ຊົມເຊີຍສະມາຊິກພັກສົມບູນໃໝ່ຂອງ 2 ໜ່ວຍພັກຮາກຖານ

   

     ໃນວັນທີ 22-23 ມັງກອນ 2020 ທີ່ຜ່ານມາ, ໜ່ວຍພັກຮາກຖານກົມຄຸ້ມຄອງການຄົ້ນຄວ້າວິທະຍາ ສາດ-ກົມຄຸ້ມຄອງການຮຽນ-ການສອນ ແລະໜ່ວຍພັກຮາກຖານສູນຂໍ້ມູນຂ່າວສານ-ສູນຄົ້ນຄວ້າແນວຄິດ ໄກສອນ ພົມວິຫານ ໄດ້ຈັດພິທີເລື່ອນສະມາຊິກພັກສຳຮອງເປັນສະມາຊິກພັກສົມບູນ, ໂດຍການເຂົ້າຮ່ວມເປັນປະທານຂອງ ສະຫາຍ ຮສ ພູວົງ ອຸ່ນຄຳແສນ ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າ ສມປຊ.

 

        ພາຍໃນພິທີ ສະຫາຍ ຄຳໄຊ ມະນີລຸນ, ສະຫາຍ ທົງໄຊ ວົງແພງສີ, ສະຫາຍ ປທ ໜູແກ້ວ ດີລາວົງ (ໜ່ວຍພັກຮາກຖານກົມຄຸ້ມຄອງການຄົ້ນຄວ້າວິທະຍາສາດ ແລະກົມຄຸ້ມຄອງການຮຽນ-ການສອນ) ແລະ ສະຫາຍ ນ. ສົົມເພັດ ມະນີວົງ (ໜ່ວຍພັກຮາກຖານ ສູນຂໍ້ມູນຂ່າວສານ ແລະສູນຄົ້ນຄວ້າແນວຄິດ ໄກສອນ ພົມວິຫານ) ຂຶ້ນຜ່ານຄຳຮ້ອງຂໍເລື່ອນເຂົ້າເປັນສະມາຊິກພັກສົມບູນ. ເຊິ່ງທັງ 4 ສະຫາຍ ແມ່ນໄດ້ຜ່ານສະໄໝສຳຮອງ 12 ເດືອນ ເຊິ່ງຕະຫຼອດໄລຍະສະໄໝສໍາຮອງ ບັນດາສະຫາຍທັງ 4 ໄດ້ຜ່ານການສຶກສາອົບຮົມ, ກໍ່ສ້າງ ແລະທົດສອບໃນວຽກງານຕົວຈິງ ຈົນສາມາດຕີລາຄາໄດ້ວ່າບັນດາສະຫາຍເຫຼົ່ານີ້ ໄດ້ມີຄວາມຫ້າວຫັນໃນການປະຕິບັດໜ້າທີ່ວຽກງານກໍຄືການສຶກສາຮໍ່າຮຽນມີຄວາມສາມັກຄີ, ມີຄວາມເປັນແບບຢ່າງຕັ້ງໜ້າຝຶກຝົນຫຼໍ່ຫຼອມຕົນເອງຈົນໄດ້ຮັບຄວາມໄວ້ເນື້ອເຊື່ອໃຈຈາກສະມາຊິກພັກພາຍໃນໜ່ວຍເປັນຢ່າງດີ.

ຫຼັງຈາກນັ້ນ, ຕາງໜ້າພະແນກພັກ, ກົມຈັດຕັ້ງ-ພະນັກງານ ໄດ້ຂຶ້ນຜ່ານມະຕິຕົກລົງວ່າດ້ວຍການອະນຸມັດເລື່ອນສະມາຊິກພັກສຳຮອງ ທັງ 4 ສະຫາຍ ເປັນສະມາຊິກພັກສົມບູນ. ຫຼັງຈາກນັ້ນ, ເລຂາໜ່ວຍພັກຮາກຖານຂອງທັງ 2 ໜ່ວຍ ໄດ້ຂຶ້ນກ່າວຮັບມະຕິຕົກລົງ ແລະມອບມະຕິຕົກລົງໃຫ້ບັນດາສະຫາຍທີ່ໄດ້ເລື່ອນເປັນສະມາຊິກພັກສົມບູນນັ້ນ ເພື່ອເປັນເອກະສານສຳຄັນໃນການອ້າງອີງຕໍ່ໄປ.

ໂອກາດດຽວກັນນີ້ສະຫາຍ ຮສ ພູວົງ ອຸ່ນຄຳແສນ ໄດ້ສະແດງຄວາມຊົມເຊີຍຕໍ່ທັງ 2 ໜ່ວຍພັກຮາກຖານທີ່ສ້າງໄດ້ສະມາຊິກພັກໃໝ່ ແລະສະແດງຄວາມຍິນດີຮັບເອົາພວກສະຫາຍ ເຂົ້າເປັນສະມາຊິກພັກສົມບູນຂອງພັກປະຊາຊົນປະຕິວັດລາວ. ພ້ອມກັນນັ້ນທ່ານຍັງໄດ້ໃຫ້ຄຳເຫັນຕໍ່ກັບສະມາຊິກພັກສົມບູນໃໝ່ ຈົ່ງໄດ້ເອົາໃຈໃສ່ສືບຕໍ່ກໍ່ສ້າງຕົນເອງ ໃຫ້ມີຄວາມຮັດແໜ້ນເຂັ້ມແຂງ ຊອກຮູ້ໃນປື້ມກົດລະບຽບພັກຕື່ມ ເພື່ອໃຫ້ມີທັດສະນະຫຼັກໝັ້ນທີ່ແໜ້ນແກ່ນຍຶດໝັ້ນອຸດົມການການເມືອງ ແລະປະຕິບັດໜ້າທີ່ວຽກງານການສຶກສາຮ່ຳຮຽນວິຊາສະເພາະຂອງຕົນໃຫ້ມີຄວາມກ້າວໜ້າຍິ່ງໆຂຶ້ນ.

ຂ່າວ/ພາບ: ທ່ານ ຕາອັອດ ແສນທະວີສຸກ

 

ບັນນາທິການ: ຄອນສະຫວັນ ແສນຍານຸພາບ