ໜ່ວຍພັກຮາກຖານໂຮງຮຽນການເມືອງ-ການປົກຄອງແຂວງຈຳປາສັກ ຈັດພິທີຮັບໃບຢັ້ງຢືນໜ່ວຍພັກປອດໄສ, ເຂັ້ມແຂງ, ໜັກແໜ້ນ ປະຈຳປີ2019

 

   

    ວັນທີ 20​ ມີນາ​ 2020 ນີ້​ ຢູ່ທີ່​ໂຮງຮຽນການເມືອງ-ການປົກຄອງແຂວງຈຳປາສັກ ໄດ້ຈັດພິທີມອບໃບຢັ້ງຢືນໜ່ວຍພັກປອດໄສ,​ ເຂັ້ມແຂງ,​ ໜັກແໜ້ນ ປະຈຳປີ​2019​ ໃຫ້ໜ່ວຍພັກຮາກຖານໂຮງຮຽນການເມືອງ ແລະການປົກຄອງແຂວງຈຳປາສັກ, ໂດຍການໃຫ້ກຽດເຂົ້າຮ່ວມຂອງທ່ານ​ ນິພອນ​ ວຽງປະເສີດ​ ຮອງເລຂາພັກແຂວງ​, ຫົວໜ້າຄະນະຈັດຕັ້ງແຂວງ​ຈຳປາສັກ,​ ທ່ານ​ ນາງ​ ປອ​ ນິກຄຳ ບົວສີສຸກ ກຳມະການພັກແຂວງ​ ເລຂາໜ່ວຍພັກຮາກຖານ,​ ອະດີດຫົວໜ້າໂຮງຮຽນການເມືອງ ແລະການປົກຄອງ,​ ມີ​ທ່ານ​ ບົວທອງ​ ສຸວັນນະສານ ກໍາມະການພັກແຂວງ, ຫົວໜ້າໂຮງຮຽນການເມືອງ ແລະການປົກຄອງແຂວງຈຳປາສັກ; ມີຄະນະກຳມະການກວດກາປະເມີນຜົນໜ່ວຍພັກປອດໄສ,​ ເຂັ້ມແຂງ, ​ໜັກແໜ້ນຂັ້ນແຂວງ,​ ມີຄະນະໜ່ວຍພັກຮາກຖານ,​ ສະມາຊິກພັກສົມບູນ, ​ສຳຮອງເຂົ້າຮ່ວມ.

 

     ທ່ານ​ ປອ​ ສີປະທຸມມາ​ ຈັນພອນເພັດ ຮອງເລຂາໜ່ວຍພັກ​ຮາກຖານ, ​ຮອງອຳນວຍການໂຮງຮຽນການເມືອງ ແລະການປົກຄອງແຂວງຈຳປາສັກ ໄດ້ຜ່ານບົດສະຫຼຸບການກໍ່ສ້າງໜ່ວຍພັກປອດໄສ,​ ເຂັ້ມແຂງ, ໜັກແໜ້ນໃນໄລຍະ 1 ປີ ​2019​ ທີ່ຜ່ານມາ ໂດຍສະເພາະແມ່ນຜົນງານການນຳພາຂອງຄະນະໜ່ວຍພັກທີ່ໄດ້ເອົາໃຈໃສ່ໃນການຊີ້ນຳ-ນຳພາວຽກງານການກໍ່ສ້າງໜ່ວຍພັກຂອງຕົນຕາມມາດຖານເງື່ອນໄຂໂດຍຕິດພັນກັບວຽກງານວິຊາສະເພາະ, ໂດຍສະເພາະແມ່ນການຮຽນການສອນໃຫ້ມີຄຸນນະພາບແມ່ນມີຜົນສຳເລັດສູງສາມາດຕີລາຄາເປັນໜ່ວຍພັກປອດໄສ,​ ເຂັ້ມແຂງ ໜັກແໜ້ນ ​ໄດ້ຢ່າງສົມກຽດ.

    ຈາກນັ້ນ, ທ່ານປະທານໃນພິທີ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະໜ່ວຍພັກຮາກຖານໂຮງຮຽນການເມືອງ ແລະການປົກຄອງແຂວງຈໍາປາສັກ ທີ່ຍາດໄດ້ຜົນງານໃນການເຮັດພາລະບົດບາດການຊີ້ນໍາ-ນໍາພາໃນໜ້າທີ່ວຽກງານດ້ານຕ່າງໆ ຈົນສາມາດສ້າງໄດ້ໜ່ວຍພັກປອດໃສ ເຂັ້ມແຂງ ໜັກແໜ້ນ ສິ່ງທີ່ໄດ້ຮັບນີ້ ໄດ້ຢັ້ງຢືນເຖິງຄະນະໜ່ວຍພັກ ແລະສະມາຊິກພັກທຸກສະຫາຍພາຍໃນໜ່ວຍພັກໄດ້ເປັນເຈົ້້າການໃນການຈັດຕັ້ງປະຕິບັດ ຕາມແນວທາງ, ຫຼັກການຂອງພັກ ເວົ້້າລວມ, ສະເພາະແມ່ນທຸກສະຫາຍໄດ້ເອົາໃຈໃສ່ ໃນການຈັດຕັ້ງປະຕິບັດບັນດາຄາດໝາຍ ທີ່ໄດ້ວາງໄວ້ໃນແຜນການກໍ່ສ້າງໜ່ວຍພັກໃນໄລຍະຜ່ານມາ. ດັ່ງນັ້ນ, ກໍຂໍໃຫ້ບັນດາສະຫາຍຈົ່ງຮັກສາມູນເຊື້ອໃນການຈັດຕັ້ງປະຕິບັດບັນດາມາດຖານທີ່ໄດ້ວາງໄວ້ໃນປີຕໍ່ໜ້າ ແລະຕັ້ງໜ້າປະຕິບັດໜ້າທີ່ວຽກງານໃຫ້ໄດ້ຮັບຜົນດີຂຶ້ນເລື່ອຍໆ.

ຂ່າວ/ພາບ: ຂວັນຕາ ສີສົມໂຄດ

ບັນນາທິການຄອນສະຫວັນ ແສນຍານຸພາບ

ອິນປັນ ຈູມມະລີ