ສຳເລັດການສອບເສັງ ວິຊາ ກິລາປ້ອງກັນຊາດ ໃຫ້ນັກສຶກສາ ປະລິນຍາຕີ ຮຸ່ນທີ XXIII ຫ້ອງ ກໍ, ຫ້ອງ ຂໍ ແລະ ຕໍ່ເນື່ອງ ຮຸ່ນທີ XIII

ວິຊາກິລາປ້ອງກັນຊາດ ເປັນວິຊາໜຶ່ງທີ່ນອນຢູ່ໃນຫຼັກສູດ ການຮຽນ-ການສອນ ຂອງລະ ບົບປະລິນຍາຕີ ໂດຍຄະນະລັດທິສັງຄົມນິຍົມວິທະຍາສາດ ເປັນຜູ້ຄຸ້ມຄອງ ແລະປະສານງານ ແລະໃນການເຝິກແອບຄັ້ງນີ້ ໄດ້ຮັບການຮ່ວມມືຈາກທ່ານ ພັທ ອຸໄລ ອາສະໜາໄຊ ຫົວໜ້າຄະນະວິຊາ ການທະຫານກິລາມວຍ ແລະທ່ານ ພັຕ ຄຳໄຫວ ພັນທະວົງ ຫົວໜ້າພາກວິຊາລະບຽບງົດງາມ ຈາກ ວິທະຍາຄານຕຳຫຼວດສັນຕິບານ ປະຊາຊົນ ​(ເວີນຄຳ) ເປັນຜູ້ສິດສອນທັງພາກທິດສະດີ ແລະພາກປະຕິບັດຕົວຈິງ.

ໃນເບື້ອງຕົ້ນ ທ່ານ ພັທ ອຸໄລ ອາສະໜາໄຊ ໄດ້ຂຶ້ນຜ່ານບົດລາຍງານກ່ຽວກັບການກະ ກຽມການຈັດຕັ້ງປະຕິບັດ ຫຼັກສູດການຮຽນ-ການສອນ ວິຊາດັ່ງກ່າວເຊິ່ງຈະໄດ້ດຳເນີນໄປເປັນເວລາ 5 ວັນ (ວັນທີ 03-07 ກຸມພາ 2020) ມີນັກສຶກສາ ປະລິນຍາຕີ ຮຸ່ນທີ XXIII ຫ້ອງ ກໍ ຈຳນວນ 58 ທ່ານ, ຫ້ອງ ຂໍ ຈຳນວນ 58 ທ່ານ ແລະ ຕໍ່ເນື່ອງ ຮຸ່ນທີ XIII ຈຳນວນ 30 ທ່ານ; ທັງນີ້, ກໍເພື່ອເຮັດໃຫ້ນັກສຶກສາຈຳນວນດັ່ງກ່າວກາຍເປັນກຳລັງແຮງບົ່ມຊ້ອນປ້ອງກັນຊາດ ທີ່ມີຄວາມຮູ້ພື້ນຖານ ກ່ຽວກັບການນຳໃຊ້ອາວຸດ ຍຸດໂທປະກອນເພື່ອນຳໃຊ້ເຂົ້າໃນວຽກງານປ້ອງກັນຊາດໃນພາວະສຸກເສີນ ພ້ອມທັງຍົກສູງສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງສັດຕູ, ຍາມໃດກໍຢູ່ໃນທ່າກຽມພ້ອມຮັບໃຊ້ປະເທດຊາດປູກຝັງຈິດສຳນຶກໃຫ້ເຂົາເຈົ້າມີນ້ຳໃຈຮັກຊາດຮັກບ້ານເກີດເມືອງນອນມີສະຕິຕໍ່ການຈັດຕັ້ງ ແລະມີລະບຽບວິໄນທີ່ດີ.

ທ່ານ ຖາວອນ ພົມມະຈະລິນ ຄູປະຈຳຢູ່ຄະນະລັດທິສັງຄົມນິຍົມວິທະຍາສາດ ໄດ້ໃຫ້ລາຍລະອຽດວ່າ: ຜ່ານການຮຽນວິຊາດັ່ງກ່າວນີ້ ນັກສຶກສາແມ່ນໄດ້ລົງເລິກກິດຈະກໍາການມ້າງ, ການປະກອບປືນ, ການເຝິກຫັດ 7 ຈັງຫວະພື້ນຖານ ໂດຍອາໄສພູມິປະເທດສູ້ຮົບ ແລະ ຍິງປືນທ່ານອນພ້ອມດັບສູນເປົ້າໝາຍ ເຊິ່ງຜົນຈາກການຮຽນທິດສະດີ ແລະພາກປະຕິ ບັດຕົວຈິງເຫັນວ່າ ນັກສຶກສາ ສາມາດຍິງປືນ (ໄລຍະ 100 ແມັດ) ໄດ້ຖືກເປົ້າໝາຍຂອງການທົດສອບ ກວມເອົາ 80%. ເຊິ່ງນັ້ນມັນສະແດງໃຫ້ເຫັນແລ້ວວ່າ ນັກສຶກສາໄດ້ມີຄວາມເອົາໃຈໃສ່ຢ່າງຈິງຈັງໃນເວລາຮຽນທິດສະດີສົມທົບກັບພຶດຕິກຳ.

 

ຂ່າວໂດຍ: ອຈ ນ ຫຼ້ານ້ອຍ ທອງສຳພັນ

 

ຮູບພາບ: ຕາອັອດ ແສນທະວີສຸກ

 

ບັນນາທິການ: ຄອນສະຫວັນ ແສນຍານຸພາບ