ສະຖາບັນການເມືອງ ແລະ ການປົກຄອງແຫ່ງຊາດ ຈັດພິທີປິດຊຸດຮຽນຊັ້ນສູງລະບົບເລັ່ງລັດ 5 ເດືອນ ແລະ ນັກຄົ້ນຄວ້າປະລິນຍາໂທ ຮຸ່ນທີ XIII

ໃນຕອນເຊົ້າຂອງວັນທີ 7 ກຸມພາ 2020 ສມປຊ ຈັດພິທີປິດຊຸດຮຽນໃຫ້ແກ່ຜູ້ສໍາເລັດການສຶກສາ ລະບົບເລັ່ງລັດ 5 ເດືອນ ຮຸ່ນທີ XXV ແລະນັກຄົ້ນຄວ້າປະລິນຍາໂທ ຮຸ່ນທີ XIIIສົກປີ 2019-2020 ຂຶ້ນ. ໂດຍການເປັນປະທານຂອງທ່ານ ຮສ ພູວົງ ອຸ່ນຄຳແສນ ຮັກສາການ ເລຂາຄະນະບໍລິຫານງານພັກ, ຮັກສາການຫົວໜ້າ ສມປຊ, ມີທ່ານຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະໂຄສະນາອົບຮົມສູນກາງພັກ, ມີຫົວໜ້າຫ້ອງການ, ກົມ, ຄະນະ, ສູນ ຕະຫຼອດພະນັກງານ ແລະນັກສຶກສາ ເຂົ້າຮ່ວມ.

 

 

     ໃນພິທີໄດ້ຮັບຟັງການສະຫຼຸບລາຍງານກ່ຽວກັບການຈັດຕັ້ງປະຕິບັດຫຼັກສູດການຮຽນ-ການສອນຂອງລະບົບຮຽນດັ່ງກ່າວ ແລະຕີລາຄາຜົນດີ, ຂໍຄົງຄ້າງ ແລະບົດຮຽນທີ່ຖອດຖອນໄດ້ ຈາກທ່ານ ປອ ນ. ໄກສອນ ຈັນສີນາ ວ່າການຫົວໜ້າກົມຄຸ້ມຄອງການຮຽນ-ການສອນ. ເນື້ອໃນສ່ອງແສງໃຫ້ເຫັນວ່າຜູ້ທີ່ໄດ້ສຳເລັດການສຶກສາໃນຄັ້ງນີ້ປະກອບມີນັກສຶກສາ ລະບົບຊັ້ນສູງເລັ່ງລັດ 5 ເດືອນຮຸ່ນທີ XXVຈໍານວນ 55ທ່ານ, ຍິງ 7ທ່ານ, ລະບົບປະລິນຍາໂທ (2ປີ) ຮຸ່ນທີ XIII ມີຈໍານວນນັກສຶກສາທັງຫມົດ 58ທ່ານ, ຍິງ 10ທ່ານ. ນອກນັ້ນ, ຍັງໄດ້ຕີລາຄາຄວາມເຫັນຕໍ່ຫຼັກສູດການຮຽນ-ການສອນ ແລະ ປື້ມຕໍາລາຮຽນສູງພໍສົມຄວນ, ສະເລ່ຍ 90,07%, ທຽບໃສ່ຮຸ່ນຜ່ານມາ ແມ່ນດີຂຶ້ນຕື່ມ 2% (88,6%). ໃນນັ້ນ, ວິຊາຮຽນທີ່ນັກສຶກສາ ຮຸ່ນນີ້ໃຫ້ຄວາມສົນໃຈຢາກຮຽນທີ່ສຸດແມ່ນ ກຸ່ມວິຊາ ເຕັກນິກການບໍລິຫານ ແລະກົດໝາຍ ກວມ 28% ຂອງຄວາມຄິດເຫັນຜູ້ເຂົ້າຮຽນ, ຮອງລົງມາແມ່ນກຸ່ມວິຊາປະຫວັດສາດພັກ-ກໍ່ສ້າງພັກ, ເສດຖະສາດການເມືອງ ແລະຄຸ້ມຄອງເສດຖະກິດ ກວມ 19,5%; ຍັງມີກຸ່ມວິຊາປັດຊະຍາ, ຈິດຕະສາດຄວາມເປັນຜູ້ນໍາພາ, ການຕິດຕາມກວດກາ ແລະລັດທິສັງຄົມນິຍົມວິທະຍາສາດຕາມລໍາດັບທີ່ນັກສຶກສາໃຫ້ຄວາມສົນໃຈ.

ນອກນັ້ນ, ໃນພິທີດັ່ງກ່າວ ຍັງໄດ້ມີການມອບ-ຮັບໃບຍ້ອງຍໍປະເພດຕ່າງໆໃຫ້ຫ້ອງຮຽນ ແລະບຸກຄົນດີເດັ່ນຄື:

1.  ຫ້ອງຮຽນດີເດັ່ນປະເພດ 1 ແມ່ນຫ້ອງຮຽນ 5 ເດືອນຮຸ່ນ XXI.

2.  ຄະນະພັກ-ຄະນະຫ້ອງທີ່ມີການຊີ້ນຳ-ນຳພາດີເດັ່ນປະເພດ ແມ່ນຫ້ອງຮຽນ 5 ເດືອນຮຸ່ນ XXI.

3.  ປະເພດນັກຮຽນເກັ່ງ-ມີລະບຽບວິໄນ

    - ນັກສຶກສາຊັ້ນສູງ ລະບົບເລັ່ງລັດ 5 ເດືອນຮຸ່ນ XXI: ປະເພດ 1 ມີ 8 ທ່ານ ແລະປະເພດ 2 ມີ 23 ທ່ານ.

    - ນັກຄົ້ນຄວ້າປະລິນຍາໂທ: ປະເພດ 1 ມີ 5 ທ່ານ, ປະເພດ 2 ມີ 14 ທ່ານ ແລະ ປະເພດ 3 ມີຈໍານວນ 7ທ່ານ.

     ໃນຕອນທ້າຍພິທີທ່ານ ຮສ ພູວົງ ອຸ່ນຄຳແສນ ກໍໄດ້ສະແດງຄວາມຊົມເຊີຍ, ພ້ອມທັງສະແດງຄວາມພາກພູມໃຈເປັນຢ່າງຍິ່ງ ທີ່ນັກສຶກສາມີຄວາມເອົາໃຈໃສ່ ແລະຕັ້ງໜ້າສຶກສາຄົ້ນຄວ້າ ຈົນສຳເລັດຈົບການສຶກສາຕາມໄລຍະເວລາທີ່ກຳນົດ. ພ້ອມທັງໄດ້ເນັ້ນໜັກໃຫ້ນັກສຶກສາທີ່ຈົບການສຶກສາໃນຄັ້ງນີ້ ຈົ່ງນໍາເອົາຄວາມຮູ້ຄວາມສາມາດຂອງຕົນ ທີ່ຜ່ານການຝຶກຝົນຫຼໍ່ຫຼອມຕົນເອງຕະຫຼອດໄລຍະທີ່ໄດ້ສຶກສາທີ່ສະຖາບັນແຫ່ງນີ້ນັ້ນ ສືບຕໍ່ນຳໄປພັດທະນາກົມກອງຂອງຕົນ ແລະ ຫຼໍ່ຫຼອມຕົນເອງໃຫ້ກາຍເປັນຜູ້ທີ່ມີຄຸນສົມບັດສິນທຳປະຕິວັດກາຍເປັນພະນັກງານຫຼັກແຫຼ່ງເປັນຜູ້ທີ່ສືບທອດທີ່ດີຂອງພັກ-ລັດເປັນຜູ້ທີ່ມີຄວາມກ້າວໜ້າເຮັດສຳເລັດທຸກໜ້າທີ່ຕາມການມອບ ໝາຍຂອງການຈັດຕັ້ງ ແລະໝູນໃຊ້ເຂົ້າໃນໜ້າທີ່ວຽກງານຢ່າງມີຫຼັກການ ແລະຖືກຕ້ອງ.

ຂ່າວ/ພາບ: ຕາອັອດ ແສນທະວີສຸກ 

 

ບັນນາທິການ: ຄອນສະຫວັນ ແສນຍານຸພາບ