ໂຮງຮຽນການເມືອງ ແລະການປົກຄອງ ແຂວງວຽງຈັນ ຈັດພິທີປິດຊຸດຮຽນທິດສະດີການເມືອງ ແລະການປົກຄອງ ລະບົບຊັ້ນກາງຮຸ່ນທີ XII

ໃນຕອນເຊົ້າຂອງວັນທີ 17 ມັງກອນ 2020 ຢູ່ທີ່ໂຮງຮຽນການເມືອງ ແລະການປົກຄອງ ແຂວງວຽງຈັນ ໄດ້ຈັດພິທີປິດຊຸດຮຽນທິດສະດີການເມືອງ ແລະການປົກຄອງ ລະບົບຊັ້ນກາງຮຸ່ນທີ XII ຂຶ້ນຢ່າງເປັນທາງການ ໂດຍການເປັນປະທານ ຂອງທ່ານ ອຸ່ນແສງ ແກ້ວດາວັນ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງ ແຂວງວຽງຈັນ, ມີທ່ານ ຮສ ພູວົງ ອຸ່ນຄໍາແສນ ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າສະຖາບັນການເມືອງ ແລະການປົກຄອງແຫ່ງຊາດ, ມີທ່ານ ສົມຄິດ ອິນທະວົງ ເລຂາໜ່ວຍພັກ, ຫົວໜ້າໂຮງຮຽນການເມືອງ ແລະການປົກຄອງແຂວງ, ມີບັນດາທ່ານຕາງໜ້າບັນດາພະແນກການຂອງແຂວງ, ຄູ-ອາຈານ ແລະນັກສຶກສາ ເຂົ້າຮ່ວມຢ່າງພ້ອມພຽງ.

 ໃນພິທີ ທ່ານ ສົມຄິດ ອິນທະວົງ ເລຂາໜ່ວຍພັກ ຫົວໜ້າໂຮງຮຽນການເມືອງ ແລະການປົກຄອງ ແຂວງວຽງຈັນໄດ້ຂຶ້ນຜ່ານບົດສະຫຼຸບຜົນການຈັດຕັ້ງປະຕິບັດຫຼັກສູດການຮຽນ-ການສອນ ເຊິ່ງທ່ານໄດ້ຍົກ ໃຫ້ເຫັນດ້ານດີ ແລະຜົນສໍາເລັດໃນໄລຍະຜ່ານມາທີ່ນັກສຶກສາຮຸ່ນທີ XII ຈໍານວນ 60 ສະຫາຍ, ຍິງ 20 ສະຫາຍ ໄດ້ມີຜົນສຳເລັດໃນການຄົ້ນຄວ້າຮໍ່າຮຽນ ເຊິ່ງສະແດງອອກດັ່ງນີ້: ການກວດກາແຕ່ລະວິຊາໃນນັ້ນມີ ຄະແນນ ເກຼດ A ກວມເອົາ 70%, ຄະແນນເກຼດ  B+ ກວມເອົາ 24.6%, ຄະແນນເກຼດ B ກວມເອົາ 5% ແລະເກຼດ C+ ກວມ 0.4%; ການສອບເສັງລະດັບ ສມປຊ (ສອບເສັງປາກເປົ່າ) ມີ 6 ວິຊາຫຼັກຄື: ວິຊາປັດຊະຍາມາກ-ເລນິນ ຄະແນນເກຼດ A ກວມເອົາ  45%, ຄະແນນເກຼດ  B+ ກວມເອົາ 43.3%, ຄະແນນເກຼດ B ກວມເອົາ 11.7%;  ວິຊາເສດຖະສາດການເມືອງມາກ-ເລນິນ ເກຼດ A ກວມເອົາ 55%, ຄະແນນເກຼດ B+ ກວມເອົາ 41.7%, ຄະແນນເກຼດ B ກວມເອົາ 3.3%; ວິຊາ ລັດທິສັງຄົມນິຍົມວິທະຍາສາດ ເກຼດ A ກວມເອົາ 66.7%, ຄະແນນເກຼດ B+ ກວມເອົາ 26.7%, ຄະແນນເກຼດ B ກວມເອົາ 6.6%;ວິຊາການປົກຄອງ ຄະແນນເກຼດ A ກວມເອົາ 78.4%, ຄະແນນເກຼດ B+ ກວມເອົາ 18.3%, ຄະແນນເກຼດ B ກວມເອົາ 3.3%; ວິຊາກໍ່ສ້າງພັກ ຄະແນນເກຼດ A ກວມເອົາ  78.4%, ຄະແນນເກຼດ  B+ ກວມເອົາ 21.3%, ຄະແນນເກຼດ B ກວມເອົາ 3.3%; ວິຊາຂົນຂວາຍກໍ່ສ້າງຮາກຖານການເມືອງ ຄະແນນເກຼດ A ກວມເອົາ  91.6%, ຄະແນນເກຼດ  B+ ກວມເອົາ 8.4% ແລະຜົນການປ້ອງກັນບົດຈົບຊັ້ນ ຄະແນນເກຼດ A ກວມເອົາ  93.4%, ຄະແນນເກຼດ  B+ ກວມເອົາ 6.6%. ພ້ອມກັນນັ້ນ,ທ່ານຍັງໄດ້ຍົກໃຫ້ເຫັນການປະກອບສ່ວນໃນການພັດທະນາໂຮງຮຽນ ຂອງບັນດາສະຫາຍນັກສຶກສາ ເປັນຈໍານວນເງິນ 15 ລ້ານກວ່າກີບ.

        ພາຍຫຼັງການຮັບຟັງບົດສະຫຼຸບແລ້ວ ທ່ານ ທອງວັນ ຈັນທະລາ ຮອງເລຂາໜ່ວຍພັກ, ຮອງຫົວໜ້າໂຮງຮຽນ ກໍ່ໄດ້ຂຶ້ນກ່າວມອບນັກສຶກສາຄືນໃຫ້ຄະນະຈັດຕັ້ງແຂວງເພື່ອບັນຈຸຊັບຊ້ອນໃສ່ໜ້າທີ່ວຽກງານຕາມຄວາມເໝາະສົມ ແລະຂຶ້ນກ່າວຮັບນັກສຶກສາໂດຍທ່ານ ສອນໄຊ ຫຼວງອາໄພ ຮອງຫົວໜ້າຄະນະຈັດຕັ້ງ ແຂວງວຽງຈັນ.

     ໃນຕອນທ້າຍພິທີຍັງໄດ້ຮັບຟັງການໂອ້ລົມຈາກທ່ານປະທານກອງປະຊຸມ ເຊິ່ງໄດ້ສະແດງຄວາມຊົມເຊີຍຕໍ່ຜົນ ສໍາເລັດທີ່ຄູ-ອາຈານ ແລະນັກສຶກສາຍາດມາໄດ້. ພ້ອມນັ້ນ, ທ່ານຍັງໄດ້ຝາກຄວາມຫວັງນຳນັກສຶກສາຜູ້ທີ່ຮຽນ ຈົບໃນຄັ້ງນີ້ ທີ່ຈະນຳເອົາຄວາມຮູ້ທາງດ້ານທິດສະດີ ມາກ-ເລນິນ, ແນວທາງນະໂຍບາຍຂອງພັກ ແລະບັນດາລະບຽບ ການນິຕິກຳຂອງລັດ ໄປໝູນໃຊ້ຜັນຂະຫຍາຍເຂົ້າໃນການຈັດຕັ້ງປະຕິບັດວຽກງານຕົວຈິງ ຂອງຕົນໃຫ້ເກີດດອກອອກຜົນ ຍ້ອນວ່າທິດສະດີ ມາກ-ເລນິນ ແມ່ນທິດສະດີວິທະຍາສາດ ແມ່ນທິດສະດີປະຕິວັດຂອງພັກເຮົາຖ້າພະນັກງານສະມາຊິກພັກຫາກບໍ່ໄດ້ ຜ່ານທິດສະດີການເຮັດວຽກງານ, ການຊີ້ນໍາ-ນໍາພາກໍ່ຍາກ ຄືດັ່ງ ເລນິນໄດ້ເວົ້າວ່າ: ບໍ່ມີ ທິດສະດີປະຕິວັດ ກໍບໍ່ມີຂະບວນການປະຕິວັດ.

 

ຂຽນຂ່າວໂດຍ: ອາຈານ ສະຫວ່າງ ຊາມຸນຕີ 

ບັນນາທິການ: ທ່ານ ຄອນສະຫວັນ ແສນຍານຸພາບ