ໂຮງຮຽນການເມືອງ ແລະການປົກຄອງແຂວງສາລະວັນ ຈັດພິທີເຝິກອົບຮົມການສິດສອນຄອມພິວເຕີ, ການຂຽນວາລະສານ ແລະການຂຽນຂ່າວ-ຖ່າຍພາບ

ເພື່ອຜັນຂະຫຍາຍໝາກຜົນທີ່ສູນຂໍ້ມູນຂ່າວສານ ສະຖາບັນການເມືອງ ແລະການປົກຄອງແຫ່ງຊາດ ໄດ້ຈັດພິທີເຝິກອົບຮົມໃຫ້ພະນັກງານ, ຄູ-ອາຈານ ໂຮງຮຽນການເມືອງ-ການປົກຄອງທ້ອງຖິ່ນ ໃນຫົວຂໍ້ "ທັກສະການສິດສອນຄອມພິວເຕີ້, ການນຳໃຊ້ປຶ້ມແບບຮຽນຄອມພິວເຕີ້ ແລະເຕັກນິກການຂຽນວາລະສານ, ການຂຽນຂ່າວ ແລະຖ່າຍພາບ" ໃນລະຫວ່າງວັນທີ 28/10- 01/11/2019 ນັ້ນ.

 

 

ດັ່ງນັ້ນ, ມາໃນວັນທີ 18 ທັນວາ 2019 ທີ່ ໂຮງຮຽນການເມືອງ-ການປົກຄອງ ແຂວງສາລະວັນ ໄດ້ຈັດພິທີເຝິກອົບຮົມວຽກງານການສິດສອນຄອມພິວເຕີ້, ການຂຽນວາລະສານ ແລະການຂຽນຂ່າວ-ຖ່າຍພາບ ຄັ້ງທີ 1 ຂຶ້ນ, ໂດຍໃຫ້ກຽດເຂົ້າຮ່ວມຂອງທ່ານ ຈັນທະວອນ ສີຫາຈັກ ຮອງເລຂາໜ່ວຍພັກ, ຮອງຫົວໜ້າໂຮງຮຽນການເມືອງ-ການປົກຄອງແຂວງ ແລະມີພະນັກງານ, ຄູ-ອາຈານພາຍໃນໂຮງຮຽນເຂົ້າຮ່ວມ ທັງໝົດມີ 15 ທ່ານ, ຍິງ 5 ທ່ານ.

 

     ການຈັດຕັ້ງຝຶກອົບຮົມໃນຄັ້ງນີ້ ແມ່ນການຍົກລະດັບຄວາມຮູ້, ຄວາມສາມາດ ໃຫ້ແກ່ພະນັກງານຄູ-ອາຈານ ພາຍໃນໂຮງຮຽນ ໄດ້ຮັບຮູ້ ແລະເຂົ້າໃຈໃນການຂຽນບົດຄົ້ນຄວ້າການເມືອງ ແລະການປົກຄອງໃນລະບອບປະຊາທິປະໄຕປະຊາຊົນ, ຮູ້ວິທີການຂຽນຂ່າວ ແລະເຜີຍຂ່າວສານໃນຍຸກປັດຈຸບັນ ເຊິ່ງແມ່ນຍຸກຂໍ້ມູນຂ່າວສານທາງລະບົບຄອມພິວເຕີ້ ເປັນຍຸກທີ່ມີການເຜີຍແຜ່ ແລະຮັບຂໍ້ມູນຂ່າວສານແບບໄຮ້ພົມແດນ. ດັ່ງນັ້ນ, ການສຶກສາຄົ້ນຄວ້າໃນລະບົບສື່ຕ່າງໆຜ່ານລະບົບຄອມພິວເຕີ້ຈິ່ງມີຄວາມສຳຄັນ ແລະຈຳເປັນ ທີ່ພວກເຮົາຕ້ອງໄດ້ກ້າວຕາມໃຫ້ທັນກັບສິ່ງປ່ຽນແປງຕາມຍຸກສະໄໝ ເພື່ອບໍໃຫ້ຕົກເປັນເຫຍື່ອຂອງຂ່າວສານທີ່ບໍ່ມີການຈັດຕັ້ງ.   ໂອກາດນີ້ຜູ້ເຂົ້າຮ່ວມຝຶກອົບຮົມຍັງໄດ້ມີການຄົ້ນຄວ້າແລກປ່ຽນຄໍາຄິດ, ຄໍາເຫັນ, ບາງບັນຫາສໍາຄັນ ພ້ອມກັນນໍາໄປຈັດຕັ້ງປະຕິບັດ ໃນໜ້າທີ່ວຽກງານຂອງຕົນ ໃຫ້ມີຄວາມເຂັ້ມແຂງຂຶ້ນເທື່ອລະກ້າວ.

 

ຕອນທ້າຍຍັງໄດ້ຮັບຟັງການໂອ້ລົມຂອງທ່ານ ຈັນທະວອນ ສີຫາຈັກ ຮອງເລຂາໜ່ວຍພັກ, ຮອງຫົວໜ້າໂຮງຮຽນການເມືອງ-ການປົກຄອງແຂວງຕື່ມອີກ ຊຶ່ງທ່ານກໍໄດ້ສະແດງຄວາມເປັນເອກະພາບ ແລະຍ້ອງຍໍຊົມເຊີຍຕໍ່ຄວາມຮັບຜິດຊອບອັນສູງສົ່ງຂອງຄະນະຮັບຜິດຊອບ ວິທະຍາກອນ ທີ່ໄດ້ເອົາໃຈໃສ່ ສິດສອນສົ່ງຄວາມຮູ້ປະສົບການໃຫ້ແກ່ຜູ້ເຂົ້າຮ່ວມຊຸດຝຶກອົບຮົມວຽກງານ ການສິດສອນຄອມພິວເຕີ, ວຽກງານຂຽນວາລະສານ ແລະວຽກງານການຂຽນຂ່າວ-ຖ່າຍພາບ ໃນຄັ້ງນີ້ປະສົບຜົນສໍາເລັດຢ່າງສະຫງ່າງາມ.

ບັນນາທິການ: ທ່ານ ຄອນສະຫວັນ ແສນຍານຸພາບ

ຂ່າວ: ຄໍາໃບ ວົງຫາເທບ