ສມປຊ ສຳເລັດກອງປະຊຸມສະຫຼຸບຖອດຖອນບົດຮຽນ ຈັດຕັ້ງປະຕິບັດຫຼັກສູດການຮຽນ-ການສອນ ປະຈຳສົກ 2018-2019

ເພື່ອເປັນການສະຫຼຸບຕີລາຄາ ຜົນງານການຈັດຕັ້ງປະຕິບັດຫຼັກສູດການຮຽນ-ການສອນ ຂອງສະຖາບັນການເມືອງການປົກຄອງແຫ່ງຊາດ ໃນສົກປີ 2018-2019 ກົມຄຸ້ມຄອງການຮຽນ-ການສອນ ໄດ້ຈັດຕັ້ງກອງປະຊຸມສະຫຼຸບຖອດຖອນບົດຮຽນຈັດຕັ້ງປະຕິບັດຫຼັກສູດການຮຽນ-ການສອນ ປະຈຳສົກ 2018-2019 ຂຶ້ນ ໂດຍການເປັນປະ ທານຂອງທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ເລຂຄະນະບໍລິຫານງານພັກ, ຫົວໜ້າ ສມປຊ ,​ມີບັນຫາຫົວໜ້າກົມ, ຄະນະ, ຄູ-ອາຈານທົ່ວ ສມປຊ ເຂົ້າຮ່ວມຢ່າງພ້ອມພຽງ.

 

     ບັນດາຜູ້ເຂົ້າຮ່ວມໄດ້ຮັບຟັງການລາຍງານສະພາບການຈັດຕັ້ງປະຕິບັດຫຼັກສູດການຮຽນ-ການສອນ ໃນສົກປີ 2018-2019 ຈາກທ່ານ ປອ ນ ໄກສອນ ຈັນສີນາ ວ່າການຫົວໜ້າກົມການຮຽນ-ການສອນ ໂດຍທ່ານໃຫ້ຮູ້ວ່າ ໃນໜຶ່ງສົກປີຜ່ານມາ ສມປຊ ໄດ້ເອົາໃຈໃສ່ເປັນພິເສດຕໍ່ວຽກງານພັດທະນາ ແລະຄຸ້ມຄອງການຮຽນ-ການສອນ ເປັນຕົ້ນສຳເລັດການປັບປຸງຫຼັກສູດລະບົບຊັ້ນກາງ, ຫຼັກສູດເຝິກອົບຮົມຕາມຫົວຂໍ້ສະ ເພາະເລຂາພັກເມືອງ (ທັງໂຄງສ້າງ ແລະເນື້ອໃນ) ໄດ້ 100%, ປັບປຸງຫຼັກສູດປະລິນຍາຕີ ໄດ້ 80%, ສຳ ເລັດຫຼັກສູດເຝິກອົບຮົມຫົວຂໍ້ສະເພາະສຳລັບຜູ້ບໍລິຫານລັດວິສາຫະກິດ (ກຳລັງຈັດພິມເປັນປື້ມຄູ່ມື). ນອກຈາກນີ້,ການຈັດຕັ້ງປະຕິບັດຫຼັກສູດການຮຽນ-ການສອນ, ການຄົ້ນຄວ້າວິທະຍາສາດ ແລະວຽກງານບໍລິຫານອື່ນໆທີ່ປິ່ນອ້ອມ ເຫັນວ່ານັບມື້ນັບມີການພັດທະນາ ແລະເຕີບໃຫຍ່ຂະຫຍາຍຕົວທາງດ້ານປະລິມານ ແລະຄຸນນະພາບ.     

ພາຍຫຼັງທີ່ໄດ້ຮັບຟັງການລາຍງານການຈັດຕັ້ງປະຕິບັດຫຼັກສູດການຮຽນ-ການສອນແລ້ວ ໃນທີ່ປະ ຊຸມໄດ້ມີການປຶກສາຫາລື, ແລກປ່ຽນຄຳຄິດຄຳເຫັນ ພ້ອມທັງມີຂໍ້ສະເໜີປະກອບໃສ່ບົດສະຫຼຸບລາຍງານດັ່ງ ກ່າວ ບາງເນື້ອໃນຕື່ມເປັນຕົ້ນແມ່ນ ຜົນງານການສ້າງຮາກຖານຂອງຄູ-ອາຈານ ແລະນັກສຶກສາ, ການຮັບປະກັນຄຸນນະພາບການຮຽນ-ການສອນ, ບາງນິຕິກຳກ່ຽວກັບການຄຸ້ມຄອງການຮຽນ-ການສອນ ເປັນຕົ້ນແມ່ນໜັງສືແນະນຳຂຽນບົດປ້ອງກັນ, ລະບຽບການສອບເສັງ, ລະບຽບການຄຸ້ມຄອງນັກ ສຶກສາ, ເນື້ອໃນຂໍ້ແຂ່ງຂັນ ຮູບການສຳມະນາ, ການໃຫ້ຄະແນນແລະອື່ນໆ; ທັງໝົດນັ້ນເພື່ອໃຫ້ເນື້ອໃນບົດລາຍງານມີຄວາມແທດເຖິງແລະອຸດົມສົມບູນຂຶ້ນ ພ້ອມທັງມີທິດທາງທີ່ສອດຄ່ອງ ເຮັດໃຫ້ການຮຽນ-ການສອນມີຄຸນນະພາບຂຶ້ນນັບມື້.

     ໃນຕອນທ້າຍຂອງພິທີດັ່ງກ່າວ, ທ່ານ ຮສ ປອ ທອງສະລິດ ມັງໜໍ່ເມກ ໄດ້ມີຄຳເຫັນ ແລະໃຫ້ທິດຕໍ່ກອງປະຊຸມວ່າ: ກົມຄຸ້ມຄອງການຮຽນ-ການສອນຄວນເພີ່ມທະວີການຊີ້ນຳ-ນຳພາສະຫຼຸບຕີລາຄາຄືນປັບປຸງແບບແຜນວິທີເຮັດວຽກໃຫ້ມີຄວາມເຂັ້ມແຂງ ພ້ອມທັງເອົາໃຈໃສ່ປະສານສົມທົບກັບພາກສ່ວນຕ່າງໆຈັດຕັ້ງຄຸ້ມຄອງການຮຽນ-ການສອນ ທັງພາຍໃນ ແລະພາຍນອກສະຖາບັນ ໃຫ້ມີຄຸນນະພາບສູງຂຶ້ນ, ຄວນກະກຽມ ຕີລາຄາສ້າງແຜນການເຄື່ອນໄຫວຮອດປີ 2020, ມີແຜນຍຸດທະສາດ 2025 ແລະວິໄສທັດ 2030; ໂດຍຖືເອົາ 3 ເປັນໃຈກາງມາເປັນແຜນພັດທະນາສະຖາບັນເຊັ່ນເປັນໃຈກາງບຳລຸງກໍ່ສ້າງພະນັກງານການນຳການ ເມືອງ-ການປົກຄອງ, ເປັນໃຈກາງສະໜອງຂໍ້ມູນຂ່າວສານການເມືອງ-ການປົກຄອງ ແລະເປັນໃຈກາງໃນການຄົ້ນຄວ້າແນວຄິດ ໄກສອນ ພົມວິຫານ; ເອົາໃຈໃສ່ປັບປຸງຄຸນນະພາບ, ວິທີການສິດສອນບໍ່ວ່າຈະເປັນແບບເກົ່າ ຫຼື ແບບໃໝ່ໃຫ້ຍຶດຖືໃນຫຼັກການ 5 ບາດກ້າວຂອງຄູ, ມອບໃຫ້ຄະນະຕ່າງໆເອົາໃຈໃສ່ໃຫ້ຫຼາຍຂຶ້ນການຄວາມຮັບຮູ້ຂອງຄູໜຸ່ມ ໂດຍການຕິດຕາມ, ມອບວຽກໃຫ້ ໂດຍສົມທົບກັບ 3 ອົງການຈັດຕັ້ງໃນການໃຫ້ທິດຊີ້ນຳ ເປັນຕົ້ນການຂຽນບົດ ຫຼື ການເຂົ້າຫໍສະໝຸດ ເພື່ອໃຫ້ຄູໜຸ່ມສາມາດຮັບປະກັນໄດ້ວຽກງານການສິດສອນ ແລະເຮັດວຽກບໍລິຫານໄປຄວບຄູ່ກັນ.

ພາບ/ຂ່າວ: ນ. ດອກໄມ້ ຈັນດາລາ

 

ບກ: ປທ ນ. ຄໍາຮູ້ ວິລະທອນ