ພະແນກວາລະສານ ຈັດພິທີ ຝຶກອົບຮົມ ແນະນໍາທັກສະໃນການຂຽນບົດວິທະຍາສາດ

     

     ວາລະສານທິດສະດີການເມືອງ-ການປົກຄອງ ແມ່ນຜະລິດຕະພັນໜຶ່ງຂອງການຄົ້ນຄວ້າທີ່ມີລັກສະນະວິທະຍາ ສາດ  ຂອງສະຖາບັນການເມືອງ ແລະການປົກຄອງແຫ່ງຊາດ ເຊິ່ງມີເນື້ອໃນທີ່ການຄົ້ນຄວ້າກ່ຽວກັບບັນຫາຕ່າງໆ ທີ່ຕິດພັນກັບທິດສະດີ ແລະພຶດຕິກຳໃນການຈັດຕັ້ງປະຕິບັດແນວທາງນະໂຍບາຍຂອງພັກ-ລັດ ຕໍ່ທຸກຂົງເຂດວຽກງານການເມືອງ-ການປົກຄອງ ໃຫ້ແກ່ບັນດາສະມາຊິກພັກພະນັກງານ, ຄູ-ອາຈານ ຕະຫຼອດຮອດນັກສຶກສາ, ປັນຍາຊົນ ໄດ້ຮັບຮູ້,ເຊື່ອມຊຶມ ແລະເຂົ້າໃຈຢ່າງເລິກເຊິ່ງ.

 

     ດັ່ງນັ້ນ, ໃນວັນທີ 5 ກຸມພາ ພະແນກວາລະສານ, ສູນຂໍ້ມູນຂ່າວສານ ໄດ້ຈັດຝຶກອົບຮົມ ໃຫ້ນັກສຶກສາປະລິນຍາໂທ ຮຸ່ນທີ XV ໂດຍໃຫ້ກຽດມາເປັນວິທະຍາກອນບັນຍາຍຂອງ ທ່ານ ປອ ດາວສະຫວັນ ເຄືອມີໄຊ ຮັກສາການຫົວໜ້າສູນຄົ້ນຄວ້າແນວຄິດໄກສອນ ພົມວິຫານ, ຫົວໜ້າບັນນາທິການ ວາລະສານທິດສະດີການເມືອງ-ການປົກຄອງ ພາຍໃຕ້ຫົວຂໍ້: ແນະນໍາທັກສະການຂຽນບົດວິທະຍາສາດ, ຊຶ່ງຈຸດປະສົງຕົ້ນຕໍ ແມ່ນເພື່ອເຮັດໃຫ້ການຂຽນບົດວິທະຍາສາດ ມີຄວາມເອກະພາບທາງດ້ານຮູບການກໍຄືທາງດ້ານເນື້ອໃນ, ການເລືອກເຟັ້ນຫົວຂໍ້ຂອງບົດຄົ້ນຄວ້າພາຍໃນປະເທດ ແລະ ສະພາບການຕ່າງປະເທດບົດໂອ້ລົມຂອງການນຳ ແລະ ອື່ນໆທີ່ພົ້ນເດັ່ນເປັນປະໂຫຍດຕໍ່ນັກສຶກສາພະນັກງານ ຄູ-ອາຈານພາຍໃນສະຖາບັນ ເວົ້າສະເພາະເວົ້າລວມ ແມ່ນເພື່ອໃຫ້ສັງຄົມໄດ້ຮັບຮູ້ເຖິງຜົນງານການຄົ້ນຄວ້າຂອງສະຖາບັນ. ນອກນັ້ນຍັງເປັນການສົ່ງເສີມການປະດິດສ້າງໃນການຄົ້ນຄວ້າ, ການຂີດຂຽນການອ່ານຕາມທິດ "ອ່ານໃຫ້ຫຼາຍຄົ້ນຄວ້າໃຫ້ເລິກເຊິ່ງ"

    ສັງລວມແລ້ວເພື່ອໃຫ້ນັກສຶກສາໄດ້ປະກອບສ່ວນຂຽນບົດວິທະຍາສາດ ໃຫ້ມີຄວາມຫຼາກຫຼາຍຖືກກັບ ຮູບແບບ ແລະ ໂຄງປະກອບຂອງບົດເຊັ່ນ: ພາກທິດສະດີພາກພຶດຕິກຳ, (ຜົນສຳເລັດບັນຫາຕັ້ງຂຶ້ນ)ພາກທິດທາງແກ້ໄຂ ແລະສັງ ລວມບັນດາໃຈຄວາມ. ພ້ອມກັນນັ້ນທ່ານຍັງໄດ້ເນັ້ນໜັກໃຫ້ເອົາໃຈໃສ່ການຄັດເອກະສານການໃສ່ແຫຼ່ງຂໍ້ມູນການນຳໃຊ້ຄຳສັບການຂຽນປະໂຫຍກສຳນວນຄຳເວົ້າໃຫ້ຖືກຫຼັກໄວຍາກອນພາສາລາວ ແລະ ສອດຄ່ອງກັບແນວທາງນະໂຍບາຍຂອງພັກ-ລັດ ແນໃສ່ຍົກສູງຄຸນນະພາບຂອງບົດວິທະຍາສາດ ແລະ ສ້າງຄວາມໜ້າສົນໃຈຕໍ່ຜູ້ທີ່ຕິດຕາມອີກດ້ວຍ.

ຂ່າວ/ພາບ: ຕາອັອດ ແສນທະວີສຸກ

 

ບັນນາທິການ: ຄອນສະຫວັນ ແສນຍານຸພາບ