ສໍາເລັດກອງປະຊຸມໃຫຍ່ ສະມາຊິກພັກ ຂອງໜ່ວຍພັກຮາກຖານກົມຈັດຕັ້ງ-ພະນັກງານ ແລະ ກົມກວດກາ

          ໃນຕອນເຊົ້າຂອງວັນທີ 09/08/2024 ທີ່ ຫ້ອງປະຊຸມຊັ້ນ 3 ຕຶກ H ສະຖາບັນການເມືອງ ແລະ ການປົກຄອງແຫ່ງຊາດ, ໜ່ວຍພັກຮາກຖານກົມຈັດຕັ້ງ-ພະນັກງານ ແລະກົມກວດກາ ໄດ້ເປີດກອງປະຊຸມໃຫຍ່ ສະມາຊິກພັກ ຄັ້ງທີ II ຂອງຕົນຂຶ້ນ, ໂດຍການເປັນປະທານຂອງ ສະຫາຍ ຮສ ພູວົງ ອຸ່ນຄໍາແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ສະຫາຍ ປອ ຄໍາຫຼ້າ ລໍວານໄຊ ເລຂາໜ່ວຍພັກຮາກຖານກົມຈັດຕັ້ງ-ພະນັກງານ ແລະກົມກວດກາ, ສະຫາຍ ປອ ນາງ ຈັນທະໜອມ ບັນດາວົງ ຮອງຫົວໜ້າກົມຈັດຕັ້ງ-ພະນັກງານ, ມີຜູ້ຕາງໜ້າບັນດາໜ່ວຍພັກຮາກຖານ ອ້ອມຂ້າງ ອົງຄະນະພັກ ສມປຊ ແລະສະມາຊິກພັກພາຍໃນໜ່ວຍພັກຮາກຖານກົມ ຈຕງ+ກກ ເຂົ້າຮ່ວມຢ່າງພ້ອມພຽງ.

          ສະຫາຍ ປອ ຄໍາຫຼ້າ ລໍວານໄຊ ເລຂາໜ່ວຍພັກຮາກຖານກົມ ຈຕງ+ກກ ໄດ້ຂຶ້ນຜ່ານຮ່າງບົດລາຍງານການເມືອງ ເຊິ່ງໄດ້ຕີລາຄາການນໍາພາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI (2019-2024) ໂດຍໄດ້ຍົກໃຫ້ເຫັນຜົນສຳເລັດທີ່ຍາດມາໄດ້ ໃນແຕ່ລະດ້ານ ເປັນຕົ້ນແມ່ນວຽກງານການເມືອງນໍາພາແນວຄິດ ໄດ້ນໍາພາສະມາຊິກພັກພາຍໃນໜ່ວຍພັກຮາກຖານເຂົ້າຮ່ວມເຊື່ອມຊຶມບັນດາເອກະສານທີ່ສໍາຄັນຂອງພັກ-ລັດ ທີ່ ສມປຊ ໄດ້ຈັດຂຶ້ນ, ເຮັດໃຫ້ສະມາຊິກພັກກຳໄດ້ບັນດາມະຕິຂອງພັກ-ລັດທີ່ໄດ້ວາງອອກແຕ່ລະໄລຍະ, ເຊິ່ງຕະຫຼອດໄລຍະສະໄໝກອງປະຊຸມທີ່ຜ່ານມາໜ່ວຍພັກໄດ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ເພີ່ມກຳລັງແຮງຮູ້ຮົບພາຍໃນໜ່ວຍພັກໃຫ້ເຂັ້ມແຂງ, ປະຕິບັດໜ້າທີ່ວຽກງານດ້ານວິຊາສະເພາະໃນແຕ່ລະຂົງເຂດວຽກງານຢ່າງມີຜົນສໍາເລັດ. ນອກນັ້ນ, ໃນບົດລາຍງານການເມືອງຍັງໄດ້ວາງທິດທາງແຜນການໃນຕໍ່ໜ້າ ແລະຕີລາຄາຢ່າງພາວະວິໄສຕໍ່ກັບຂໍ້ຄົງຄ້າງບໍ່ຍັງບໍ່ສາມາດບັນລຸໄດ້ຕາມແຜນການ, ພ້ອມທັງສ່ອງແສງໃຫ້ເຫັນສາເຫດທີ່ພາໃຫ້ມີຈຸດດີ, ຈຸດອ່ອນ ແລະບົດຮຽນທີ່ຖອດຖອນໄດ້.

          ໃນກອງປະຊຸມຄັ້ງນີ້ ສະມາຊິກພັກພາຍໃນໜ່ວຍພັກຮາກຖານໄດ້ໃຊ້ສິດປະຊາທິປະໄຕຢ່າງເຕັມສ່ວນເລືອກຕັ້ງເອົາຄະນະໜ່ວຍພັກຊຸດໃໝ່, ເຊິ່ງມີຜູ້ລົງສະໝັກຮັບເລືອກຕັ້ງທັງໝົດ 5 ສະຫາຍ, ຍິງ 2 ສະຫາຍ, ກອງປະຊຸມຄັ້ງປະຖົມມະລືກໄດ້ເປັນເອກະສັນເລືອກເອົາ:

1. ສະຫາຍ ປທ ສົມສີ ຈັນຕະພົມ ເປັນເລຂາ
2. ສະຫາຍ ປອ ນາງ ຈັນທະໜອມ ບັນດາວົງ ເປັນຮອງເລຂາ, ທັງເປັນຜູ້ກວດກາ
3. ສະຫາຍ ວິໄລສິດ ພິມພັກດີ ເປັນກຳມະການ