ໃນພິທີ ທ່ານ ປທ ແສງແກ້ວ ວົງລໍາພັນ ຮອງຫົວໜ້າກົມຄຸ້ມຄອງການຮຽນ-ການສອນ ໄດ້ຂຶ້ນຜ່ານແຜນການ ເຄື່ອນໄຫວຈັດຕັ້ງປະຕິບັດຊຸດເຝິກອົບຮົມ ແລະການເຝິກອົບຮົມດັ່ງກ່າວແມ່ນຈະໄດ້ດໍາເນີນເປັນເວລາ 15 ວັນ, ເຊິ່ງເລີ່ມແຕ່ວັນທີ 09-27 ກັນຍາ 2024 ຜູ້ເຂົ້າຮ່ວມເຝິກອົບອົບຄັ້ງນີ້ແມ່ນມາຈາກບັນດາເມືອງໃນຂອບເຂດທົ່ວປະເທດ, ເຊິ່ງຈຸດປະສົງໃນການເຝິກອົບຮົມຄື:
ໜຶ່ງ: ສ້າງຄວາມຮັບຮູ້ຢ່າງເປັນລະບົບກ່ຽວກັບການໝູນໃຊ້ທິດສະດີມາກ-ເລນິນ, ທິດສະດີການເມືອງ ແລະ ການບໍລິຫານຄຸ້ມຄອງລັດ, ການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຄັ້ງທີ XI, ແຜນຍຸດທະສາດ ແລະວຽກງານຈຸດສຸມທີ່ໄດ້ກຳນົດໄວ້ໃນແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ IX ທ້າຍສະໄໝ, ກະກຽມໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນ;
ສອງ: ແນໃສ່ປັບປຸງແບບແຜນນຳພາ-ຄຸ້ມຄອງຢູ່ຂັ້ນເມືອງໃຫ້ເປັນລະບົບ, ຮັບປະກັນລັກສະນະວິທະຍາສາດ, ຍົກສູງຄວາມຮັບຜິດຊອບການເມືອງຂອງຄະນະພັກເມືອງໂດຍສະເພາະແມ່ນຄະນະປະຈໍາພັກ ແລະເລຂາພັກເມືອງ;
ສາມ: ຍົກສູງຄວາມສາມາດນຳພາ-ຊີ້ນໍາ, ເຮັດວຽກງານການເມືອງ-ແນວຄິດ ໃຫ້ແກ່ປະຊາຊົນພາຍໃນເມືອງຂອງຕົນ, ມີຄວາມສາມັກຄີເປັນເອກະພາບຢ່າງໜັກແໜ້ນ, ພັດທະນາຊີວິດການເປັນຢູ່ໃຫ້ດີຂຶ້ນຕາມຄາດໝາຍສູ້ຊົນທີ່ໄດ້ກຳນົດໄວ້ໃນແຕ່ລະໄລຍະ.
ໃນຕອນທ້າຍພິທີ ທ່ານ ປະທານໄດ້ໃຫ້ຄໍາໂອລົມຕໍ່ນັກເຝິກອົບຮົມ, ຄູ-ອາຈານ ທີ່ຂຶ້້ນຫ້ອງສິດສອນ ແລະຜູ້ຮັບ ຜິດຊອບຄື:
ຕໍ່ກັບນັກເຝິກອົບຮົມ:
ຕ້ອງຍົກສູງຄວາມຮັບຜິດຊອບ ເອົາໃຈໃສ່ ໃນການຄົ້ນຄວ້າ, ສຶກສາຮໍ່າຮຽນທິດສະດີການເມືອງ ແລະ ການປົກ ຄອງຕາມແນວທາງຂອງພັກ ແລະເຂົ້າຮ່ວມເຝິກອົບຮົມໃຫ້ຄົບຕາມຫຼັກສູດ;
ຕິດຕາມຜູ້ບັນລະຍາຍຢ່າງເປັນຂະບວນພົດຟື້ນ, ສ້າງຄວາມສາມັກຄີຊ່ວຍເຫຼືອເຊິ່ງກັນແລະກັນ, ແລກປ່ຽນຄໍາຄິດຄຳເຫັນທາງດ້ານທິດສະດີ ແລະພຶດຕິກຳ ລະຫວ່າງ ນັກເຝິກອົບຮົມດ້ວຍກັນ ແລະ ລະຫວ່າງ ນັກເຝິກອົບຮົມກັບຄູ-ອາຈານໃຫ້ສູງຂຶ້ນ.
ເອົາໃຈໃສ່ໃນການຮັກສາກົດລະບຽບ ແລະການໄປມາ ຕະຫຼອດເຖິງການຮັກສາສຸຂະພາບ.
ຕໍ່ກັບຄູ-ອາຈານ ແລະຄະນະຮັບຜິດຊອບຊຸດເຝິກອົບຮົມ:
ເອົາໃຈໃສ່ໃນການຄົ້ນຄວ້າບົດສອນ, ແຕ່ງບົດສອນຕາມຫົວຂໍ້ບົດທີ່ຕົນເອງຮັບຜິດຊອບ ບົນພື້ນຖານທິດສະດີຕ້ອງຕິດພັນກັບພຶດຕິກຳຕົວຈິງ;
ເອົາໃຈໃສ່ສ້າງສິ່ງເອື້ອອຳນວຍຄວາມສະດວກຢ່າງຊະນິດຕິດແທດກັບນັກເຝິກອົບຮົມ, ການເຄື່ອນໄຫວຈັດຕັ້ງປະຕິບັດຫຼັກສູດການຮຽນ-ການສອນ, ອຸປະກອນຮັບໃຊ້ຕ່າງໆໃນການເຝິກອົບຮົມ ແລະການປະສານສົມທົບກັບພາກ ສ່ວນກ່ຽວຂ້ອງ.
ຂ່າວ/ພາບ: ພະແນກຄົ້ນຄວ້າວິໄຈຂ່າວ
ບັນນາທິການ: ປທ ບຸນປັນ ສຸມຸນທອງ