ຊົມເຊີຍຄະນະບໍລິຫານງານຊຸດໃໝ່ຂອງໜ່ວຍພັກຮາກຖານ ພະນັກງານບຳນານ

ໃນຕອນເຊົ້າຂອງວັນທີ 6 ກັນຍາ 2019 ຜ່ານມາ, ໜ່ວຍພັກຮາກຖານພະນັກງານບໍານານ ສມປຊ ໄດ້ຈັດກອງປະຊຸມໃຫຍ່ຄັ້ງທີ V ຂຶ້ນຢ່າງເປັນທາງການ ຢູ່ທີ່ ຫ້ອງປະຊຸມ 302; ພາຍໃຕ້ການເປັນປະທານຂອງສະຫາຍ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ, ເຂົ້າຮ່ວມກອງປະຊຸມຄັ້ງນີ້ມີບັນດາສະຫາຍຄະນະໜ່ວຍພັກຮາກຖານພາຍໃນ ສມປຊ, ສະມາຊິກພັກບໍານານ ທັງໝົດ 35 ສະຫາຍ, ຍິງ 13 ສະຫາຍ ມີບັນດາສະຫາຍຕາງໜ້າຄະນະໜ່ວຍພັກແຕ່ລະກົມ ພາຍໃນເຂົ້າຮ່ວມຢ່າງພ້ອມພຽງ.

 

ໃນກອງປະຊຸມໃຫຍ່ອັນສະຫງ່າລາສີນີ້ ສະຫາຍ ຮສ ປອ ແພງຕາ ວິລະວົງ ເລຂາໜ່ວຍພັກຮາກຖານພະນັກງານບຳນານ ໄດ້ຂຶ້ນຜ່ານມະຕິຕົກລົງວ່າດ້ວຍການອະນຸມັດດໍາເນີນກອງປະຊຸມໃຫຍ່ ຄັ້ງທີ V; ຫຼັງຈາກນັ້ນ ສະຫາຍຍັງໄດ້ອ່ານຜ່ານບົດລາຍງານການເມືອງຂອງໜ່ວຍພັກ ເຊິ່ງໄດ້ສະຫຼຸບຕີລາຄາຈຸດດີ, ຈຸດອ່ອນ ການເຄື່ອນໄຫວປະຕິບັດໜ້າທີ່ຂອງໜ່ວຍພັກຕົນໃນໄລຍະທີ່ຜ່ານມາ ພ້ອມທັງວາງທິດທາງແຜນການ 5 ປີ ຕໍ່ໜ້າ; ພ້ອມນັ້ນຄະນະພັກຊຸດເກົ່າໄດ້ຂຶ້ນລາໜ້າທີ່ ແລະ ປ່ອນບັດຄັດເລືອກຄະນະພັກຊຸດໃໝ່ ເຊິ່ງມີຜູ້ສະໝັກຈໍານວນ 5 ສະຫາຍ, ຄັດເລືອກເອົາ 3 ສະຫາຍ ເຊິ່ງຜົນຂອງການຄັດເລືອກ ແລະ ຈັດຕັ້ງກອງປະຊຸມຄັ້ງປະຖົມມະລຶກໄດ້ຕົກລົງເຫັນດີດັ່ງນີ້: 1. ສະຫາຍ ປອ ແພງສອນ ຄູນທອງຄຳ ເປັນເລຂາ, 2. ສະຫາຍ ປທ ພິມ ອິນຄຳແສງ ເປັນຮອງເລຂາ ແລະ ທັງເປັນປະທານກວດກາ; 3. ສະຫາຍ ນ. ຄຳປານ ແກ້ວອຸ່ນຄຳ ເປັນຄະນະ.

ໃນໂອກາດທີ່ມີຄວາມໝາຍຄວາມສໍາຄັນດັ່ງກ່າວ ສະຫາຍ ຮສ ພູວົງ ອຸ່ນຄຳແສນ ໄດ້ກ່າວມີຄໍາເຫັນໂອ້ລົມຕໍ່ທີ່ປະຊຸມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວໃນໄລຍະຜ່ານມາ ທີ່ໜ່ວຍພັກຍາດໄດ້ຜົນງານອັນໃຫຍ່ຫຼວງ, ຊົມເຊີຍບັນດາຜູ້ແທນກອງປະຊຸມໃຫຍ່ຄັ້ງນີ້ ທີ່ໄດ້ຕັດສິນໃຈທຸ່ມເທເຫື່ອແຮງສະຕິປັນຍາຂອງຕົນຜ່ານຜ່າຄວາມຫຍຸ້ງຍາກຕ່າງໆ ແລະຕີລາຄາສູງຕໍ່ການຈັດກອງປະຊຸມໃຫຍ່ຄັ້ງນີ້ ເຊິ່ງເປັນກອງປະຊຸມທີ່ມີຄວາມໝາຍຄວາມສໍາຄັນ ປະກອບສ່ວນປັບປຸງກໍ່ສ້າງຮາກຖານພາຍໃນ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນເພື່ອໃຫ້ບັນດາສະມາຊິກພັກພະນັກງານບໍານານ ທຸກສະຫາຍພ້ອມກັນສືບຕໍ່ຮັກສາມູນເຊື້ອຄວາມສາມັກຄີ ແລະ ເຮັດສໍາເລັດໜ້າທີ່ການເມືອງ, ເຮັດໜ້າທີ່ສະມາຊິກພັກ ດ້ວຍຄວາມຮັບຜິດຊອບສູງ, ພ້ອມກັນປຶກສາຫາລືປັບປຸງແກ້ໄຂວຽກງານຂອງໜ່ວຍພັກໃຫ້ມີບາດກ້າວໃໝ່ ແລະ ໄດ້ຮັບຜົນງານໃຫຍ່ຫຼວງກວ່າເກົ່າ.

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ