ໂດຍຕອບສະໜອງຕາມການເຊື້ອເຊີນ ຂອງຄະນະພັກ, ຄະນະໂຮງຮຽນການເມືອງ ແລະ ການປົກຄອງແຂວງຊຽງຂວາງ. ສະນັ້ນ, ໃນຕອນແລງຂອງວັນທີ 7 ສິງຫາ 2024 ທ່ານ ສອນໄຊ ພໍລະສິມ ວ່າການຫົວໜ້າພະແນກການເງິນແຂວງ ພ້ອມດ້ວຍຄະນະ, ພະນັກງານ ພະແນກການເງິນແຂວງ ໄດ້ມາຢ້ຽມຢາມໂຮງຮຽນການເມືອງ ແລະ ການປົກຄອງແຂວງ ໃຫ້ກຽດກ່າວຕ້ອນຮັບໂດຍ ທ່ານ ສີວອນ ບຸດດາຈັນ ກຳມະການພັກແຂວງ ຫົວໜ້າໂຮງຮຽນການເມືອງ ແລະ ການປົກຄອງແຂວງ, ໂອກາດນີ້ ທ່ານ ກໍໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ດີໃຈ ທີ່ໄດ້ຕ້ອນຮັບຄະນະພັກ, ຄະນະນຳ ແລະພະນັກງານທັງໝົດ ຈາກພະແນກການເງິນແຂວງ ທີ່ໄດ້ໃຫ້ກຽດມາຢ້ຽມຢາມແລກປ່ຽນບົດຮຽນເຊິ່ງກັນ ແລະກັນ.
ຈຸດປະສົງໃນການມາຢ້ຽມຢາມໃນຄັ້ງນີ້ ກໍ່ເພື່ອຢ້ຽມຢາມ ຄະນະພັກ, ຄະນະນຳໂຮງຮຽນ, ພະນັກງານ ຄູ-ອາຈານ ແລະ ນັກສຶກສາທີ່ກຳລັງຮຳຮຽນຢູ່ໃນໂຮງຮຽນ ແລະມອບອຸປະກອນກິລາຈຳນວນໜຶ່ງ ພ້ອມທັງສ້າງຂະບວນການກິລາ ຜູກແໜ້ນຄວາມສາມັກຄີປອງດອງ, ຊຸກຍູ້ສົ່ງເສີມສາຍພົວພັນມິດຕະພາບອັນດີງາມ ແລະການຊ່ວຍເຫຼືອເຊິ່ງກັນ ແລະກັນ ລະຫວ່າງ ໂຮງຮຽນ ການເມືອງ ແລະ ການປົກຄອງແຂວງ ກັບພະແນກການເງິນແຂວງ ໃນໂອກາດສຳຄັນດັ່ງກ່າວ ທ່ານ ສອນໄຊ ພໍລະສິມ ວ່າການຫົວໜ້າພະແນກການເງິນແຂວງ ຕາງໜ້າໃຫ້ພະແນກການເງິນແຂວງ ກໍໄດ້ມອບອຸປະກອນກິລາຈຳນວນໜຶ່ງ ໃຫ້ແກ່ໂຮງຮຽນ ເພື່ອເປັນການປະກອບສ່ວນເຂົ້າໃນການສ້າງຂະບວນການທາງດ້ານກິລາ-ສິລະປະ ແລະວັນນະຄະດີ ເຊິ່ງຕິດພັນກັບ 5 ຫຼັກມູນ ຂອງການສຶກສາ ເວົ້າລວມ, ເວົ້າສະເພາະ ກໍເພື່ອປະກອບສ່ວນເຂົ້າໃນການສ້າງຂະບວນການຂໍ່ານັບຮັບຕ້ອນ ກອງປະຊຸມໃຫຍ່ ຄັ້ງທີ VIII ຂອງໜ່ວຍພັກໂຮງຮຽນການເມືອງ ແລະການປົກຄອງແຂວງ ທີ່ຈະໄດ້ຈັດຂຶ້ນໃນມໍ່ໆນີ້, ການສ້າງຂະບວນການໃນຄັ້ງນີ້ປະກອບມີ 3 ປະເພດກິລາຄື: ບານເຕະຊາຍ, ບານສົ່ງຊາຍ ແລະ ເປຕັງ ຊາຍ-ຍິງ.
ໃນໂອກາດຕອນທ້າຍ ທ່ານ ສີວອນ ບຸດດາຈັນ ກຳມະການພັກແຂວງ ຫົວໜ້າໂຮງຮຽນການເມືອງ ແລະ ການປົກຄອງແຂວງ ຕາງໜ້າໂຮງຮຽນ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ການມາຢ້ຽມຢາມໃນຄັ້ງນີ້ ພ້ອມທັງຈະສືບຕໍ່່ຜູກແໜ້ນຄວາມສາມັກຄີປອງດອງ ແລະເພີ່ມພູນຄູນສ້າງສາຍພົວພັນມິດຕະພາບອັນແໜ້ນແຟ້ນ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນໄປ.
ພາບ-ຂ່າວ: ໄຊສົມແພງ ສີສົມບັດ ໂຮງຮຽນການເມືອງ ແລະ ການປົກຄອງ ແຂວງຊຽງຂວາງ.
.