ກົມຮ່ວມມືສາກົນ, ກະຊວງແຜນການ ແລະ ການລົງທຶນ ມອບປື້ມ ໃຫ້ແກ່ຫໍສະໝຸດ ສມປຊ

ວັນທີ 29 ພຶດສະພາ 2019 ທີ່ຜ່ານມາ ກົມຮ່ວມມືສາກົນ, ກະຊວງແຜນການ ແລະ ການລົງທຶນ ໄດ້ນໍາເອົາປື້ມຕຳລາເຂົ້າມອບໃຫ້ຫໍສະໝຸດ ສະຖາບັນການເມືອງ ແລະ ການປົກຄອງແຫ່ງຊາດ ເພື່ອເປັນການສ້າງຂະບວນການເຄື່ອນໄຫວຂ່ຳນັບຮັບຕ້ອນກອງປະຊຸມໃຫຍ່ຄັ້ງທີ IV ຂອງໜ່ວຍພັກກົມຮ່ວມມືສາກົນ ແລະ ເປັນການສົ່ງເສີມປະກອບ ສ່ວນທາງດ້ານຂໍ້ມູນຂ່າວສານ ສມປຊ ໃຫ້ບັນດາພະນັກງານ, ຄູ-ອາຈານ ແລະ ນັກສຶກສາ ໄດ້ນຳໃຊ້ຕຳລາດັ່ງກ່າວເຂົ້າໃນການຮຽນ-ການສອນ ຂອງຕົນໄດ້ຫຼາຍຂຶ້ນຕື່ມ.

 

ປື້ມດັ່ງກ່າວນີ້ມີ 3 ປະເພດຄື: 1). ປື້ມຄູ່ມືການຄຸ້ມຄອງ ແລະ ບໍລິຫານໂຄງການສຳລັບທຶນຊ່ວຍເຫຼືອທາງການ ເພື່ອການພັດທະນາ ຈຳນວນ 60 ຫົວ, 2). ປື້ມບົດລາຍງານການຈັດຕັ້ງປະຕິບັດ ການຊ່ວຍເຫຼືອທາງການ ເພື່ອການພັດທະນາ ຈຳນວນ 20 ຫົວ ແລະ 3). ປື້ມແນະນໍາການຕິດຕາມ ແລະ ປະເມີນຜົນງານໂຄງການຊ່ວຍເຫຼືອທາງການ ເພື່ອການພັດທະນາ ຈຳນວນ 60 ຫົວ. ໂດຍການກ່າວມອບຂອງ ທ່ານ ນ. ສີສົມບູນ ອຸນາວົງ ຫົວໜ້າກົມຮ່ວມມືສາກົນ, ກະຊວງແຜນການ ແລະ ການລົງທຶນ ແລະ ຕາງໜ້າ ສມປຊ ກ່າວຮັບ ຂອງ ທ່ານ ປທ ນ. ຄໍາຫຼ້າ ແກ້ວອຸ່ນຄໍາ ຫົວໜ້າຫ້ອງການ ພ້ອມດ້ວຍ ຄະນະສູນຂໍ້ມູນຂ່າວສານ ການເມືອງ-ການປົກຄອງ.

ການມອບ-ຮັບ ດັ່ງກ່າວສຸດທີ່ມີຄວາມໝາຍຄວາມສຳຄັນ ໃນການສົ່ງເສີມຄັງຂໍ້ມູນຄວາມຮູ້, ຂ່າວສານຕ່າງໆ ໃຫ້ ຫໍສະໝຸດ ສມປຊ ໄດ້ມີຈຸດເດັ່ນດ້ານຂໍ້ມູນຂ່າວສານ ເວົ້າລວມ, ເວົ້າສະເພາະ ເພື່ອສົ່ງເສີມການອ່ານໃຫ້ພະນັກງານ, ຄູ-ອາຈານ ແລະ ນັກສຶກສາໃຫ້ມີຄວາມຫຼາກຫຼາຍຂຶ້ນຕື່ມ.

 

ບັນນາທິການ: ທ່ານ ປທ ນ. ອາພອນ ຂາວພັນ

 

ຂ່າວ/ພາບ: ທ່ານ ຕາອັອດ ແສນທະວີສຸກ