ່ຽນ​ແປງ​ໃໝ່​ໂດຍ​ພື້ນຖານຮ​ອບດ້ານ, ນັບ​ທັງ​ດ້ານ​ຄວາມ​ຮັບ​ຮູ້ ກໍ່​ຄື​ແບບ​ວິທີ​ການດຳ​ເນີນວຽກ​ງານ​ຂົນຂວາຍ​ມະຫາຊົນ,  ເພື່ອຕອບ​ສະໜອງ​ກັບຄວາມ​ຮຽກຮ້ອງ​ຕ້ອງການ​ໃຫ້ທັນສະພາບ​ການ​.ນອກນັ້ນ, ຄະນະຂົນຂວາຍປະຊາຊົນ ສູນກາງພັກກອມມູນິດ ສສ ຫວຽດນາມ ໄດ້ມີການສະເໜີເນື້ອໃນບາງດ້ານໃນການແລກປ່ຽນກັບ ສມປຊ ເປັນຕົ້ນແມ່ນ: 1), ທິດສະດີພື້ນຖານກ່ຽວກັບການປ່ຽນແປງໃໝ່ວິທີການນໍາພາ ຂອງພັກປະຊາຊົນປະຕິວັດລາວຕໍ່ກັບວຽກງານຂົນຂວາຍມະຫາຊົນ-ສະພາບການ, ສາເຫດ ແລະ ບົດຮຽນປະສົບການ. 2). ວິທີການນໍາພາ ຂອງພັກປະຊາຊົນປະຕິວັດລາວຕໍ່ກັບວຽກງານຂົນຂວາຍມະຫາຊົນຕັ້ງແຕ່ການເລີ່ມກໍ່ສ້າງພັກ ຈົນຮອດປະຈຸບັນ. 3),ປະສົບການກ່ຽວກັບປ່ຽນແປງໃໝ່ວິທີການນໍາພາ ຂອງພັກປະຊາຊົນປະຕິວັດລາວ ແລະ ບັນດາຂໍ້ເຈາະຈີ້ມ ໃຫ້ແກ່ການປ່ຽນແປງໃໝ່ ວິທີການນໍາພາ ຂອງພັກກອມມູນິດຫວຽດນາມ ຕໍ່ກັບວຽກງານຂົນຂວາຍໃນໄລຍະເວລາຕໍ່ໜ້າ. 4),ວິເຄາະຄາດຄະເນບັນດາປັດໃຈ ທີ່ກະທົບເຖິງວິທີການນໍາພາຂອງພັກປະຊາຊົນປະຕິວັດລາວກັບປະຊາຊົນປະຕິວັດລາວ ຕໍ່ກັບວຽກງານຂົນຂວາຍມະຫາຊົນ ໃນເງື່ອນໄຂພັດທະນາເສດຖະກິດການຕະຫຼາດ ຕາມທິດທາງສັງຄົມນິຍົມ ແລະ ເຊື່ອມໂຍງສາກົນ. 5), ທັດສະນະ, ໜ້າທີ່ ແລະ ວິທີການແກ້ໄຂປ່ຽນແປງໃໝ່ວິທີການນໍາພາຂອງພັກກ່ຽວກັບວຽກຂົນຂວາຍມະຫາຊົນຂອງລາວໃນໄລຍະພາຍພາກໜ້າ. ໂດຍທັງ 5 ເນື້ອໃນທີ່ໄດ້ນຳມາສະເໜີແລກປ່ຽນກັນໃນຄັ້ງນີ້ນັ້ນ ທ່ານ ຮສ ພູວົງ ອຸ່ນຄຳແສນ ພ້ອມດ້ວຍຕາງໜ້າ ຄະນະກົມ, ຫ້ອງການ ແລະ ຄະນະວິຊາ ກໍ່ໄດ້ມີການອະບາຍຢ່າງກົງໄປກົງມາ ຄຽງຄູ່ກັບສະພາບການປັດຈຸບັນຂອງປະເທດເຮົາ.

ການພົບປະດັ່ງກ່າວນີ້, ເປັນການເສີມສ້າງສາຍພົວພັນມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໂດຍສະເພາະແມ່ນການແລກປ່ຽນບົດຮຽນກ່ຽວກັບສະພາບການ ຈັດຕັ້ງວຽກງານມະຫາຊົນຂອງພັກກອມມູນິດຫວຽດນາມ ໃນໄລຍະຜ່ານມາ, ທິດທາງໃນຕໍ່ໜ້າ, ທັດສະນະ, ຄາດໝາຍສູ້ຊົນ ແລະ ຍຸດທະສາດກັບສິ່ງທ້າທາຍໃນໄລຍະໃໝ່.

ປະມວນຮູບພາບ

ບັນນາທິການ: ທ່ານ ປທ ນ. ອາພອນ ຂາວພັນ

 

ຂ່າວ/ພາບ: ທ່ານ ຕາອັອດ ແສນທະວີສຸກ