ໃນວັນທີ 18 ພະຈິກ 2024 ທີ່ ສະໂມສອນເມືອງບຸນເໜືອ ແຂວງຜົ້ງສາລີ ສະຖາບັນການເມືອງ ແລະການປົກຄອງແຫ່ງຊາດ ໄດ້ເປີດກອງປະຊຸມສະຫຼຸບຖອດຖອນບົດຮຽນຜູ້ບໍລິຫານໂຮງຮຽນກາານເມືອງ ແລະ ການປົກຄອງແຂວງນະຄອນຫຼວງ ປະຈຳປີ 2024 ແລະທິດທາງແຜນການໃນຕໍ່ໜ້າ ຂຶ້ນຢ່າງເປັນທາງການ, ໃຫ້ກຽດເປັນປະທານໂດຍ: ທ່ານ ຮສ ພູວົງ ອຸ່ນຄຳແສນ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ເຂົ້າຮ່ວມໂດຍ: ທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງຜົ້ງສາລີ, ມີບັນດາ ສະຫາຍ ຄະນະພັກ, ຄະນະນຳ, ຫົວໜ້າກົມ, ຫົວໜ້າຫ້ອງການ, ຫົວໜ້າຄະນະ, ຫົວໜ້າສູນຂໍ້ມູນຂ່າວສານການເມືອງ ແລະ ການປົກຄອງ, ສູນຄົ້ນຄ້ວາແນວຄິດ ໄກສອນ ພົມວິຫານ ແລະຫົວໜ້າໂຮງຮຽນການເມືອງ ແລະການປົກຄອງແຂວງ, ນະຄອນຫຼວງ ທົ່ວປະເທດ ເຂົ້າຮ່ວມ ລວມທັງໝົດ 67ທ່ານ, ຍິງ 35 ທ່ານ.
ໃນກອງປະຊຸມດັ່ງກ່າວ, ທ່ານ ປອ. ສຸພາວະດີ ຫຼ້າຄຳສາຍ ຫົວໜ້າກົມຄຸ້ມຄອງການຮຽນ-ການສອນ ໄດ້ຂຶ້ນຜ່ານບົດສະຫຼຸບກອງປະຊຸມຖອດຖອນບົດຮຽນຜູ້ບໍລິຫານ-ຄຸ້ມຄອງ ໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງວຽງຈັນ ປະຈຳປີ 2023-2024 ແລະທິດທາງແຜນການປະຈຳສົກປີ 2024-2025 ໂດຍທ່ານໄດ້ຍົກໃຫ້ເຫັນເຖິງການສະຫຼຸບຕີລາຄາການຈັດຕັ້ງປະຕິບັດຫຼັກສູດການຮຽນ-ການສອນ ໃນໄລຍະ 1 ປີຜ່ານມາໂດຍ ທ່ານໄດ້ກ່າວວ່າ: ພາຍໃຕ້ການນຳພາ-ຊີ້ນຳຢ່າງໃກ້ຊິດຈາກຄະນະພັກແຂວງ, ຄະນະພັກ, ຄະນະນຳສະຖາບັນ ກໍ່ຄືຄວາມເອົາໃຈໃສ່ຂອງຄະນະພັກ, ຄະນະອຳນວຍການໂຮງຮຽນ ເຮັດໃຫ້ການຈັດຕັ້ງປະຕິບັດຫຼັກສູດການຮຽນ-ການສອນໃນລະບົບ 45 ວັນ, ລະບົບ 10 ວັນໃຫ້ເລຂາພັກບ້ານ, ຄະນະພັກບ້ານ, ລະບົບຂັ້ນຕົ້ນ ແລະລະບົບຂັ້ນກາງ ໄດ້ທັງໝົດ 162ຊຸດ, ມີຜູ້ເຂົ້າຮຽນທັງໝົດ 8.381 ຄົນ, ຍິງ 2.101 ຄົນ; ໃນນີ້, ລະບົບເຝິກອົບຮົມໄລຍະ 45 ວັນ ມີ 2 ຊຸດ ມີຜູ້ເຂົ້າຮ່ວມທັງໝົດ 100 ຄົນ, ຍິງ 49ຄົນ; ລະບົບ 10 ວັນ ໃຫ້ເລຂາພັກບ້ານ ແລະຄະນະບ້ານ ມີ 54 ຊຸດ, ມີຜູ້ເຂົ້າຮຽນທັງໝົດ 2.712 ຄົນ, ຍິງ 421 ຄົນ; ລະບົບທິດສະດີການເມືອງຂັ້ນຕົ້ນ ມີ 58 ຊຸດ, ມີຜູ້ເຂົ້າຮຽນທັງໝົດ 2.196 ຄົນ, ຍິງ 736 ຄົນ ແລະລະບົບທິດສະດີການເມືອງຂັ້ນກາງ ມີ 50ຊຸດ, ມີຜູ້ເຂົ້າຮຽນທັງໝົດ 2.715 ຄົນ, ຍິງ 713 ຄົນ.
ນອກຈາກນັ້ນ, ທ່ານ ປອ ສຸພາວະດີ ຫຼ້າຄຳສາຍ ຫົວໜ້າກົມຄຸ້ມຄອງການຮຽນ-ການສອນ ຍັງໄດ້ຍົກໃຫ້ເຫັນສະພາບລວມຂອງກົງຈັກການຈັດຕັ້ງ, ບຸກຄະລາກອນ, ການກໍ່ສ້າງ-ບຳລຸງຄູ, ການປະເມີນການຮຽນ-ການສອນ ແລະການແຂ່ງຂັນຍ້ອນຍໍ ໂດຍການຄັດເລືອກໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ສອນດີ, ສອນເກັ່ງ ປະເພດຕ່າງໆ ເຊິ່ງປະເພດ 1 ມີ 4 ໂຮງຮຽນຄື: ໂຮງຮຽນການເມືອງ ແລະ ການປົກຄອງແຂວງສະຫວັນນະເຂດ, ໂຮງຮຽນການເມືອງ ແລະ ການປົກຄອງແຂວງອຸດົມໄຊ, ໂຮງຮຽນການເມືອງ ແລະ ການປົກຄອງແຂວງຫຼວງພະບາງ ແລະໂຮງຮຽນການເມືອງ ແລະ ການປົກຄອງແຂວງຫົວພັນ; ປະເພດ 2 ມີ 10 ໂຮງຮຽນຄື: ໂຮງຮຽນການເມືອງ ແລະ ການປົກຄອງນະຄອນຫຼວງວຽງຈັນ, ໂຮງຮຽນການເມືອງ ແລະ ການປົກຄອງ ແຂວງບໍລິຄຳໄຊ, ໂຮງຮຽນການເມືອງ ແລະ ການປົກຄອງແຂວງເຊກອງ, ໂຮງຮຽນການເມືອງ ແລະ ການປົກຄອງແຂວງສາລະວັນ, ໂຮງຮຽນການເມືອງ ແລະ ການປົກຄອງແຂວງວຽງຈັນ,ໂຮງຮຽນການເມືອງ ແລະ ການປົກຄອງແຂວງໄຊຍະບູລີ, ໂຮງຮຽນການເມືອງ ແລະ ການປົກຄອງແຂວງບໍ່ແກ້ວ, ໂຮງຮຽນການເມືອງ ແລະ ການປົກຄອງແຂວງຜົ້ງສາລີ, ໂຮງຮຽນການເມືອງ ແລະ ການປົກຄອງແຂວງຫຼວງນ້ຳທາ ແລະ ໂຮງຮຽນການເມືອງ ແລະ ການປົກຄອງແຂວງຊຽງຂວາງ; ປະເພດ 3 ມີ 3 ໂຮງຮຽນຄື: ໂຮງຮຽນການເມືອງ ແລະ ການປົກຄອງແຂວງໄຊສົມບູນ, ໂຮງຮຽນການເມືອງ ແລະ ການປົກຄອງແຂວງອັດຕະປື ແລະໂຮງຮຽນການເມືອງ ແລະ ການປົກຄອງແຂວງຈຳປາສັກ.
ໃນຕອນບ່າຍຂອງວັນດຽວກັນນີ້, ຄະນະພັກ, ຄະນະນຳ ຫົວໜ້າກົມ, ຫົວໜ້າຫ້ອງການ, ຫົວໜ້າຄະນະ, ຫົວໜ້າສູນຂໍ້ມູນຂ່າວສານການເມືອງ ແລະ ການປົກຄອງ, ສູນຄົ້ນຄ້ວາແນວຄິດ ໄກສອນ ພົມວິຫານ ແລະຫົວໜ້າໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ທົ່ວປະເທດໄດ້ປະກອບຄຳເຫັນ ແລະຕັ້ງບັນຫາແລກປ່ຽນແຕ່ລະດ້ານຢ່າງພາວະວິໄສ, ຖອດຖອນໄດ້ບັນຫາທີ່ຍັງຄົງຄ້າງ, ສາເຫດ ແລະບົດຮຽນໃນການນຳພາ-ຊີ້ນຳ ໃນໄລຍະຜ່ານມາເພື່ອຊອກທິດທາງ ແລະວິທີການແກ້ໄຂໃນຕໍ່ໜ້າໃຫ້ສູງຂຶ້ນກວ່າເກົ່າ.
ວາລະກອງປະຊຸມສະຫຼຸບຖອດຖອນບົດຮຽນຜູ້ບໍລິຫານໂຮງຮຽນກາານເມືອງ ແລະ ການປົກຄອງແຂວງ, ນະຄອນ ຫຼວງ ປະຈຳປີ 2024 ແລະທິດທາງແຜນການໃນຕໍ່ໜ້າຈະໄດ້ດຳເນີນໄປເປັນເວລາ 2 ວັນ ໃນລະຫວ່າງ 18-19 ພະຈິກ 2024 ນີ້.
ພາບ-ຂ່າວໂດຍ: ນ. ດອກໄມ້ ຈັນດາລາ
ບັນນາທິການ: ປທ ບຸນປັນ ສຸມຸນທອງ