ເມື່ອບໍ່ດົນມານີ້ ແຂວງຫຼວງນໍ້າທາຈັດກອງປະຊຸມສຳມະນາວິທະຍາສາດຫົວຂໍ້: ສ້າງການຫັນປ່ຽນຢ່າງແຂງແຮງໃຫ້ແກ່ພະນັກງານໃນເງື່ອນໄຂເສດຖະກິດຕະຫຼາດຢູ່ 6 ແຂວງພາກເໜືອຄື: ແຂວງຫລວງນ້ຳທາ, ອຸດົມໄຊ, ບໍ່ແກ້ວ, ຜົ້ງສາລີ, ຫລວງພະບາງແລະແຂວງໄຊຍະບູລີ. ໂດຍການເປັນປະທານຂອງ ທ່ານ ປອ ດາວສະຫວັນ ເຄືອມີໄຊ ຮອງປະທານສະພາວິທະຍາສາດ. ຮອງຫົວໜ້າສະຖາບັນການເມືອງແລະການການປົກຄອງແຫ່ງຊາດ, ທ່ານ ປອ ຄໍາພັນ ເຈຍອາກຳມະການພັກແຂວງ, ຫົວໜ້າໂຮງຮຽນການມືອງ ແລະ ການປົກຄອງ ແຂວງຫຼວງນໍາທາ. ໃຫ້ກຽດເຂົ້າຮ່ວມຂອງ ທ່ານວຽງສະຫວັດ ສີພັນດອນ, ກຳມະການສູນກາງພັກ, ເລຂາພັກແຂວງ, ເຈົ້າແຂວງຫຼວງນ້ຳທາ, ມີບັນດາຄະນະໂຮງຮຽນການເມືອງ 6 ແຂວງພ້ອມດ້ວຍນັກວິທະຍາສາດແລະພະນັກງານຄູ-ອາຈານເຂົ້າຮ່ວມ.
ທ່ານ ປອ ດາວສະຫວັນ ເຄືອມີໄຊ ຮອງປະທານສະພາວິທະຍາສາດ, ຮອງຫົວໜ້າສະຖາການເມືອງ ແລະ ການການປົກຄອງແຫ່ງຊາດໃຫ້ຮູ້ວ່າ: ເງື່ອນໄຂການພັດທະນາເສດຖະກິດຕະຫຼາດຕາມທິດສັງຄົມນິຍົມ. ທີ່ພວກເຮົາກໍາລັງປະເຊີນໜ້າຢູ່ໃນປັດຈຸບັນນີ້ນອກຈາກດ້ານຕັ້ງໜ້າແລ້ວເສດຖະກິດຕະຫຼາດຍັງສົ່ງຜົນກະທົບດ້ານຫຍໍ້ທໍ້ບໍ່ໜ້ອຍໃຫ້ແກ່ພະນັກງານ, ສະມາຊິກພັກເປັນຕົ້ນແມ່ນ: ເກີດມີພະຍາດລັດທິເອກະຊົນເຊິ່ງເປັນສາຍເຫດກໍ່ໃຫ້ເກີດຫຼາຍໆພະຍາດ. ທີ່ເປັນການບັນທອນກຳລັງແຮງສູ້ຮົບຂອງພັກເຮັດໃຫ້ອິດທິພົນແລະຄວາມເຊື່ອໝັ້ນຂອງມະຫາຊົນຕໍ່ພັກ,ຕໍ່ລັດຫຼຸດໜ້ອຍຖອຍລົງເຊີ່ງມັນສະແດງອອກ: ພະຍາດຂາດລະບຽບວິໄນ, ຫ່າງເຫີນມະຫາຊົນ, ພະຍາດໃນຕົວ, ການເຊື່ອມຖອຍ, ຄຸນທາດການເມືອງ, ສໍ້ລາດບັງຫຼວງ, ຫຼີ້ນກິນຟຸມເຟືອຍເຊິ່ງພະຍາດດັ່ງກ່າວນີ້ກໍາລັງແຜ່ລະບາດ ຢ່າງໜັກໜ່ວງເຊິ່ງສາເຫດຫຼັກແມ່ນພະນັກງານເຮົາຍັງບໍ່ທັນສ້າງໄດ້ການຫັນປ່ຽນຢ່າງເລິກເຊິ່ງ, ພະນັກງານຈຳນວນໜຶ່ງຍັງຂາດການຝຶກຝົນຫຼໍ່ຫຼອມທາງດ້ານຄຸນທາດການເມືອງ, ຄຸນສົມບັດ-ສິນທຳປະຕິວັດພະນັກງານ, ສະມາຊິກພັກ,ຄະນະພັກແຕ່ລະຂັ້ນຍັງບໍ່ທັນຖືສຳຄັນວຽກງານສຶກສາອົບຮົມການເມືອງແນວຄິດ, ຍັງຂາດຄວາມເປັນແບບຢ່າງນຳໜ້າ.
ບັນດາຫົສຂໍ້ບົດວິທະຍາສາດທີ່ບັນດາໂຮງຮຽນການເມືອງ ແລະ ການປົກຄອງແຂວງ ຮັບຄົ້ນຄວ້າມີ 6 ຫົວຂໍ້ຍ່ອຍຄື:
1). “ສ້າງຄວາມເຂັ້ມແຂງໃຫ້ແກ່ພະນັກງານການເງິນຢູ່ແຂວງອຸດົມໄຊ”
2). “ສົ່ງເສີມການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍແລະກາງຢູ່ແຂວງຫຼວງພະບາງ”.
3). “ຍົກສູງຄຸນນະພາບການເກັບພາສີທີ່ດິນຢູ່ແຂວງໄຊຍະບູລີ”
4).“ຍົກສູງຄຸນນະພາບການແກ້ໄຂປະກົດການຫຍໍ້ທໍ້ ໃນຂະແໜງການເງິນຢູ່ແຂວງບໍ່ແກ້ວ”
5). “ຄຸ້ມຄອງການເກັບລາຍຮັບ-ລາຍຈ່າຍໃຫ້ມີຄວາມເຂັ້ມແຂງ, ໂປ່ງໃສຢູ່ແຂວງຫຼວງນ້ຳທາ”
6). “ເພີ່ມທະວີການຂຸດຄົ້ນທ່າແຮງບົ່ມຊ້ອນທາງດ້ານເສດຖະກິດຢູ່ແຂວງຜົ້ງສາລີ”
ເຊິ່ງແຕ່ລະບົດຄົ້ນຄວ້ານັ້ນແມ່ນມີເນື້ອໃນທີ່ສ່ອງໃຫ້ເຫັນບັນຫາດ້ານຕ່າງໆທີ່ຈະແຈ້ງ ເຊິ່ງໃນແຕ່ລະບົດຄົ້ນຄວ້າທີ່ບັນດໂຮງຮຽນການເມືອງ ຂອງແຕ່ລະແຂວງຂຶ້ນນໍາສະເໜີນັ້ນ ໄດ້ສ້າງຄວາມສົນໃຈໃຫ້ແກ່ນັກວິທະຍາສາດທີ່ເຂົ້າຮ່ວມກອງປະຊຸມຄັ້ງນີ້ ພ້ອມທັງໄດ້ຕັ້ງຄໍາຖາມແຈະຈິ້ມ ຕໍ່ກັນບັນຫາດ້ານຕ່າງໆທີ່ໄດ້ນໍາສະເໜີນັ້ນ.
ນອກນີ້, ກອງປະຊຸມຍັງໄດ້ຮັບຟັງການລາຍງານໂດຍສັງເຂບຂອງແຕ່ລະແຂວງ ໃນຫົວຂໍ້: ບຸກທະລຸດ້ານແນວຄິດ,ຈິນຕະນາການໃຫ້ແກ່ພະນັກງານ-ສະມາຊິກພັກຢູ່ແຂວງຫຼວງນໍ້າທາ, ສ້າງການຫັນປ່ຽນດ້ານແນວຄິດຂອງພະນັກງານ-ສະມາຊິກພັກໃນເງື່ອນໄຂເສດຖະກິດຕະຫຼາດຕາມທິດສັງຄົມນິຍົມຢູ່ແຂວງອຸດົມໄຊ, ຍົກສູງຄຸນທາດການເມືອງ, ຄຸນສົມບັດສິນທໍາປະຕິວັດໃຫ້ພະນັກງານສະມາຊິກພັກຢູ່ແຂວງໄຊຍະບູລີ, ຝຶກຝົນຫຼໍ່ຫຼອມຄຸນສົມບັດສິນທໍາປະຕິວັດໃຫ້ພະນັກງານ-ສະມາຊິກພັກຢູ່ແຂວງຫຼວງພະບາງ.