ສະຖາບັນການເມືອງ ແລະ ການປົກຄອງແຫ່ງຊາດ ປະກາດການຈັດຕັ້ງພະນັກງານເຂົ້າໃສ່ຕຳແໜ່ງບໍລິຫານຂັ້ນກົມ

ໃນຕອນເຊົ້າວັນທີ 25/12/2019 ທີ່ຫ້ອງປະຊຸມໃຫຍ່ ຕຶກສູນຂໍ້ມູນຂ່າວສານ ຊັ້ນ 1, ສະຖາບັນການເມືອງ ແລະການປົກຄອງແຫ່ງຊາດ ໄດ້ປະກາດການຈັດຕັ້ງຂັ້ນກົມຂຶ້ນ, ພາຍໃຕ້ການເປັນປະທານ ຂອງທ່ານ ຮສ ພູວົງ ອຸ່ນຄຳແສນ ຮັກສາການເລຂາຄະນະບໍລິຫານງານງານພັກ, ຮັກສາການຫົວໜ້າ ສະຖາບັນການເມືອງ ແລະການປົກຄອງແຫ່ງຊາດ, ມີ ບັນດາຕາງໜ້າ ຄະນະຂັ້ນກົມ, ຫ້ອງການ, ຄະນະວິຊາ, ຄະນະສູນ ແລະພະນັກງານທີ່ກ່ຽວຂ້ອງເຂົ້າຮ່ວມ.

 ໃນພິທີ ທ່ານ ປທ ນ. ໃບຊ່ຽນ ມູນຕີວົງ ຄະນະບໍລິຫານງານພັກ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງພະນັກງານເຂົ້າໃສ່ຕຳແໜ່ງບໍລິຫານຄືດັ່ງລຸ່ມນີ້:

1.  ທ່ານ ປທ ນ. ວະໄລລັກ ອະໄພ ຮອງຫົວໜ້າສູນຂໍ້ມູນຂ່າວສານ ການເມືອງ ແລະການປົກຄອງ ຂຶ້ນເປັນ ຜູ້ຮັກສາການຫົວໜ້າສູນຂໍ້ມູນຂ່າວສານການເມືອງ ແລະການປົກຄອງ.

2.  ທ່ານ ປທ ອິນທະວົງ ໂຄດປັນຍາ ຮອງຫົວໜ້າຫ້ອງການ ຂຶ້ນເປັນຜູ້ຮັກສາການຫົວໜ້າ ຄະນະເສດຖະສາດການເມືອງ ແລະຄຸ້ມຄອງເສດຖະກິດ.

ໃນຕອນທ້າຍພິທີ ທ່ານ ຮສ ພູວົງ ອຸ່ນຄຳແສນ  ໄດ້ໃຫ້ທິດຊີ້ນຳ ແລະໂອ້ລົມທີ່ມີຄວາມໝາຍສຳຄັນວ່າ ການແຕ່ງຕັ້ງໃນຄັ້ງນີ້ ແມ່ນອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່, ພ້ອມທັງຮຽກຮ້ອງໃຫ້ຜູ້ທີ່ໄດ້ຮັບການແຕ່ງຕັ້ງນີ້ສືບຕໍ່ເພີ່ມທະວີເຕົ້າໂຮມຄວາມສາມັກຄີເປັນປຶກແຜ່ນແໜ້ນໜາພາຍໃນການຈັດຕັ້ງທີ່ຕົນນຳພາ, ເປັນກຳລັງແຮງໃນການປະຕິບັດໜ້າທີ່ວຽກງານໃຫ້ມີຜົນສຳເລັດສູງຂຶ້ນໄປເລື່ອຍໆ. ພ້ອມກັນນັ້ນ, ກໍໄດ້ເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງເອົາໃຈໃສ່ຈັດຕັ້ງປະຕິບັດໜ້າທີ່ວຽກງານ,  ກ້າເຮັດກ້າຕັດສິນໃຈ ແລະຍົກສູງຄວາມຮັບຜິດຊອບ ໃນການປະຕິບັດໜ້າທີ່ວຽກງານໃໝ່ທີ່ຕົນເອງໄດ້ຮັບມອບໝາຍ,​ ດ້ວຍການເພີ່ມທະວີບົດບາດຂອງຕົນຢ່າງຕັ້ງໜ້າ ແລະເປັນແບບຢ່າງທີ່ດີ ຊີ້ນຳ-ນຳພາສຶກສາອົບຮົມໃຫ້ພະນັກງານໃຫ້ມີສະຫງົບຄວາມອຸ່ນອຽນທຸ່ນທ່ຽງແລະໜັກແໜ້ນຍິ່ງຂຶ້ນ.

ບັນນາທິການ: ທ່ານ ຄອນສະຫວັນ ແສນຍານຸພາບ

ຂ່າວ/ພາບ: ທ່ານ ຕາອັອດ ແສນທະວີສຸກ