ໜ່ວຍພັກຮາກຖານ ຄະນະປັດຊະຍາ-ຄະນະກໍ່ສ້າງພັກ ແລະປະຫວັດສາດພັກ ຈັດກອງປະຊຸມສະຫຼຸບການຈັດຕັ້ງປະຕິບັດ ແລະຜ່ານແຜນການກໍ່ສ້າງໜ່ວຍພັກ

 

 ໃນເວລາ 13:30 ນາທີ ຂອງວັນທີ 14 ມັງກອນ 2020 ໜ່ວຍພັກຮາກຖານຄະນະປັດຊະຍາ-ຄະນະກໍ່ສ້າງພັກ ແລະປະຫວັດສາດພັກ ໄດ້ຈັດກອງປະຊຸມຮັບຮອງໜ່ວຍພັກປອດໃສເຂັ້ມແຂງໜັກແໜ້ນ ປະຈຳປີ 2020 ຂຶ້ນພາຍໃຕ້ການເປັນປະທານຂອງສະຫາຍ ປທ ນ. ບຸນມີ ຈຸນລະຈັກ ຄະນະບໍລິຫານງານພັກ, ປະທານກວດກາພັກ-ລັດ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ; ສະຫາຍ ປທ ແສງທອງ ພຸດທະວົງ ເລຂາໜ່ວຍພັກຮາກຖານຄະນະປັດຊະຍາ-ຄະນະກໍ່ສ້າງພັກ ແລະປະຫວັດສາດພັກ ພ້ອມດ້ວຍຄະນະພັກ ແລະສະມາຊິກພັກເຂົ້າຮ່ວມທັງໝົດ 13 ສະຫາຍ, ຍິງ 3 ສະຫາຍ ພ້ອມແຂກທີ່ຖືກເຊີນ 7 ສະຫາຍ, ຍິງ 2 ສະຫາຍ.

 

 ສະຫາຍ ປທ ແສງທອງ ພຸດທະວົງ ເລຂາໜ່ວຍພັກຮາກຖານໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສເຂັ້ມແຂງ, ໜັກແໜ້ນ ໃນໄລຍະຜ່ານມາ ແລະຜ່ານທິດທາງແຜນການໃນປີ 2020. ຫຼັງຈາກນັ້ນບັນດາແຂກທີ່ເຂົ້າຮ່ວມກອງປະຊຸມກໍໄດ້ປະກອບຄໍາຄິດຄໍາເຫັນໃສ່ແຜນການກໍ່ສ້າງໜ່ວຍພັກປອດໃສ, ເຂັມແຂງ, ໜັກແໜ້ນຢ່າງກົງໄປກົງມາ ເພື່ອເຮັດໃຫ້ເນື້ອໃນແຜນ ການສົມບູບຄົບຖ້ວນຂຶ້ນຕື່ມ ຈາກນັ້ນ ສະມາຊິກພັກທີ່ເຂົ້າຮ່ວມກອງປະຊຸມກໍໄດ້ເປັນເອກະພາບເຫັນດີຮັບຮອງເອົາແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2020.

 ເຊິ່ງໄດ້ວ່າງຄາດໝາຍໃນແຕ່ລະດ້ານດັ່ງນີ້:

1. ດ້ານການເມືອງ ຕ້ອງສູ້ຊົນປະຕິບັດໃຫ້ບັນລຸໄດ້ 1,8 ຄະແນນຂຶ້ນໄປ.

2. ດ້ານແນວຄິດ ຕ້ອງສູ້ຊົນປະຕິບັດໃຫ້ບັນລຸໄດ້ 1,4 ຄະແນນຂຶ້ນໄປ.

3. ດ້ານການຈັດຕັ້ງ ຕ້ອງສູ້ຊົນປະຕິບັດໃຫ້ບັນລຸໄດ້ 1,3 ຄະແນນຂຶ້ນໄປ.

4. ດ້ານແບບແຜນວິທີນໍາພາ ຕ້ອງສູ້ຊົນປະຕິບັດໃຫ້ບັນລຸໄດ້ 1,8 ຄະແນນຂຶ້ນໄປ.

5. ດ້ານການນໍາພາປະຕິບັດໜ້າທີ່ການເມືອງ ຕ້ອງສູ້ຊົນປະຕິບັດໃຫ້ບັນລຸໄດ້ 2,8 ຄະແນນຂຶ້ນໄປ.

ໃນກອງປະຊຸມ, ສະຫາຍ ປທ ນ. ບຸນມີ ຈຸນລະຈັກ ປະທານກອງປະຊຸມ ໄດ້ໃຫ້ຄຳໂອ້ລົມ ໂດຍເນັ້ນໜັກໃຫ້ຄະນະໜ່ວຍພັກນຳພາສະມາຊິກພັກ ຈັດຕັ້ງປະຕິບັດແຜນການກໍ່ສ້າງໜ່ວຍພັກທີ່ໄດ້ວາງໄວ້ໃຫ້ໄດ້ຮັບຜົນດີ, ຮັກສາໄດ້ມູນເຊື້ອສາມັກຄີປອງດອງ, ເປັນເອກະພາບຢ່າງແໜ້ນແຟ້ນ, ຕ້ານແນວຄິດຫຼາຍພັກຫຼາຍເຄົ້າຈຸ້ມເຈື້ອພັກພວກ ແລະກຸ່ມກ້ອນຢູ່ພາຍໃນການຈັດຕັ້ງພັກ, ປັບປຸງພັກເຮັດໃຫ້ສະມາຊິກພັກທຸກຄົນປະຕິບັດກົດລະບຽບຂອງພັກ ກົດໝາຍຂອງລັດຢ່າງເຂັ້ມງວດ, ທັງເປັນແບບຢ່າງທີ່ດີ ໃຫ້ແກ່ມະຫາຊົນໃນການເຄື່ອນໄຫວ,ດໍາລົງຊີວິດດ້ວຍຄວາມປອດໃສບໍ່ໃຫ້ເກີດປະກົດການຫຍໍ້ທໍ້ພາຍໃນໜ່ວຍພັກ.

ຂ່າວ: ທ່ານ ນ. ເພັດສະດີ ຄັນທະວົງ

ພາບໂດຍ: ທ່ານ ສຸກສະຫວັນ ດວງສະຫງ່າ

ບັນນາທິການ: ທ່ານ ຄອນສະຫວັນ ແສນຍານຸພາບ