ໂດຍປະຕິບັດຕາມ ຂໍ້ຕົກລົງ ຂອງສະພາວິທະຍາສາດສະຖາບັນການເມືອງ ແລະ ການປົກຄອງແຫ່ງຊາດ ວ່າດ້ວຍການແຕ່ງຕັ້ງຄະນະຮັບຜິດຊອບກອງປະຊຸມສໍາມະນາວິທະຍາສາດ ຫົວຂໍ້: ຄຸ້ມຄອງຊັບພະຍາກອນທໍາມະຊາດຕາມທິດສີຂຽວ, ຢືນຍົງ ຢູ່ບັນດາແຂວງພາກກາງ ສະບັບເລກທີ 186/ສວ, ນະຄອນຫຼວງວຽງຈັນ, ວັນທີ 17 ຕຸລາ 2024.
ໃນຕອນເຊົ້າວັນທີ 31 ຕຸລາ 2024 ຢູ່ທີ່ສະໂມສອນໂຮງຮຽນການເມືອງ ແລະ ການປົກຄອງແຂວງຊຽງຂວາງ ໄດ້ຈັດເປີດກອງປະຊຸມສໍາມະນາວິທະຍາສາດ ຫົວຂໍ້: ຄຸ້ມຄອງຊັບພະຍາກອນທໍາມະຊາດ ຕາມທິດສີຂຽວ, ຢືນຍົງ ຢູ່ບັນດາແຂວງພາກກາງ ພາຍໃຕ້ການເປັນປະທານໂດຍ: ທ່ານ ປອ ດາວສະຫວັນ ເຄືອມີໄຊ ຄະນະປະຈໍາພັກ ຮອງປະທານສະພາວິທະຍາສາດ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ທ່ານ ນາງ ບົວສີ ນາຖາວົງ ຄະນະປະຈໍາພັກແຂວງ ປະທານແນວລາວສ້າງຊາດແຂວງ, ທ່ານ ສີວອນ ບຸດດາຈັນ ກຳມະການພັກແຂວງ ຫົວໜ້າໂຮງຮຽນການເມືອງ ແລະ ການປົກຄອງແຂວງຊຽງຂວາງ, ມີຄະນະພັກ, ຄະນະນໍາໂຮງຮຽນການເມືອງ ແລະ ການປົກຄອງແຂວງບັນດາແຂວງພາກກາງ, ມີແຂກຖືກເຊີນ, ບັນດາພະແນກການພາຍໃນແຂວງ, ມີນັກວິທະຍາສາດ, ມີພະນັກງານ, ຄູ-ອາຈານ ແລະນັກສຶກສາທິດສະດີການເມືອງຂັ້ນກາງຮຸ່ນທີ III ເຂົ້າຮ່ວມທັງໝົດ 88ສະຫາຍ, ຍິງ 23 ສະຫາຍ, ໃນກອງປະຊຸມ ທ່ານ ນາງ ບົວສີ ນາຖາວົງ ຄະນະປະຈໍາພັກແຂວງ ປະທານແນວລາວສ້າງຊາດແຂວງຊຽງຂວາງ ໄດ້ເປັນກຽດຂຶ້ນລາຍງານສະພາບການພັດທະນາເສດຖະກິດ-ສັງຄົມ ຢູ່ແຂວງຊຽງຂວາງ ໃຫ້ຜູ້ແທນກອງປະຊຸມຮັບຊາບ ແລະຍັງຮຽກຮ້ອງໃຫ້ຜູ້ແທນກອງປະຊຸມຈົ່ງຍົກສູງສະຕິໃນຄວາມຮັບຜິດຊອບໃນການລາຍງານໃນແຕ່ລະຫົວຂໍ້ ເພື່ອຈັບໃຫ້ໄດ້ເນື້ອໃນໃຈຄວາມທີ່ສໍາຄັນ ແລະພ້ອມກັນປະກອບຄໍາຄິດຄໍາເຫັນໃສ່ໃນແຕ່ລະຫົວຂໍ້ຢ່າງກົງໄປກົງມາ ໃຫ້ສອດຄ່ອງກັບຫົວຂໍ້, ເນື້ອໃນ ແລະພັດທະນາແບບຢືນຍົງໃນປະ ເທດລາວເຮົາ. ພ້ອມທັງກ່າວເປີດກອງປະຊຸມຢ່າງເປັນທາງການ. ໃນກອງປະຊຸມຜູ້ເຂົ້າຮ່ວມໄດ້ຮັບຟັງການນໍາສະເໜີບົດນໍາ 1 ຫົວຂໍ້ ແລະ 12 ຫົວຂໍ້ປິ່ນອ້ອມ ໃນການຄຸ້ມຄອງຊັບພະຍາກອນທໍາມະຊາດຕາມທິດສີຂຽວ, ແບບຢືນຍົງ ທີ່ນໍາສະເໜີໂດຍຜູ້ຕ່າງໜ້າໂຮງຮຽນການເມືອງ ແລະການປົກຄອງແຂວງ 6 ແຂວງດັ່ງນີ້:
- ຫົວຂໍ້: ຄຸ້ມຄອງຊັບພະຍາກອນທໍາມະຊາດ ຕາມທິດສີຂຽວ, ຢືນຍົງ ຢູ່ບັນດາແຂວງພາກກາງ.
- ຫົວຂໍ້: ຍົກສູງບົດບາດ ຂອງລັດ ໃນການຄຸ້ມຄອງຊັບພະຍາກອນປ່າໄມ້ ຢູ່ນະຄອນຫຼວງວຽງຈັນ.
- ຫົວຂໍ້: ຄຸ້ມຄອງການນໍາໃຊ້ປ່າໄມ້ແບບຢືນຍົງ ຢູ່ແຂວງຫົວພັນ.
- ຫົວຂໍ້: ເພີ່ມທະວີການຄຸ້ມຄອງ ປ່າປ້ອງກັນແຫ່ງຊາດ ເຂດຍອດນໍ້າງື່ມພູສັນແຂວງຊຽງຂວາງ.
- ຫົວຂໍ້: ຄຸ້ມຄອງປ່າໄມ້ຕາມທິດພັດທະນາແບບຢືນຍົງ ຢູ່ແຂວງບໍລິຄໍາໄຊ.
- ຫົວຂໍ້: ຍົກສູງບົດບາດຂອງລັດ ໃນການຄຸ້ມຄອງການນໍາໃຊ້ທີ່ດິນ ຢູ່ແຂວງຊຽງຂວາງ.
- ຫົວຂໍ້: ຄຸ້ມຄອງການນໍາໃຊ້ທີ່ດິນກະສິກໍາ ຢູ່ແຂວງໄຊສົມບູນ.
- ຫົວຂໍ້: ຄຸ້ມຄອງການນໍາໃຊ້ທີ່ດິນກະສິກໍາ ຢູ່ແຂວງຊຽງຂວາງ.
- ຫົວຂໍ້: ພັດທະນາການທ່ອງທ່ຽວທໍາມະຊາດແບບຢືນຍົງ ຢູ່ນະຄອນຫຼວງວຽງຈັນ.
- ຫົວຂໍ້: ຄຸ້ມຄອງທຸລະກິດການທ່ອງທ່ຽວ ຕິດພັນກັບການປົກປັກຮັກສາສິ່ງແວດລ້ອມ ຢູ່ແຂວງວຽງຈັນ.
- ຫົວຂໍ້: ພັດທະນາສະຖານທີ່ທ່ອງທ່ຽວແບບຢືນຍົງ ຢູ່ແຂວງບໍລິຄຳໄຊ.
- ຫົວຂໍ້: ພັດທະນາຕົວເມືອງຊໍາເໜືອ ເປັນເມືອງສະອາດ, ສີຂຽວ, ຢືນຍົງ ຢູ່ແຂວງຫົວພັນ.
- ຫົວຂໍ້: ເພີ່ມທະວີການມີສ່ວນຮ່ວມຂອງປະຊາຊົນ ເຂົ້າໃນການປົກປັກຮັກສາສິ່ງແວດລ້ອມ ຢູ່ແຂວງວຽງຈັນ.
ຈາກນັ້ນຜູ້ແທນ ກອງປະຊຸມໄດ້ປະກອບຄໍາຄິດ-ຄໍາເຫັນໃສ່ແຕ່ລະຫົວຂໍ້ຢ່າງກົງໄປກົງມາ ແລະມີລັກສະນະສ້າງສັນ ເພື່ອເຮັດໃຫ້ການປົກປັກຮັກສາ ແລະຄຸ້ມຄອງຊັບພະຍາກອນທໍາມະຊາດ ທີ່ຕິດພັນກັບການທ່ອງທ່ຽວຂອງແຕ່ລະແຂວງ.
ໃນຕອນທ້າຍ ທ່ານປະທານໄດ້ມີຄໍາເຫັນສະຫຼຸບຄືນຕໍ່ກອງປະຊຸມ ເຊິ່ງທ່ານໄດ້ຮຽກຮ້ອງໃຫ້ຜູ້ທີ່ເຂົ້າຮ່ວມກອງປະຊຸມສໍາມະນາວິທະຍາສາດຄັ້ງນີ້ກໍາໄດ້ເນື້ອໃນ, ວິທີການຄົ້ນຄວ້າ, ວິເຄາະ, ວິໄຈ ແລະບັນຫາຕ່າງໆ ທີ່ເກີດຂຶ້ນຢູ່ໃນສັງຄົມດ້ວຍເຫດ ແລະຜົນ, ຮູ້ສົມທຽບ ລະຫວ່າງ ທິດສະດີ ແລະພຶດຕິກຳຕົວຈິງ ພ້ອມທັງຊອກວິທີການແກ້ໄຂບັນຫາໃຫ້ຖືກຕ້ອງສອດຄ່ອງກັບສະພາບຄວາມເປັນຈິງ ຂອງແຕ່ລະພື້ນທີ່. ກອງປະຊຸມສໍາມະນາວິທະຍາສາດຄັ້ງຕໍ່ໄປທີ່ຈະຈັດຂຶ້ນໃນປີ 2025 ໂດຍແມ່ນໂຮງຮຽນການເມືອງ ແລະການປົກຄອງ ແຂວງຫົວພັນ ໄດ້ຮັບກຽດເປັນເຈົ້າພາບ.
ໃນໂອກາດກອງປະຊຸມຄັ້ງນີ້ ທ່ານ ປອ ດາວສະຫວັນ ເຄືອມີໄຊ ຮອງປະທານສະພາວິທະຍາສາດ, ຮອງຫົວໜ້າສະຖາບັນການເມືອງ ແລະການປົກຄອງແຫ່ງຊາດ ໄດ້ນໍາເອົາປື້ມພິມ ແນວຄິດ ໄກສອນ ພົມວິຫານ ກ່ຽວກັບການປ່ຽນແປງໃໝ່ ໃນຂົງເຂດເສດຖະກິດໃຫ້ໂຮງຮຽນການເມືອງ ແລະ ການປົກຄອງແຂວງ 6 ແຂວງ; ພ້ອມດຽວກັນນີ້ ຍັງມີອາດີດນັກສຶກສາທີ່ສໍາເລັດການສຶກສາທິດສະດີການເມືອງ ແລະ ການປົກຄອງແຂວງຊຽງຂວາງ ໄດ້ນໍາເອົາຊຸດກິລາຈໍານວນ 70ກ່ວາຊຸດ, ມູນຄ່າ 7,000,000 ກ່ວາກີບ ມອບໃຫ້ໂຮງຮຽນການເມືອງ ແລະການປົກຄອງແຂວງຊຽງຂວາງ ເພື່ອຮັບໃຊ້ເຂົ້າໃນວຽກງານການເຄື່ອນໄຫວວຽກງານສິລະປະ-ກິລາຕ່າງໆ.
ພາບ-ຂ່າວ: ນາງ ຄໍາເພັດ ບຸນນະຈັນ ໂຮງຮຽນການເມືອງ ແລະ ການປົກຄອງແຂວງຊຽງຂວາງ
ບັນນາທິການ: ປທ ບຸນປັນ ສຸມຸນທອງ