ຄະນະຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ ຈັດກອງປະຊຸມສະຫຼຸບວຽກງານໄລຍະຜ່ານມາ

   ໃນຕອນເຊົ້າຂອງວັນທີ 28 ມັງກອນ 2020 ທີ່ຜ່ານມາ ຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ ໄດ້ຈັດກອງປະຊຸມເພື່ອສະຫຼຸບການເຄື່ອນໄຫວວຽກງານໃນໄລຍະຜ່ານມາຂຶ້ນ ຢູ່ທີ່ຫ້ອງປະຊຸມໃຫຍ່ ຕຶກສູນຂໍ້ມູນຂ່າວສານ ສະຖາບັນການເມືອງ ແລະການປົກຄອງແຫ່ງຊາດ. ໂດຍພາຍໃຕ້ການເປັນປະທານ ຂອງ ທ່ານ ປອ ຄຳພັນ ພົມມະທັດ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ຫົວໜ້າຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ; ມີທ່ານ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງ, ທີ່ປຶກສາຄະນະບໍລິຫານງານສູນກາງພັກ ສະໄໝທີ X, ຜູ້ຊີ້ນຳວຽກງານຄົ້ນຄວ້າແນວຄິດໄກສອນ ພົມວິຫານ, ທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ຫົວໜ້າຫ້ອງວ່າການສູນກາງພັກ; ມີທ່ານ ຮສ ພູວົງ ອຸ່ນຄຳແສນ ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າ ສະຖາບັນການເມືອງ ແລະການປົກຄອງແຫ່ງຊາດ, ຮອງຜູ້ປະຈຳການຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິຫານ.

        ໃນພິທີ ທ່ານ ຮສ ພູວົງ ອຸ່ນຄຳແສນ ຕາງໜ້າ ສມປຊ ໃນຖານະເປັນເສນາທິການໃຫ້ແກ່ຄະນະຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ ໄດ້ຂຶ້ນລາຍງານການເຄື່ອນໄຫວໃນໄລຍະ 1 ປີຜ່ານມາວ່າ: ໄດ້ຍົກໃຫ້ຜົນສຳເລັດເບື້ອງຕົ້ນໃນການຄົ້ນຄວ້າແນວຄິດ ໄກສອນ ພົມວິຫານ ໃນປີ 2019 ມີຄື:

         ໜຶ່ງ, ໄດ້ຈັດກອງປະຊຸມສໍາມະນາຕາມຫົວຂໍ້ສະເພາະກ່ຽວກັບວິທີວິທະຍາໃນການຄົ້ນຄວ້າແນວຄິດ ໂຮ່ຈີມິນ ແລະ ແນວຄິດໄກສອນ ພົມວິຫານ.

         ສອງ, ຄະນະຮັບຜິດຊອບໄດ້ສ້າງແຜນການຄົ້ນຄວ້າແນວຄິດໄກສອນ ພົມວິຫານ ໄລຍະປີ 2019-2020 ໂດຍສຸມໃສ່ 5 ຂົງເຂດຄື: ຂົງເສດຖະກິດ; ຂົງເຂດອຳນາດລັດ; ຂົງເຂດວຽກພັກ-ພະນັກງານ, ແນວໂຮມ ແລະອົງການຈັດຕັ້ງມະຫາຊົນ; ຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ ແລະຂົງເຂດການຕ່າງປະເທດ.

         ສາມ, ສຳເລັດການເຜີຍແຜ່ມະຕິຂອງກົມການເມືອງສູນກາງພັກ ວ່າດ້ວຍການຄົ້ນຄວ້າແນວຄິດໄກສອນ ພົມວິຫານ ໃຫ້ບັນດາອົງການຈັດຕັ້ງພັກ-ລັດທັງໃນສູນກາງ ແລະທ້ອງຖິ່ນ.

         ສີ່,  ໄດ້ຮິບໂຮມເອກະສານກ່ຽວກັບການເຄື່ອນໄຫວຂອງປະທານ ໄກສອນ ພົມວິຫານ ເປັນຕົ້ນແມ່ນ ເອກະສານທີ່ເປັນບົດໂອ້ລົມ, ບົດກ່າວຄໍາປາໄສ, ບົດສູນທອນພົດ ແລະປື້ມຕ່າງໆກ່ຽວກັບການເຄື່ອນໄຫວຕ່າງໆຂອງປະທານ ໄກສອນ ພົມວິຫານ.

      ນອກຈາກຜົນສຳເລັດຂ້າງເທິງນັ້ນ, ຍັງເຫັນໄດ້ບັນດາຂໍ້ຫຍຸ້ງຍາກໃນການເຄື່ອນໄຫວວຽກງານຂອງຄະນະຮັບຜິດຊອບ ເປັນຕົ້ນແມ່ນ ບາງອົງການຈັດຕັ້ງທັງສູນກາງ ແລະທ້ອງຖິ່ນຍັງບໍ່ໄດ້ສ້າງຕັ້ງຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິຫານ ຂຶ້ນເທື່ອ ຈຶ່ງພົບຄວາມຫຍຸ້ງຍາກໃນການປະສານງານ ແລະລົງເກັບກຳຂໍ້ມູນ.

         ນອກຈາກນັ້ນ, ບັນດານັກວິທະຍາສາດທີ່ເຂົ້າຮ່ວມກອງປະຊຸມຍັງໄດ້ປະກອບຄຳເຫັນໃສ່ຫົວຂໍ້ຄົ້ນຄວ້າ ໂຄງການຄົ້ນຄວ້າແນວຄິດໄກສອນ ພົມວິຫານ ຫຼັງປີ 2020 ເພື່ອນຳເຂົ້າບົດວິພາກ. ເຊິ່ງໄດ້ແບ່ງອອກເປັນ 2 ຂົງເຂດໃຫຍ່ຄື:

I.          ຂົງເຂດແນວຄິດ ມີ 5 ຫົວຂໍ້ຄື:

1.   ແນວຄິດໄກສອນ ພົມວິຫານ ກ່ຽວກັບການປະຕິວັດຊາດປະຊາທິປະໄຕ.

2.   ແນວຄິດໄກສອນ ພົມວິຫານ ກ່ຽວກັບສັງຄົມນິຍົມ ແລະເສັ້ນທາງກ້າວຂຶ້ນສັງຄົມນິຍົມ.

3.   ແນວຄິດໄກສອນ ພົມວິຫານ ກ່ຽວກັບຄວາມສາມັກຄີປອງດອງຊາດ.

4.   ແນວຄິດໄກສອນ ພົມວິຫານ ກ່ຽວກັບການສົມທົບ ລະຫວ່າງ ກຳລັງແຮງຂອງຊາດ ແລະກຳລັງແຮງສາກົນ.

5.   ແນວຄິດໄກສອນ ພົມວິຫານ ກ່ຽວກັບວຽກງານກໍ່ສ້າງພັກປະຊາຊົນປະຕິວັດລາວ.

II.        ຂົງເຂດການຄົ້ນຄວ້າປະຫວັດການເຄື່ອນໄຫວຂອງປະທານ ໄກສອນ ພົມວິຫານ ມີ 3 ຫົວຂໍ້:

1.   ການເຄື່ອນໄຫວປະຕິວັດ ຂອງປະທານໄກສອນ ພົມວິຫານ ກ່ອນປີ 1955.

2.   ການເຄື່ອນໄຫວປະຕິວັດ ຂອງປະທານໄກສອນ ພົມວິຫານ ແຕ່ປີ 1955-1975

3.   ການເຄື່ອນໄຫວປະຕິວັດ ຂອງປະທານໄກສອນ ພົມວິຫານ ແຕ່ປີ 1975-1991

         ໃນຕອນທ້າຍຂອງກອງປະຊຸມທ່ານ ປອ ຄຳພັນ ພົມມະທັດ ປະທານພິທີ ໄດ້ໃຫ້ທິດຊີ້ນຳ ແລະ ໂອ້ລົມຕໍ່ກັບ ຄະນະຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ ຊຶ່ງທ່ານໄດ້ສະແດງຄວາມຍ້ອງຍໍ ຊົມເຊີຍ ຕໍ່ກັບຜົນງານທີ່ຍາດມາໄດ້ໃນ 1 ປີ ຜ່ານມາ, ໃນໂອກາດດັ່ງກ່າວ, ເພື່ອເຮັດໃຫ້ວຽກງານການຄົ້ນຄວ້າແນວຄິດໄກສອນ ພົມວິຫານ ສືບຕໍ່ຂະຫຍາຍຕົວແລະມີຜົນສຳເລັດຢ່າງຕໍ່ເນື່ອງ ທ່ານໄດ້ເນັ້ນໜັກ ໃຫ້ບັນດານັກວິທະຍາສາດທັງຫຼາຍທີ່ຖືກມອບໝາຍໃຫ້ຄົ້ນຄວ້າໃນຫົວຂໍ້ຕ່າງໆນັ້ນ ຈົ່ງເອົາໃຈໃສ່ ເປັນເຈົ້າການໃນການປະຕິບັດວຽກງານໃຫ້ສຳເລັດຕາມເປົ້າໝາຍທີ່ວາງໄວ້.

ຂ່າວ/ພາບ: ຕາອັອດ ແສນທະວີສຸກ

ບັນນາທິການ: ຄອນສະຫວັນ ແສນຍານຸພາບ