ເມືອງບໍ່ແຕນ ແຂວງໄຊຍະບູລີ ເປີດຊຸດຝຶກອົບຮົມທິດສະດີການເມືອງ ແລະການປົກຄອງ ສຳລັບເລຂາພັກບ້ານ-ນາຍບ້ານ ຊຸດທີ I


ໃນຕອນເຊົ້າ ຂອງວັນທີ 11 ມີນາ 2020 ທີ່ຫ້ອງປະຊຸມ ຂອງກອງບັນຊາການ ປກສ ເມືອງບໍ່ແຕນ ໄດ້ຈັດພິທີເປີດຊຸດຝຶກອົບຮົມທິດສະດີການເມືອງ ແລະການປົກຄອງໄລຍະ 10 ວັນ ໃຫ້ເລຂາພັກບ້ານ-ນາຍບ້ານ ຂຶ້ນຢ່າງເປັນທາງການ. ໂດຍການເປັນປະທານ ຂອງ ທ່ານ ວັນດາວ ແວວທະນັດສີ ເລຂາພັກເມືອງ, ເຈົ້າເມືອງໆບໍ່ແຕນ ໃຫ້ກຽດເຂົ້າຮ່ວມໂດຍ ທ່ານ ບຸນຍອງ ອາລີລັກ ຮອງຫົວໜ້າໂຮງຮຽນການເມືອງ ແລະການປົກຄອງ ແຂວງໄຊຍະບູລີ, ມີ ທ່ານ ສົມສະນຸກ ໄຊອຸດົມ ຄະນະປະຈຳພັກເມືອງ, ປະທານກວດກາພັກ-ລັດເມືອງ, ມີແຂກຖືກເຊີນ, ພະນັກງານ, ຄູ-ອາຈານ ຕະຫຼອດຮອດນັກຝຶກອົບຮົມຈໍານວນ 30 ກວ່າທ່ານ ເຂົ້າຮ່ວມຢ່າງພ້ອມພຽງ.

 

     ໃນພິທີ ທ່ານ ພອນສະຫວັດ ໄຊຍະລາດ ຄະນະຈັດຕັ້ງພິທີ ໄດ້ສະເໜີຈຸດປະສົງ, ແຂກເຂົ້າຮ່ວມ ແລະຜ່ານມະຕິຕົກລົງ ຂອງຄະນະປະຈຳພັກເມືອງ ວ່າດ້ວຍການອານຸມັດເປີດຊຸດຝຶກອົບຮົມທິດສະດີການເມືອງ ແລະການປົກຄອງ ໃຫ້ເລຂາພັກບ້ານ, ນາຍບ້ານ.

     ທ່ານ ອຸ່ນ ທຳມະວົງ ຄະນະປະຈຳພັກເມືອງ, ຜູ້ຊີ້ນຳວຽກພັກ-ພະນັກງານ ຂຶ້ນຜ່ານບົດສະເໜີໂຄງການ, ຫຼັກສູດຝຶກອົບຮົມທິດສະດີການເມືອງ ແລະການປົກຄອງ ສຳລັບເລຂາໜ່ວຍພັກ, ນາຍບ້ານ.

     ໃນຕອນທ້າຍພິທີ ໄດ້ຮັບຟັງການໂອ້ລົມ ຂອງສະຫາຍເລຂາພັກເມືອງ, ເຈົ້າເມືອງໆບໍ່ແຕນ ສະຫາຍໄດ້ຍົກໃຫ້ເຫັນຄວາມສຳຄັນຂອງທິດສະດີມາກ-ເລນິນ, ທັດສະນະຂອງພັກ ແນວຄິດຂອງປະທານ ໄກສອນ ພົມວິຫານ ແລະຍັງໄດ້ເນັ້ນໜັກໃຫ້ນັກຝຶກອົບຮົມມີຄວາມເອົາໃຈໃສ່ ເຮັດສຳເລັດໜ້າທີ່ການເມືອງ ຂອງຕົນໃນຄັ້ງນີ້ ພ້ອມທັງສາມາດນໍາເອົາບົດຮຽນໄປໝູນໃຊ້ເຂົ້າໃນວຽກງານຕົວຈິງໃຫ້ເກີດດອກອອກຜົນ.

 

ບັນນາທິການ: ທ່ານ ຄອນສະຫວັນ ແສນຍານຸພາບ

ຂ່າວ/ພາບທ່ານ ຄຳພອນ ໄຊຍະວົງ