ສະຖາບັນການເມືອງ ແລະ ການປົກຄອງແຫ່ງຊາດ ສຳເລັດການຍົກລະດັບທິດສະດີການເມືອງ ແລະການປົກຄອງ ໃຫ້ແກ່ບັນດາຄະນະບໍລິຫານງານລັດວິສາຫະກິດ ຊຸດທີ I

ໃນວັນທີ 20 ທັນວາ ເວລາ 14:30 ສະຖາບັນການເມືອງ ແລະການປົກຄອງແຫ່ງຊາດ ໄດ້ຈັດພິທີປິດຊຸດຝຶກອົບຮົມທິດສະດີການເມືອງ ແລະການປົກຄອງ ຕາມຫົວຂໍ້ສະເພາະ ໃຫ້ແກ່ຄະນະບໍລິຫານງານຂອງລັດວິສາຫະກິດ ຢູ່ຂັ້ນສູນກາງ ຊຸດທີ I, ໂດຍການເປັນປະທານ ຂອງ ທ່ານ ປທ ນ. ບຸນມີ ຈຸນລະຈັກ ຄະນະບໍລິຫານງານພັກ, ຮອງຫົວໜ້າ ສະຖາບັນການເມືອງ ແລະການປົກຄອງແຫ່ງຊາດ, ມີພະນັກງານຄູ-ອາຈານ ແລະການຈັດຕັ້ງທີ່ກ່ຽວຂ້ອງເຂົ້າຮ່ວມ.

 ໃນພິທີ ທ່ານ ປທ ແສງແກ້ວ ວົງລຳພັນ ຮອງຫົວໜ້າກົມຄຸ້ມຄອງການຮຽນ-ການສອນ ໄດ້ຜ່ານບົດສະຫຼຸບລາຍງານວ່າ: ໂດຍປະຕິບັດຕາມໂຄງການຫຼັກສູດທີ່ສະຖາບັນການເມືອງ ແລະການປົກຄອງແຫ່ງຊາດວາງອອກມານັ້ນ, ຄະນະພັກ, ຄະນະນໍາສະຖາບັນໄດ້ເປັນເຈົ້າການເອົາໃຈໃສ່ຊີ້ນໍາການຝຶກອົບຮົມທິດສະດີການເມືອງ ແລະການປົກຄອງ ໄລຍະສັ້ນໃຫ້ພະນັກງານນໍາພາ-ຄຸ້ມຄອງໃນຂົງເຂດລັດວິສາຫະກິດດ້ວຍຄວາມຮັບຜິດຊອບສູງ. ໄດ້ແຕ່ງຕັ້ງຄະນະຮັບຜິດຊອບຈັດຕັ້ງປະຕິບັດຊຸດຝຶກອົບຮົມສະບັບເລກທີ 1109/ສມປຊ, ລົງວັນທີ 21/10/2019 ຈໍານວນ 22 ທ່ານ ເຊິ່ງມີການແບ່ງງານອະນຸກໍາມະການແຕ່ລະຝ່າຍຮັບຜິດຊອບເພື່ອໃຫ້ຊຸດຝຶກອົບຮົມດໍາເນີນໄປດ້ວຍຜົນສໍາເລັດ, ມີປະສິທິພາບ ແລະປະສິດທິຜົນ. ໃນນັ້ນການຈັດຕັ້ງປະຕິບັດຝຶກອົບຮົມໃນໄລຍະ5ວັນຜ່ານມາ, ສະຖາບັນການເມືອງ ແລະການປົກຄອງແຫ່ງຊາດ ສາມາດສັງລວມໄດ້ດ້ານດີຂໍ້ສະດວກແລະບາງດ້ານທີ່ເປັນຂໍ້ຄົງຄ້າງ. ດັ່ງນີ້, ຜູ້ເຂົ້າຮ່ວມຝຶກອົບຮົມມີຄວາມຕັ້ງໃຈໃນການຄົ້ນຄວ້າສົນທະນາ ແລະຕັ້ງຄໍາຖາມຕໍ່ຄູອາຈານເມື່ອມີບັນຫາທີ່ ສົນໃຈຫຼື ບັນຫາທີ່ຍັງບໍ່ທັນເຂົ້າໃຈຢ່າງເລິກເຊິ່ງ, ມີຄວາມສາມັກຄີຮັກແພງຊ່ວຍເຫລືອຊຶ່ງກັນ ແລະກັນສູງ.

 ເຊິ່ງເນື້ອໃນຂອງຫຼັກສູດປະກອບມີ 7 ຫົວຂໍ້ ລວມທັງຫມົດ 35 ຊົ່ວໂມງ, ໃຊ້ເວລາຝຶກອົບຮົມຕົວຈິງທັງຫມົດ 5 ວັນເຕັມ ມີຜູ້ເຂົ້າຮ່ວມຝຶກອົບຮົມໃນຊຸດທີ I ມີທັງໝົດ 47 ທ່ານ, ຍິງ 3 ທ່ານ, ຕາມມະຕິຕົກລົງຂອງຄະນະຈັດຕັ້ງສູນກາງພັກສະບັບເລກທີ 468/ຄຈສພ, ລົງວັນ ທີ 4 ທັນວາ 2019. ໃນນັ້ນ, ແຍກຕໍາແໜ່ງຜູ້ເຂົ້າຮ່ວມມີຜູ້ອໍານວຍການລັດວິສາຫະກິດ 28 ທ່ານ, ຍິງ 2 ທ່ານ. ວ່າການຜູ້ອໍານວຍການ 1 ທ່ານ, ຮອງຜູ້ອໍານວຍການ 18 ທ່ານ.

ຫຼັກສູດຝຶກອົບຮົມທິດສະດີການເມືອງ-ການປົກຄອງຕາມຫົວຂໍ້ສະເພາະໃຫ້ພະນັກງານນໍາພາ-ຄຸ້ມຄອງໃນຂົງ ເຂດລັດວິສາຫະກິດແມ່ນຫນຶ່ງໃນຫຼັກສູດຝຶກອົບຮົມໄລຍະສັ້ນ (5ວັນ) ທີ່ໄດ້ກໍານົດໄວ້ໃນແຜນການຫຼັກສູດຝຶກອົບຮົມ ໄລຍະສັ້ນຂອງສະຖາບັນການເມືອງ ແລະການປົກຄອງແຫ່ງຊາດ. ຫຼັກສູດນີ້ໄດ້ຮັບການລິເລີ່ມກະກຽມຄວາມພ້ອມມາແຕ່ທ້າຍສົກ ປີ 2018 ໂດຍຜ່ານການລົງເກັບກໍາຂໍ້ມູນຄວາມຕ້ອງການຕາມຫົວຂໍ້, ຜ່ານການສຶກສາຄົ້ນຄວ້າຂໍ້ມູນຕາມຫົວຂໍ້ ສະເພາະແລະກໍານົດເນື້ອໃນເພື່ອໃຫ້ສອດຄ່ອງກັບສະພາບຄວາມເປັນຈິງຂອງການບໍລິຫານຄຸ້ມຄອງລັດວິສາຫະກິດໃນໄລຍະໃຫມ່ຫຼັກສູດດັ່ງກ່າວແມ່ນຫາກໍເລີ່ມຈັດຕັ້ງປະຕິບັດຊຸດທໍາອິດ.

ຈາກນັ້ນ, ທ່ານ ປທ ນ. ບຸນມີ ຈຸນລະຈັກ ຄະນະບໍລິຫານງານພັກ, ຮອງຫົວໜ້າ ສມປຊ ໄດ້ໃຫ້ກຽດຂຶ້ນມອບໃບຢັ້ງຢືນການຝຶກອົບຮົມໃຫ້ນັກເຝິກອົບຮົມ ຈຳນວນ 47 ທ່ານ. ພ້ອມທັງໂອ້ລົມ ແລະໃຫ້ທິດຊີ້ນຳເພື່ອເປັນເຂັມທິດເຍືອງທາງໃນການນຳພາລັດວິສາຫະກິດໃຫ້ເຕີບໃຫຍ່ຂະຫຍາຍຕົວຍິ່ງຂຶ້ນ.

ບັນນາທິການ: ທ່ານ ຄອນສະຫວັນ ແສນຍານຸພາບ

ຂ່າວ/ພາບ: ທ່ານ ຕາອັອດ ແສນທະວີສຸກ