ໃນຕອນບ່າຍຂອງວັນທີ 11 ກໍລະກົດ 2024 ທີຜ່ານມານີ້ ຢູ່ໂຮງຮຽນການເມືອງ ແລະການປົກຄອງແຂວງໄຊຍະບູລີໄດ້ຈັດຕັ້ງພິທີປິດຊຸດຮຽນແລະໄດ້ມອບຮັບໃບຢັ້ງຢືນທິດສະດີຂັ້ນຕົ້ນຮູ່ນທີII, ພາຍໃຕ້ການເປັນປະທານ ຂອງ ສະຫາຍ ອາເມຊົງເຢຍເລັງ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ, ມີ ສະຫາຍ ປອ ສີສອນພັນ ບຸນສີ ກໍາມະການພັກແຂວງ, ຫົວໜ້າໂຮງຮຽນການເມືອງ ແລະ ການປົກຄອງແຂວງ, ມີສະຫາຍ ເສນ ພັນລັກ ເລຂາພັກເມືອງ ວ່າການເຈົ້າເມືອງ ເມືອງໄຊຍະບູລີ, ມີຜູ້ຕາງໜ້າຈາກບັນດາພະແນກການອ້ອມຂ້າງແຂວງ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມຢ່າງພ້ອມພຽງ.
ສະຫາຍ ປທ ໄຊພອນ ມະນີວົງ ຮອງຫົວໜ້າໂຮງຮຽນ, ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຫຼັກສູດການຮຽນການສອນໃນລະບົບຮຽນທິດສະດີການເມືອງຂັ້ນຕົ້ນ ຊຸດທີ II ຂອງໂຮງຮຽນການເມືອງ ແລະ ການປົກຄອງແຂວງໄຊຍະບູລີ ໃນໄລຍະທີ່ຜ່ານມາ ເຊິ່ງມີເນື້ອໃນບາງຕອນວ່າ: ຊຸດຮຽນທິດສະດີການເມືອງຂັ້ນຕົ້ນ ຊຸດທີ II ມີນັກສຶກສາທັງໝົດ 50 ສະຫາຍ ຍິງ 12 ສະຫາຍ, ເຊິ່ງມາຈາກບັນດາພະແນກການອ້ອມຂ້າງແຂວງ ແລະບັນດາເມືອງພາຍໃນແຂວງໄຊຍະບູລີ; ໃນລະບົບຮຽນ ມີທັງໝົດ 14 ວິຊາຄື:
- ວິຊາປັດຊະຍາມາກ-ເລນິນມີ 17 ຊົວໂມງ,
- ວິຊາ ທິດສະດີລັດແລະກົດໝາຍມີ 20 ຊົວໂມງ,
- ວິຊາ ການບໍລິຫານອົງການ 14 ຊົວໂມງ.
- ວິຊາ ລັດທິສັງຄົມນິຍົມວິທະຍາສາດມີ 24 ຊົວໂມງ.
- ວິຊາສັງຄົມສາດມີ 21 ຊົວໂມງ.
- ວິຊາ ພົວພັນສາກົນມີ 20 ຊົ່ວໂມງ.
- ວິຊາ ປ້ອງກັນຊາດປ້ອງກັນຄວາມສະຫງົບ 24 ຊົວໂມງ.
- ວິຊາແນວຄິດໄກສອນພົມວິຫານ 46 ຊົວໂມງ.
- ວິຊາປະຫວັດສາດພັກແລະກໍ່ສ້າງພັກມີ65ຊົວໂມງ.
- ວິຊາເສດຖະສາດການເທືອງມາກເລນີນ 51 ຊົວໂມງ.
- ວິຊາ ຄຸ້ມຄອງເສດຖະກິດມີ 12 ຊົມໂມງ
- ວິຊາ ການເມືອງວິທະຍາມີ 13 ຊົວໂມງ
- ວິຊາການຄຸມຄອງບໍລິຫານລັດມີ 17 ຊົວໂມງ
- ວິຊາເຕັກນີກບໍລິຫານມີ 7 ຊົວໂມງ.
ລວມທັງໝົດມີ 351 ຊົ່ວໂມງ. ຜ່ານການສຶກສາຮໍ່າຮຽນໄດ້ສ້າງຄວາມເຂົ້າໃຈຕໍ່ແນວທາງນະໂຍບາຍຂອງພັກ, ທິດສະດີມາກ-ເລນິນ, ແນວຄິດໄກສອນ ພົມວິຫານໃຫ້ແກ່ນັກສຶກສາຢ່າງເລິກເຊິ່ງໃນລະດັບຂັ້ນພື້ນຖານ, ເຊິ່ງໄດ້ສະແດງອອກໃນການສອບເສັງຂັ້ນສຸດທ້າຍທີ່ມີນັກສຶກສາໄດ້ຄະແນນລະດັບດີເລີດ (Grad A)ຈໍານວນ39 ຄົນຍີງ 13 ຄົນ ລະດັບດີຫຼາຍ (Grad B+)ຈໍານວນ 11 ຄົນຍີງ 1 ຄົນ. ນອກນີ້ຍັງໄດ້ຍ້ອງຍໍນັກສຶກສາຮຽນເກັ່ງ-ມີວິໄນດີຈຳນວນ 11 ສະຫາຍຍິງ 3 ສະຫາຍ.
ໃນຕອນທ້າຍຂອງພິທີ ສະຫາຍປະທານກອງປະຊຸມໄດ້ມີຄໍາເຫັນໂອ້ລົມ ເຊິ່ງສະຫາຍໄດ້ເນັ້ນໜັກບາງດ້ານວ່າ: ຂໍໃຫ້ນັກສຶກສາທີ່ຮຽນຈົບໃນຄັ້ງນີ້ ນໍາເອົາຄວາມຮູ້ທີ່ໄດ້ຮຽນມານໍາໄປມູນໃຊ້ເຂົ້າໃນວຽກງານທີ່ຕົນຮັບຜິດຊອບ, ເພື່ອໃຫ້ການປະຕິບັດໜ້າທີ່ວຽກງານເດີນໄປຖືກທິດທາງຕາມທີ່ພັກເຮົາໄດ້ກຳນົດໄວ້, ເມື່ອນັ້ນພວກເຮົາຈຶ່ງຈະນໍາເອົາຜົນປະໂຫຍດມາສູ່ປະເທດຊາດ ແລະປະຊາຊົນ, ການນໍາເອົາຜົນປະໂຫຍດມາສູ່ປະເທດຊາດ ແລະປະຊາຊົນ ເມື່ອນັ້ນ ປະຊາຊົນຈຶ່ງຈະສະໜັບສະໜູນ ແລະເປັນກຳລັງແຮງໃຈໃຫ້ແກ່ພັກເຮົາ. ອັນນັ້ນ, ແມ່ນສິ່ງຄໍ້າປະກັນໃຫ້ພັກເຮົາຄົງຕົວ ແລະຂະຫຍາຍຕົວຂຶ້ນໄປເລື່ອຍໆ.
ພາບ /ຂ່າວ: ວັດທະນາພັນລັກ
ບັນນາທິການ: ປທ ບຸນປັນ ສຸມຸນທອງ