ໃນຕອນເຊົ້າວັນທີ26 ພະຈິກ 2024 ຄະນະບໍລິຫານງານຊາວໜຸ່ມ ສມປຊ ນໍາພາສະມະຊິກຊາວໜຸ່ມຮາກຖານພະນັກງານ, ຄູ-ອາຈານ ແລະນັກສຶກສາທຸກຮຸ່ນທຸກລະບົບ ທົ່ວ ສມປຊ ເຂົ້າຮ່ວມຂະບວນຂະບວນການບໍລິຈາກເລືອດເພື່ອຊ່ວຍເຫຼືອສັງຄົມ, ເຊິ່ງໃຫ້ກຽດນໍາພາຂະບວນໂດຍ: ທ່ານ ປທ ສົມສີ ຈັນທະພົມ ຮອງເລຂາຄະນະບໍລິຫານງານຊາວໜຸ່ມ ແລະທ່ານ ຄໍາໝັ້ນ ພົມມະຈັນ ກໍາມະການຄະນະບໍລິຫານງານຊາວໜຸ່ມ ຂອງສະຖາບັນການເມືອງ ແລະ ການປົກຄອງແຫ້ງຊາດ ເຊິ່ງໃຫ້ກຽດເປັນປະທານໂດຍ: ທ່ານ ປອ ສາຍຄໍາ ມູນມະນີວົງ ຄະນະບໍລິຫານງານພັກ, ຜູ້ຊີ້ນໍາວຽກອົງການຈັດຕັ້ງມະຫາຊົນ ແລະຂະບວນການ ຂອງສະຖາບັນການເມືອງ ແລະ ການປົກຄອງແຫ່ງຊາດ ແລະມີຜູ້ເຂົ້າຮ່ວມບໍລິຈາກເລືອດທັງໝົດ 58 ທ່ານ, ຍິງ 27 ທ່ານ.
ທ່ານ ຄໍາໝັ້ນ ພົມມະຈັນ ກໍາມະການຄະນະບໍລິຫານງານຊາວໜຸ່ມ ໄດ້ຂຶ້ນກ່າວຈຸດປະສົງໃນການບໍລິຈາກເລືອດໃນຄັ້ງນີ້ ກໍ່ເພື່ອຊ່ວຍເຫຼືອສັງຄົມ, ຕອບສະໜອງໃຫ້ແກ່ໂຮງໝໍຕ່າງໆ, ຊ່ວຍເຫຼືອຄົນເຈັບທີ່ຂາດເລືອດ, ຄົນເຈັບທີ່ມີຄວາມຈໍາເປັນຕ້ອງໃຊ້ເລືອດ ເພື່ອກອບກູ້ເອົາຊີວິດ ແລະເປັນວຽກໝຶ່ງທີ່ຕິດພັນກັບທຸກພາກສ່ວນ ຂອງສັງຄົມ ແລະຕ້ອນຮັບວັນຊາດທີ 2 ທັນວາ ຄົບຮອບ 49ປີ ທັງເປັນການຕ້ອນຮັບກອງປະຊຸມໃຫຍ່ ຄັ້ງທີ V ຂອງຄະນະບໍລິ ຫານງານຊາວໜຸ່ມ ສມປຊ.
ໃນພິທີ ຍັງໄດ້ຮັບຟັງການນໍາສະເໜີຄວາມໝາຍ, ຄວາມສໍາຄັນຂອງເລືອດ ແລະການບໍລິຈາກເລືອດ ຈາກທ່ານ ດຣ ນາງ ຈີລະພາ ແກ້ວຄໍາຜຸຍ ຮອງຫົວໜ້າສະຖາບັນເລືອດແຫ່ງຊາດ ເຊິ່ງທ່ານໄດ້ກ່າວວ່າ: ເລືອດເປັນສິ່ງທີ່ຈໍາເປັນ ແລະມີຄວາມໝາຍສໍາຄັນໃນການຮັກສາຜູ້ປ່ວຍ, ຜູ້ເກີດອຸປະຕິເຫດ, ການເກີດລູກ, ພະຍາດປ້າງກິນເລືອດ ແລະມີຄວາມສໍາຄັນຢ່າງຫຼວງຫຼາຍໃນການນໍາໄປຮັກສາຜູ້ປ່ວຍໂຣກຕ່າງໆ ໄດ້ຢ່າງມີປະສິດທິພາບ. ນອກຈາກນັ້ນ, ຍັງໄດ້ຮູ້ຂໍ້ມູນກ່ຽວກັບສຸຂະພາບຂອງຕົນເອງ, ພ້ອມທັງໄດ້ຊ່ວຍເຫຼືອເພື່ອນມະນຸດ ເຮັດໃຫ້ມີຄວາມສຸກ ສົ່ງຜົນໃຫ້ມີສຸຂະພາບຈິດທີ່ດີ.
ໃນພິທີຍັງໄດ້ຮັບຟັງຄໍາໂອລົມຈາກປະທານ ແລະທ່ານໄດ້ເນັ້ນຢໍ້າສໍາລັບຜູ້ທີ່ອາສາສະໜັກເຂົ້າຮ່ວມກໍຂໍໃຫ້ເຂົ້າຮ່ວມຢ່າງພ້ອມພຽງພຽງ ແລະໃຫ້ຄວາມຮ່ວມມືກັບທ່ານໝໍ, ພ້ອມກັນນັ້ນຍັງໄດ້ກ່າວສະແດງຄໍາຂອບໃຈ ມາຍັງາສະມະຊິກຊາວໜຸ່ມຮາກຖານພະນັກງານ, ຄູ-ອາຈານ ຕະຫຼອດຮອດນັກສຶກສາທີ່ເຂົ້າຮ່ວມບໍລິຈາກເລືອດ.
ຂ່າວ-ພາບ: ທິດດາວອນ ດວງປະເສີດ
ບັນນາທິການ: ປທ ບຸນບັນ ສຸມູນທອງ