ໃນວັນທີ19ພະຈິກ 2024 ທີ່ສະໂມສອນ ເມືອງບຸນເໜືອ ແຂວງຜົ້ງສາລີ ສະຖາບັນການເມືອງ ແລະການປົກຄອງແຫ່ງຊາດ ໄດ້ຈັດພິທີປິດກອງປະຊຸມສະຫຼຸບຖອດຖອນບົດຮຽນຜູ້ບໍລິຫານໂຮງຮຽນກາານເມືອງ ແລະການປົກຄອງແຂວງ, ນະຄອນຫຼວງວຽງຈັນ ປະຈຳປີ 2024 ແລະທິດທາງແຜນການໃນຕໍ່ໜ້າສຳເລັດລົງຢ່າງຈົບງາມ; ພາຍໃຕ້ການເປັນປະທານ ໂດຍ: ທ່ານ ຮສ ພູວົງ ອຸ່ນຄຳແສນ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ໂດຍມີບັນດາຄະນະພັກ, ຄະນະນຳ, ຫົວໜ້າກົມ, ຫົວໜ້າຫ້ອງການ, ຫົວໜ້າຄະນະ, ຫົວໜ້າສູນຂໍ້ມູນຂ່າວສານການເມືອງ ແລະການປົກຄອງ, ສູນຄົ້ນຄ້ວາແນວຄິດ ໄກສອນ ພົມວິຫານ ແລະຫົວໜ້າໂຮງຮຽນການເມືອງ ແລະການປົກຄອງແຂວງ, ນະຄອນຫຼວງວຽງຈັນ ທົ່ວປະເທດ ເຂົ້າຮ່ວມຢ່າງພ້ອມພຽງ.
ໃນກອງປະຊຸມຄະນະຜູ້ແທນກອງປະຊຸມສືບຕໍ່ປະກອບຄຳຄິດຄຳເຫັນ, ແລກປ່ຽນບົດຮຽນ ແລະພ້ອມທັງໄດ້ຮັບຟັງການລາຍງານ, ສະຫຼຸບຕີລາຄາການຈັດຕັ້ງປະຕິບັດຫຼັກສູດການຮຽນ-ການສອນ ຂອງບັນດາໂຮງຮຽນການເມືອງການປົກ ຄອງແຂວງ, ນະຄອນຫຼວງວຽງຈັນ ເຊິ່ງມັນໄດ້ສ່ອງແສງໃຫ້ເຫັນຫຼາຍໂຮງຮຽນໄດ້ມີຜົນງານອັນໂດດເດັ່ນ ແລະມີຜົນສຳ ເລັດຫຼາຍໃນດ້ານ ແລະໃນວາລະດຽວກັນນີ້, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ມອບໃບຍ້ອງຍໍໃຫ້ແກ່ ໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງວຽງຈັນ ສອນດີ, ສອນເກັ່ງ ປະເພດຕ່າງໆ ເຊິ່ງປະເພດ 1 ມີ 4 ໂຮງຮຽນຄື: ໂຮງຮຽນການເມືອງ ແລະ ການປົກຄອງແຂວງສະຫວັນນະເຂດ, ໂຮງຮຽນການເມືອງ ແລະ ການປົກຄອງແຂວງອຸດົມໄຊ, ໂຮງຮຽນການເມືອງ ແລະ ການປົກຄອງແຂວງຫຼວງພະບາງ ແລະແຂວງຫົວພັນ; ປະເພດ 2 ມີ 10 ໂຮງຮຽນຄື: ໂຮງຮຽນການເມືອງ ແລະ ການປົກຄອງນະຄອນຫຼວງວຽງຈັນ, ໂຮງຮຽນການເມືອງ ແລະ ການປົກຄອງແຂວງບໍລິຄຳໄຊ, ໂຮງຮຽນການເມືອງ ແລະ ການປົກຄອງແຂວງເຊກອງ, ໂຮງຮຽນການເມືອງ ແລະ ການປົກຄອງແຂວງສາລະວັນໂຮງຮຽນການເມືອງ ແລະ ການປົກຄອງແຂວງວຽງຈັນ, ໂຮງຮຽນການເມືອງ ແລະ ການປົກຄອງແຂວງໄຊຍະບູລີ, ໂຮງ ຮຽນການເມືອງ ແລະ ການປົກຄອງແຂວງບໍ່ແກ້ວ, ໂຮງຮຽນການເມືອງ ແລະ ການປົກຄອງແຂວງຜົ້ງສາລີ, ໂຮງຮຽນການ ເມືອງ ແລະ ການປົກຄອງແຂວງຫຼວງນ້ຳທາ ແລະ ໂຮງຮຽນການເມືອງ ແລະ ການປົກຄອງແຂວງຊຽງຂວາງ; ປະເພດ 3 ມີ 3 ໂຮງຮຽນຄື: ໂຮງຮຽນການເມືອງ ແລະ ການປົກຄອງແຂວງໄຊສົມບູນ, ໂຮງຮຽນການເມືອງ ແລະ ການປົກຄອງແຂວງອັດຕະປື ແລະໂຮງຮຽນການເມືອງ ແລະ ການປົກຄອງແຂວງຈຳປາສັກ.
ແລະໃນຕອນທ້າຍຂອງກອງປະຊຸມ, ທ່ານ ປະທານໄດ້ສະແດງຄວາມຍ້ອງຍໍຊົມເຊີຍ ຕໍ່ກັບຜົນສຳເລັດທີ່ຍາດມາໄດ້ໃນ 1ປີຜ່ານມາ ພ້ອມດຽວກັນນີ້, ເພິ່ນຍັງໄດ້ໃຫ້ຄຳໂອ້ລົມເພື່ອເປັນທິດຊີ້ນຳໃນການຈັດຕັ້ງປະຕິບັດໜ້າທີ່ການເມືອງໃນຕໍ່ໜ້າດັ່ງນີ້:
1). ເພີ່ມທະວີຄວາມເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານສະມາຊິກພັກ, ພະນັກງານ, ຄູ-ອາຈານ ຢ່າງເປັນປົກກະຕິ, ຖືເອົາການຄົ້ນຄວ້າເຊື່ອມຊຶມບັນດາມະຕິ, ຄຳສັ່ງ, ຂໍ້ກຳນົດ, ກົດລະບຽບ ແລະກົດໝາຍຂອງລັດ ເພື່ອຮັບຮູ້ເຂົ້າໃຈໃຫ້ເລິກເຊິ່ງ ສ້າງຄວາມຮູ້ໃຫ້ຄູ-ອາຈານ, ພະນັກງານ ຕ້ອງເປັນເອກະພາບໃນການຈັດຕັ້ງປະຕິບັດໜ້າທີ່ການເມືອງ.
2). ເພີ່ມທະວີຄວາມຮັບຜິດຊອບໃນການນໍາພາ-ຊີ້ນໍາ ຂອງຄະນະພັກ, ຄະນະນຳໂຮງຮຽນທຸກຂັ້ນຢ່າງໃກ້ຊິດຕິດ ແທດ ໃນການຈັດຕັ້ງຄຸ້ມຄອງ-ບໍລິຫານການຮຽນ-ການສອນ, ປະຕິບັດຕາມຫຼັກສູດຢ່າງເຄັ່ງຄັດ, ຖືກຕ້ອງຕາມລະບຽບຫຼັກ ການ, ມີການນຳພາ-ຊີ້ນຳຢ່າງເປັນລະບົບ, ມີການແບ່ງງານ, ສ້າງຄວາມເປັນເອກະພາບ, ຕິດຕາມກວດກາ ແລະປັບປຸງແຜນ ການເຄື່ອນໄຫວແຕ່ລະໄລຍະໃຫ້ສອດຄ່ອງ ແລະທັນກັບສະພາບ.
3). ຖືສໍາຄັນການຍົກລະດັບການນໍາພາ, ສ້າງການຫັນປ່ຽນໃໝ່ທາງດ້ານທິດສະດີ ແລະພຶດຕິກຳໃຫ້ທັນກັບໂລກ, ເອົາໃຈໃສ່ຍົກລະດັບຄະນະນໍາ ແລະຖັນແຖວຄູ-ອາຈານ ຂອງສະຖາບັນໃຫ້ສູງຂຶ້ນກວ່າເກົ່າ, ມີລະດັບທາງດ້ານການຄົ້ນຄວ້າທິດສະດີ ແລະພຶດຕິກໍາໃຫ້ຫຼາຍ, ມີຄວາມສາມາດ ແລະມີຫຼັກໝັ້ນການເມືອງໜັກແໜ້ນ, ຮູ້ເສີມຂະຫຍາຍການຮ່ວມມືກັບຕ່າງປະເທດ, ນັບທັງການຮຽນຮູ້ພາສາຕ່າງປະເທດ ເພື່ອມີຂໍ້ມູນທາງທິດສະດີ ແລະຄວາມຮູ້ໃໝ່ໆທີ່ກ້າວໜ້າຂອງໂລກ.
4). ສ້າງຖັນແຖວຄູ-ອາຈານໃຫ້ມີລະດັບວິຊາການທີ່ສູງ ແລະຫຼາຍກວ່າເກົ່າ, ມີຄຸນວຸດທິເພີ່ມຂຶ້ນຕາມມາດຕະ ຖານຂອງລະບົບການສຶກສາໃຫ້ໄດ້ 3 ລັກສະນະ 5 ຫຼັກມູນການສຶກສາ, ຮັບປະກັນທາງດ້ານຄວາມຮູ້, ດ້ານທັກສະ, ດ້ານການນຳໃຊ້, ດ້ານທັກສະທາງສັງຄົມ ແລະອື່ນໆ.
5). ສະຖາບັນການເມືອງ ແລະ ການປົກຄອງແຫ່ງຊາດ, ໂຮງຮຽນການເມືອງ ແລະ ການປົກຄອງແຂວງ, ນະຄອນ ຫຼວງສ້າງໃຫ້ມີການຫັນປ່ຽນຢ່າງແຂງແຮງ ໃນການຄົ້ນຄວ້າວິທະຍາສາດ ແນໃສ່ສະໜອງຂໍ້ມູນໃຫ້ແກ່ສູນກາງ ແລະທ້ອງ ຖິ່ນມີຄວາມຮັບປະກັນດ້ານເນື້ອໃນ ແລະການປະຕິບັດໜ້າທີ່ການເມືອງໃນແຕ່ລະໄລຍະ.
6). ສືບຕໍ່ຈັດຕັ້ງການຮຽນ-ການສອນ ໃນໂຮງຮຽນການເມືອງ ແລະ ການປົກຄອງ ແຕ່ລະແຂວງ ແລະນະຄອນ ຫຼວງຕາມຫຼັກສູດທີ່ໄດ້ຮັບຮອງນຳກັນ ໃຫ້ມີຜົນສໍາເລັດ ແລະໃຫ້ມີຄຸນະພາບສູງຂຶ້ນ; ໂດຍໃຫ້ເອົາໃຈໃສ່ຂອດທີ່ສໍາຄັນຄື: ຂອດການເລືອກເປົ້າໝາຍ, ກຳໄດ້ເປົ້າໝາຍ, ຈັດຕັ້ງຫ້ອງຮຽນ, ຈັດຕັ້ງການສອນ, ການປະເມີນຜົນ ແລະສິ່ງແວດລ້ອມ ໃຫ້ແກ່ການຮຽນ-ການສອນທຸກຢ່າງມີສາຍພົວພັນເຊິ່ງກັນແລະກັນຢ່າງເລິກເຊິ່ງ.
7). ໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ສືບຕໍ່ປະສານສົມທົບກັບຄະນະປະຈຳພັກແຂວງ, ນະຄອນຫຼວງວຽງຈັນ, ຜູ້ຊີ້ນຳໂຮງຮຽນການເມືອງ ແລະ ການປົກຄອງແຂວງຊຸກຍູ້, ສົ່ງເສີມພັດທະນາໂຮງຮຽນ ໃຫ້ກາຍເປັນໂຮງຮຽນພັດທະນາຕາມມາດຖານເງື່ອນໄຂ ທີ່ສະຖາບັນໄດ້ກໍານົດໄວ້ ແລະສ້າງໃຫ້ໄດ້ໜ່ວຍພັກປອດໃສ, ເຂັ້ມແຂງ ແລະໜັກແໜ້ນ.
ທັງໝົດນັ້ນ, ຮຽກຮ້ອງໃຫ້ຜູ້ບໍລິຫານໂຮງຮຽນກາານເມືອງ ແລະ ການປົກຄອງແຂວງ, ນະຄອນຫຼວງວຽງຈັນ ກໍາໄດ້ ແລະມີການຊີ້ນໍາຢ່າງໃກ້ຊິດ ແລະເປັນເອກະພາບ ພ້ອມກັນນຳເອົາເນື້ອໃນຈິດໃຈ ບົດຮຽນທີ່ດີແລະທິດທາງຕ່າງໆຂອງກອງປະຊຸມຈະໄດ້ຮັບການເຜີຍແຜ່ ແລະວາງແຜນຜັນຂະຫຍາຍໃຫ້ເປັນຮູບປະທຳຫຼາຍຂຶ້ນກວ່າເກົ່າ.
ພາບ-ຂ່າວໂດຍ: ນ. ດອກໄມ້ ຈັນດາລາ
ບັນນາທິການໂດຍ: ປທ. ບຸນປັນ ສຸມູນທອງ