ສະຖາບັນການເມືອງ ແລະ ການປົກຄອງແຫ່ງຊາດ ສະເຫຼີມສະຫຼອງວັນຄູແຫ່ງຊາດ ຄົບຮອບ 25 ປີ

ສະຖາບັນການເມືອງ-ການປົກຄອງແຫ່ງຊາດ ຈັດພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 25 ປີ (7.10.1994-7.10.2019) ພ້ອມທັງກ່າວເປີດສົກຮຽນໃໝ່ ປະຈຳສົກຮຽນ 2019-2020 ຂຶ້ນໃນວັນທີ ຕຸລາທີ່ຜ່ານມາ, ໂດຍການເປັນປະທານຂອງ ທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ສະມາຊິກສະພາແຫ່ງຊາດຊຸດທີ VIII, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ-ການປົກຄອງແຫ່ງຊາດ, ໂດຍມີບັນດາ ພະນັກງານ, ຄູ-ອາຈານ ພ້ອມດ້ວຍນັກສຶກສາເຂົ້າຮ່ວມຢ່າງພ້ອມພຽງ.

 

ໃນພິທີ ທ່ານ ປອ ນ. ໄກສອນ ຈັນສີນາ ຮັກສາການຫົວໜ້າກົມຄຸ້ມຄອງການຮຽນ-ການສອນ ໄດ້ຜ່ານບົດສະຫຼຸບການຈັດຕັ້ງປະຕິບັດ ແລະ ແຜນການຮຽນ-ການສອນ ໃນໄລຍະຜ່ານມາ ຊຶ່ງປັດຈຸບັນສະຖາບັນ ມີພະນັກງານ-ລັດຖະກອນ ທັງໝົດ 240 ທ່ານ, ຍິງ 102 ທ່ານ, ໃນນັ້ນ, ເປັນອາຈານສອນປະຈໍາ ຈໍານວນ 137 ທ່ານ, ຍິງ 52 ທ່ານ, ກວມເອົາ 57,08% ຂອງພະນັກງານທັງໝົດ ແລະ ໃນສົກຮຽນ 2019-2020 ນີ້ມີນັກສຶກສາເຂົ້າໃໝ່ເຊັ່ນ: ນັກສຶກສາ ຊັ້ນສູງ ລະບົບເລັ່ງລັດ 5 ເດືອນ ຮຸ່ນທີ XXV ຈຳນວນ 55 ຄົນ, ຍິງ 7 ຄົນ, ປະລິນຍາຕີ ຮຸ່ນທີ XXV 120 ທ່ານ, ຍິງ 28 ທ່ານ, ປະລິນຍາໂທ ຮຸ່ນທີ XV ຈໍານວນ 60 ທ່ານ, ຍິງ 11 ທ່ານ, ອະນຸປະລິນຍາ ຮຸ່ນທີ XVIII ຈໍານວນ 60 ທ່ານ, ຍິງ 11 ທ່ານ. ນອກນັ້ນ ນັກສຶກສາທີ່ກໍາລັງຮຽນຢູ່ ອະນຸປະລິນຍາ, ປະລິນຍາຕີ, ປະລິນຍາໂທ ຮຸ່ນຕ່າງໆ ລວມທັງໝົດ ຈໍານວນ 874 ຄົນ, ຍິງ 206 ຄົນ. ໃນບົດຍັງໄດ້ຍົກໃຫ້ເຫັນ ການຮຽນ-ການສອນ ເຊິ່ງໄດ້ເລີ່ມຈັດຕັ້ງມາກ່ອນແລ້ວ ແຕ່ວັນທີ 16 ກັນຍາ 2019.

  ຈາກນັ້ນ, ເພື່ອເປັນການສະແດງຄວາມຮູ້ບຸນຄຸນຂອງວັນຄູແຫ່ງຊາດ ທ່ານ ປທ ນ. ອານົງ ຂັນທະຍົງ ຮອງຫົວໜ້າສູນຂໍ້ມູນຂ່າວສານ ການເມືອງ-ການປົກຄອງ, ຮອງປະທານສະຫະພັນແມ່ຍິງ ສມປຊ ໄດ້ຕາງໜ້າຄູ-ອາຈານ ທົ່ວສະຖາບັນ ຂຶ້ນກ່າວຄຳສະດຸດີວັນຄູແຫ່ງຊາດ ແລະ ໄດ້ມີນັກສຶກສາ ຊັ້ນສູງເລັ່ງລັດ 5 ເດືອນ ຮຸ່ນທີ XXV ຕາງໜ້ານັກສຶກສາທົ່ວສະຖາບັນ ຂຶ້ນກ່າວຄຳຂອບໃຈ ແລະ ອວຍພອນຄູ.

  ເພື່ອເປັນການຢັ້ງຢືນຜົນສຳເລັດຂອງການສິດສອນຂອງຄູ ແລະ ຜົນງານການຄົ້ນຄວ້າ. ທ່ານ ປທ ນ. ພອນໄຊ ລາດຊະວົງ ຮອງຫົວໜ້າກົມຈັດຕັ້ງ-ພະນັກງານ ໄດ້ຜ່ານມະຕິຕົກລົງຂອງ ສມປຊ ວ່າດ້ວຍຍ້ອງຍໍຄູທີ່ມີຜົນງານດີເດັ່ນການສິດສອນປະຈຳປີ ຊຶ່ງມີ ເດັ່ນປະເພດ I ຈຳນວນ 25 ທ່ານ, ຍິງ 9 ທ່ານ, ປະເພດ II ຈຳນວນ 18 ທ່ານ, ຍິງ 8 ທ່ານ ແລະ ປະເພດ III ຈຳນວນ 7 ທ່ານ, ຍິງ 4 ທ່ານ ລວມ 3 ປະເພດແມ່ນຈຳນວນ 50 ທ່ານ ແລະ ດຳເນີນການມອບ-ຮັບໃບຍ້ອງຍໍ ຄູທີ່ມີຜົນງານດີເດັ່ນດັ່ງກ່າວ.

ໃນທ້າຍພິທີ ທ່ານ ຮສ ປອ ທອງສະລິດ ມັງໜໍ່ເມກ ປະທານພິທີກໍໄດ້ໂອ້ລົມຕໍ່ບັນດາຜູ້ເຂົ້າຮ່ວມທັງໝົດວ່າ: ສະຖາບັນ ຂອງພວກເຮົາແມ່ນນັບມື້ເຕີບໃຫຍ່ເຂັ້ມແຂງຂຶ້ນເລື້ອຍໆ. ຜ່ານມາສາມາດເຮັດຫຼ້ອນໜ້າທີ່ການເມືອງທີ່ພັກ-ລັດມອບໝາຍ ໃຫ້ຊຶ່ງສ້າງໄດ້ຜົນງານອັນໂດດເດັ່ນ ແລະ ປັດຈຸບັນສະຖາບັນ ພວມສືບຕໍ່ດຳເນີນການຮຽນ-ການສອນ, ບັນດາສະຫາຍທີ່ຖືກສົ່ງມາຮ່ຳຮຽນຍົກລະດັບ ໃນເທື່ອນີ້ແມ່ນຄວາມເຊື່ອໝັ້ນແມ່ນຄວາມຫວັງແມ່ນກຽດສັກສີຂອງກົມກອງທ້ອງຖິ່ນການຈັດຕັ້ງ ດັ່ງນັ້ນ ຈຶ່ງເອົາໃຈໃສ່ສິດສອນຄົ້ນຄວ້າເພື່ອບັນລຸຈຸດປະສົງຄາດໝາຍ ກາຍເປັນພະນັກງານຜູ້ທີ່ຫ້າວຫັນ ແລະ ມີຄວາມຮູ້ຄວາມສາມາດ, ກຳແໜ້ນຫຼັກມູນທິດສະດີ ເພື່ອນຳໄປແກ້ໄຂວຽກງານໃຫ້ມີປະສິດທິຜົນ.

 

ບັນນາທິການ: ທ່ານ ປທ ນ. ຄຳຮູ້ ວິລະທອນ

 

ຂ່າວ/ພາບ: ທ່ານ ຕາອັອດ ແສນທະວີສຸກ