ໃນຕອນແລງວັນທີ 27 ກັນຍາ 2024 ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີປິດຊຸດເຝິກອົບຮົມທິດສະດີການເມືອງ ແລະ ການບໍລິຫານຄຸ້ມຄອງລັດ ໃຫ້ແກ່ເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ ຊຸດທີ VII ພາຍໃຕ້ການເປັນປະທານຮ່ວມໂດຍ: ທ່ານ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ແລະທ່ານ ນິສິດ ແກ້ວປັນຍາ ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງພາຍໃນ ມີຫົວໜ້າກົມກໍ່ສ້າງພະນັກງານ ຄະນະຈັດຕັ້ງສູນກາງພັກ, ຫົວໜ້າສະຖາບັນຄົ້ນຄວ້າວິທະຍາສາດການປົກຄອງ ແລະ ເຝິກອົບຮົມກະຊວງພາຍໃນ, ບັນດາຫົວໜ້າ, ຮອງຫົວໜ້າກົມພາຍໃນ ສມປຊ, ຫ້ອງການ, ສູນຂໍ້ມູນຂ່າວສານການເມືອງ ແລະການປົກຄອງ ແລະສູນຄົ້ນຄວ້າແນວຄິດ ໄກສອນ ພົມວິຫານ, ຄະນະຮັບຜິດຊອບຊຸດເຝິກອົບຮົມ ແລະຄູ-ອາຈານ ຈາກ ສມປຊ ກໍ່ເຂົ້່າຮ່ວມລວມທັງໝົດ 80 ກວ່າທ່ານ, ເຊິ່ງກອງປະຊຸມດັ່ງກ່າວແມ່ນ ໄດ້ດໍາເນີນເປັນເວລາ 3ອາທິດ (15 ວັນ) ແຕ່ວັນທີ 09-27 ກັນຍາ 2024.
ໃນກອງປະຊຸມ ທ່ານ ປອ ຈັນທາ ອ່ອນໄຊວຽງ ຫົວໜ້າສະຖາບັນຄົ້ນຄວ້າວິທະຍາສາດການປົກຄອງ ແລະ ເຝິກອົບຮົມ, ກະຊວງພາຍໃນ ໄດ້ຜ່ານບົດສະຫຼຸບຕະຫຼອດໄລຍະການຮຽນ-ການສອນ, ເຊິ່ງທ່ານໄດ້ລາຍງານວ່າ: ການຂຶ້ນຫ້ອງສິດສອນສ່ວນຫຼາຍແມ່ນຄູ-ອາຈານ ຈາກສະຖາບັນການເມືອງ ແລະ ການປົກຄອງແຫ່ງຊາດ, ກະຊວງພາຍໃນ ແລະຄູ-ອາຈານຮັບເຊີນອາດິດພະນັກງານບໍານານອາວຸໂສ ແມ່ນຜູ້ທີ່ມີປະສົບການສູງໃນການຂຶ້ນຫ້ອງສອນມີຄວາມຮູ້, ຄວາມສາມາດທີ່ແນ່ນອນ ແລະມີປະສົບການໃນການສົ່ງຄວາມຮູ້ໃຫ້ແກ່ຜູ້ຮໍ່າຮຽນໄດ້ດີ, ເຊິ່ງມັນສະແດງອອກໃນການກະກຽມບົດສອນ, ການສະໜອງຂໍ້ມູນ ແລະການຂຶ້ນຫ້ອງບັນຍາຍ, ການແລກປ່ຽນ ແລະແກ້ໄຂຂໍ້ຂ້ອງໃຈໃຫ້ແກ່ຜູ້ເຂົ້າຮ່ວມ ເຊິ່ງປະຕິບັດໄດ້ຢ່າງຖືກເປົ້າໝາຍ ແລະຜູ້ເຂົ້າຮ່ວມເຝິກອົບຮົມກໍໍ່ມີຄວາມຕັ້ງໃຈໃນການຮັບຟັງ, ການຄົ້ນຄວ້າສົນທະນາ-ແລກປ່ຽນ ແລະຕັ້ງຄຳຖາມຕໍ່ຄູ-ອາຈານ, ມີຊົ່ວໂມງຄົ້ນຄວ້າສຳມະນາບັນຫາຕ່າງໆໃນການຈັດຕັ້ງປະຕິບັດວຽກງານ ແລະການນໍາພາ-ຊີ້ນໍາຂອງບັນດາເມືອງ ເພື່ອແລກປ່ຽນຊອກຫາວິທີການແກ້ໄຂບັນຫາ, ພ້ອມທັງໄດ້ຊີ້ແຈງແກ້ຂໍ້ຂ້ອງໃຈ ຫຼື ບັນຫາທີ່ຍັງບໍ່ທັນເຂົ້າໃຈຢ່າງເລິກເຊິ່ງຮ່ວມກັບຄູ-ອາຈານຜູ້ຊ່ຽວ ຊານ. ພ້ອມກັນນັ້ນ, ກໍ່ຍັງມີຄວາມສາມັກຄີຮັກແພງຊ່ວຍເຫຼືອຊຶ່ງກັນແລະກັນ, ເຮັດໃຫ້ມີບັນຍາກາດອັນດີ ລະ ຫວ່າງ ຄູ-ອາຈານ ແລະຜູ້ເຂົ້າຮ່ວມເຝິກອົບຮົມ, ຄະນະຮັບຜິດຊອບກັບຄູ-ອາຈານ, ຄະນະຮັບຜິດຊອບກັບຜູ້ເຂົ້າຮ່ວມຊຸດເຝິກອົບຮົມດ້ວຍກັນຢ່າງເປັນຂະບວນຕັ້ງໜ້າ ແລະຟົດຟື້ນ, ເຊິ່ງມັນສະແດງອອກຄື: ຜົນໄດ້ຮັບລວມຂອງການຈັດຊຸດເຝິກອົບຮົມໃນຊຸດທີ VII ນີ້ ແມ່ນຢູ່ໃນລະດັບດີ ຫາ ດີຫຼາຍ, ຕີລາຄາຄວາມຮັບຮູ້ຂອງຜູ້ເຂົ້າເຝິກອົບຮົມ ແລະຂັ້ນຕອນການເຝິກທັງໝົດ ມີຄະແນນ 18,39 ສະເລ່ຍ 4,59 ທາງດ້ານເນື້ອໃນໂດຍລວມແລ້ວເຫັນວ່າຜູ້ເຂົ້າເຝິກອົບຮົມທີ່ໄດ້ຜ່ານຄົບ 15ວັນ.
ເພື່ອເປັນການຢັ້ງຢືນຄືນຜົນສຳເລັດເຝິກອົບຮົມ ທ່ານ ຮສ. ພູວົງ ອຸ່ນຄຳແສນ ກຳມະການສູນກາງພັກ, ເລ ຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ແລະທ່ານ ນິສິດ ແກ້ວປັນ ຍາ ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງພາຍໃນ ໄດ້ເປັນກຽດມອບໃບຢັ້ງຢືນໃຫ້ສຳມະນາກອນຈຳນວນ 50 ທ່ານ, ຍິງ 5 ທ່ານ.
ພ້ອມກັນນັ້ນ, ທ່ານປະທານໄດ້ມີຄໍາເຫັນໂອ້ລົມ ແລະໃຫ້ທິດເຍືອງທາງຕໍ່ກັບສຳມະນາກອນໃນການປະຕິບັດໜ້າທີ່ວຽກງານໃນຕໍ່ໜ້າຄື:
ໜຶ່ງ: ຮຽກຮ້ອງໃຫ້ບັນດານັກສໍາມະນາກອນໃນນາມເປັນຜູ້ບໍລິຫານສູງສຸດຂອງຂັ້ນເມືອງ ທີ່ມີບົດບາດ ໃນການນຳພາ-ຊີ້ນໍາທຸກດ້ານທີ່ສໍາຄັນ, ຈະຕ້ອງໄດ້ສຶກສາ, ຄົ້ນຄວ້າບົດຮຽນທີ່ໄດ້ຈາການເຝິກອົບຮົມຄັ້ງນີ້ ໃຫ້ເຂົ້າໃຈຢ່າງເລິກເຊິ່ງຕໍ່ເນື້ອໃນຂອງແຕ່ລະບົດ ເພື່ອເອົາໄປໝູນໃຊ້ເຂົ້າໃນວຽກງານທີ່ຮັບຜິດຊອບໃຫ້ມີຄວາມເຂັ້ມແຂງ ແລະ ມີປະສິດທິພາບສູງຂຶ້ນ;
ສອງ: ພ້ອມກັນນໍາເອົາບົດຮຽນຄັ້ງນີ້ ໄປແລກປ່ຽນ-ຖ່າຍທອດໃຫ້ແກ່ພະນັກງານຫຼັກແຫຼ່ງພາຍໃນຂັ້້ນເມືອງຂອງຕົນ ເພື່ອໃຫ້ການຈັດຕັ້ງປະຕິບັດວຽກງານມີຄວາມຖືກຕ້ອງ ແລະຮັດກຸມຂຶ້ນ ທັງເປັນການພັດທະນາພະນັກງານຜູ້ນັ້ນໃຫ້ມີຄວາມເຂົ້າໃຈ ແລະຮັບຮູ້ແນວທາງການເມືອງ, ທິດສະດີການເມືອງ ແລະ ການບໍລິຫານຄຸ້ມຄອງລັດ, ຍົກສູງຄວາມສາມາດ ດ້ານສະຕິປັນຍາ ເຫື່ອແຮງ ຄວາມເສຍສະຫລະ, ມີຈັນຍາບັນ, ຈັນຍາທຳ ແລະສະຕິຊາດໃຫ້ສູງຂຶ້ນ;
ສາມ: ນໍາເອົາໝາກຜົນສໍາເລັດອັນຈົບງາມນີ້ລາຍງານຕໍ່ຄະນະພັກ-ຄະນະນໍາຂອງແຂວງເພື່ອຢັ້ງຢືນເຖິງຜົນສໍາເລັດການເຂົ້າຮ່ວມຊຸດເຝິກອົບຮົມໃນຄັ້ງນີ້ ແລະເປັນເງື່ອນໄຂອັນດີໃນຕໍ່ໜ້າໃນການພັດທະນາຂີດຄວາມສາມາດໃນການນຳພາ-ຄຸ້ມຄອງຂອງບັນດາທ່ານບັນດາສະຫາຍຕໍ່ໄປ.
ຂ່າວ/ພາບ: ນາງ ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ