ພິທີ ມອບ-ຮັບຫຼັກສູດການຮຽນ-ການສອນ ລະບົບອະນຸປະລິນຍາ ແລະປະລິນຍາຕີທິດສະດີການເມືອງ-ການປົກຄອງ

ຕອນບ່າຍ ຂອງວັນທີ 10 ກຸມພາ 2020, ຢູ່ທີ່ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີມອບ-ຮັບຫຼັກສູດການຮຽນ-ການສອນ ລະບົບອະນຸປະລິນຍາ ແລະລະບົບປະລິນຍາຕີທິດສະດີການເມືອງ-ການປົກຄອງ ຢ່າງເປັນທາງການ ລະຫວ່າງ ສະຖາບັນການເມືອງ ແລະ ການປົກຄອງແຫ່ງຊາດ ແລະ ກະຊວງສຶກສາທິການ ແລະກີລາ, ພາຍໃຕ້ການເຂົ້າຮ່ວມເປັນສັກຂີພິຍານ ຂອງທ່ານ ຄຳ​ເຈນ ວົງ​ໂພ​ສີ, ກຳ​ມະ​ການ​ສູນ​ກາງ​ພັກ, ຮອງ​ຫົວໜ້າຄະນະໂຄສະນາອົບຮົມສູນກາງພັກ; ທ່ານຜູ້ຕາງໜ້າຄະນະຈັດຕັ້ງສູນກາງພັກ, ທ່ານຜູ້ຕາງໜ້າການນໍາອ້ອມຂ້າງສູນກາງ ແລະ ບັນດາທ່ານຄະນະບໍລິຫານງານພັກ, ຄະນະອໍານວຍການ, ຫ້ອງການ, ກົມ, ສູນຂໍ້ມູນຂ່າວສານ, ສູນຄົ້ນຄວ້າແນວຄິດ ໄກສອນ ພົມວິຫານ ແລະຄະນະຕ່າງໆຂອງສະຖາບັນການເມືອງ ແລະ ການປົກຄອງແຫ່ງຊາດ ເຂົ້າຮ່ວມ.

 

ທ່ານ ປອ ນ. ໄກສອນ ຈັນສີນາ ວ່າການຫົວໜ້າກົມຄຸ້ມຄອງການຮຽນ-ການສອນ ຂຶ້ນຜ່ານບົດລາຍງານຂອງການຈັດຕັ້ງປະຕິບັດການຮຽນ-ການສອນໃນໄລຍະຜ່ານມາ ຊຶ່ງທ່ານໄດ້ກ່າວວ່າ: ສະ​ພາບການຈັດຕັ້ງປະຕິບັດຫຼັກສູດລະບົບກໍ່ສ້າງຊັ້ນອະນຸປະລິນຍາ ຢູ່ ສມປຊ.

ໄລະຍະທີ 1:ຫຼັກສູດກໍ່ສ້າງຊັ້ນອະນຸປະລິນຍາ ໄດ້ຖືກພັດທະນາຂຶ້ນ ໂດຍ​ໂຮງ​ຮຽນ​ການ​ປົກ​ຄອງ​ແຫ່ງ​ຊາດ ໃນ​ປີ 1992 ກ່ອນ​ການ​ໂຮມ​ສອງ​ໂຮງ​ຮຽນ​ເຂົ້າ​ກັນ, ຊື່ຂອງຫຼັກສູດແມ່ນ ຫຼັກສູດທິດສະດີການເມືອງ ແລະ ການປົກຄອງ ຊັ້ນສູງເລັ່ງລັດ 10 ເດືອນ”,

ໄລຍະທີ 2:ໂດຍອີງໃສ່ຄວາມຈຳເປັນໃນການກໍ່ສ້າງພະນັກງານນຳພາຄຸ້ມຄອງໃຫ້ທົ່ວເຖິງໃນຂອບເຂດທົ່ວປະເທດທັນກັບສະພາບການພັດທະນາເສດຖະກິດ-ສັງຄົມຂອງຊາດໃນໄລຍະປ່ຽນແປງໃໝ່, ຫຼັກສູດ 10 ເດືອນ ໄດ້ຖືກພັດທະນາມາເປັນ ຫຼັກສູດ ອະນຸປະລິນຍາ 2 ປີ, ໄດ້ຮັບການອະນຸມັດຈາກກະຊວງສຶກສາທິການ ແລະກິລາ ​ໃນ​ປີ 1997 ແລະໄດ້ເລີ່ມຈັດຕັ້ງປະຕິບັດທັງຢູ່ໃນ ສມປຊ, ຢູ່ໂຮງຮຽນການເມືອງ-ການປົກຄອງແຂວງ 5 ແຫ່ງ  ແລະ ໂຮງ​ຮຽນທິດ​ສະ​ດີ​ການ​ເມືອງ ປກ​ສ 1 ແຫ່ງ.

ສະ​ພາບການຈັດຕັ້ງປະຕິບັດຫຼັກສູດກໍ່ສ້າງປະລິນຍາຕີ ຢູ່ ສມປຊ ໃນໄລຍະຜ່ານມາ, ຫຼັກສູດຊັ້ນປະລິນຍາຕີ ໄດ້ຮັບການພັດທະນາ ແລະ​ປັບ​ປຸງມາໄດ້ 3 ໄລຍະເຊັ່ນ​ກັນ ໃນ​ນັ້ນ​ມີຄື

     - ໄລຍະທີ 1: ນັບແຕ່ປີ 1993, ຊື່ໃນເມື່ອກ່ອນ ໂຮງຮຽນທິດສະດີຊັ້ນສູງພັກ-ລັດ ໄດ້ລິເລີ່ມສ້າງຫຼັກສູດ ປະລິນຍາຕີການເມືອງ-ການປົກຄອງ ລະບົບ 4 ປີ,

     - ໄລຍະທີ 2: ໄລຍະແຕ່ປີ 1997-2009, ຫຼັກສູດດັ່ງກ່າວໄດ້ພັດທະນາມາເປັນ 3 ສາຂາວິຊາຮຽນ ຄື: ສາຂາວິຊາການເມືອງທົ່ວໄປ, ສາຂາວິຊາການປົກຄອງ ແລະສາຂາວິຊາຄຸ້ມຄອງເສດຖະກິດ. ຫຼັກສູດນີ້ໄດ້ຮັບການອະນຸມັດຈາກກະຊວງສຶກສາທິການ ແລະກິລາ, ແລະສາມາດຈັດຕັ້ງປະຕິບັດໄດ້ 12 ຊຸດ​ຮຽນ, ມີຜູ້ສຳເລັດການສຶກສາທັງໝົດ 673 ຄົນ, ຍິງ 98 ຄົນ.

     - ໄລຍະທີ 3: ແຕ່ປີ 2010-2018, ຫຼັກສູດດັ່ງກ່າວໄດ້ພັດທະນາມາເປັນ 7 ສາຂາວິຊາຮຽນ ຄື: ສາຂາວິຊາການເມືອງ, ສາຂາວິຊາການປົກຄອງ ສາຂາວິຊາຄຸ້ມຄອງເສດຖະກິດ, ສາຂາວິຊາກໍ່ສ້າງພັກ, ສາຂາວິຊາວຽກງານຈັດຕັ້ງ, ສາຂາວຽກງານກວດກາ, ແລະສາຂາວຽກງານອົງການຈັດຕັ້ງມະຫາຊົນ.

     ນອກນັ້ນ, ທ່ານ ປອ ນ. ໄກສອນ ຈັນສີນາ ຍັງໄດ້ລາຍງານຜົນ​ສຳ​ເລັດການພັດທະນາປຶ້ມຕໍາລາຮັບໃຊ້ການຮຽນ-ການສອນ: ຄູ-ອາ​ຈານ ໄດ້​ສຸມ​ໃສ່​ພັດ​ທະ​ນາ​ປຶ້ມ​ແບບ​ຮຽນ​ທຸກ​ລະ​ບົບ​ຮຽນ​ໃຫ້​ສົມ​ບູນ ແລະ​ທັນ​ກັບ​ສະ​ພາບ​ການ, ຜົນ​ສຳ​ເລັດ​ຂອງ​ນັກ​ສຶກ​ສາ. ຜ່າ​ນການເອົາ​ໃຈ​ໃສ່​ສົ່ງ​ຄວາມ​ຮູ້​ຂອງ​ຄູ-ອາ​ຈານ ແລະ ການ​​ຄົ້ນຄວ້າ​ຮ່ຳຮຽນ ແລະຝຶກຝົນຫຼໍ່ຫຼອມຕົນເອງ​ ​ໃນ​ໄລ​ຍະ​ຮຽນຢູ່​ສະ​ຖາ​ບັນ​ແຫ່ງ​ນີ້ ​​ນັກ​ສຶກສາທຸກ​ລະບົບ ເວົ້າ​ລວມ, ເວົ້າ​ສະ​ເພາະ ​ນັກ​ສຶກສາ ທີ່​ຈົບ​ຫຼັກສູດ​ການ​ສຶກສາ​ອະ​ນຸ​ປະ​ລິນ​ຍາ ແລະ​ປະ​ລິນ​ຍາ​ຕີ ​ໄດ້​ມີ​ຄວາມ​ຮູ້​ພື້ນຖານ​ທາງ​ດ້ານ​ທິດ​ສະ​ດີ​ມາກ​-​ເລ​ນິນ, ຄວາມ​ຮູ້​ພື້ນ​ຖານ​ດ້ານການ​ປົກຄອງ ​ແລະ ບໍລິຫານ​ຢ່າງ​ເປັນ​ລະບົບ.

     ໃນພິທີ ໄດ້ຮັບຟັງການປະກອບຄຳເຫັນ ແລະກ່າວມອບລະບົບຮຽນດັ່ງກ່າວຈາກທ່ານ ຮສ ພູວົງ ອຸ່ນຄຳແສນ ຮັກສາການ ເລຂາຄະນະບໍລິຫານງານພັກ, ຮັກສາການຫົວໜ້າ ສມປຊ ແລະກ່າວຮັບເອົາລະບົບຮຽນດັ່ງກ່າວໂດຍ ທ່ານ ຮສ ປອ ກອງສີ ແສງມະນີ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງສຶກສາທິການ ແລະກີລາ. ຈາກນັ້ນ, ທັງສອງຝ່າຍໄດ້ລົງລາຍເຊັນໃສ່ບົດບັນທຶກມອບ-ຮັບຢ່າງເປັນທາງການ.

 

 

ຂ່າວ/ພາບ: ຕາອັອດ ແສນທະວີສຸກ 

ບັນນາທິການ: ຄອນສະຫວັນ ແສນຍານຸພາບ