ໃນຕອນບ່າຍວັນທີ 3ທັນວາ 2024 ທີ່ສະໂມສອນ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີປາຖະກະຖາວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະເດັກນ້ອຍ 25ພະຈິກປະຈໍາປີ 2024 ເຊິ່ງໃຫ້ກຽດເປັນປະທານໂດຍ: ທ່ານ ປອ ສາຍຄໍາ ມູນມະນີວົງ ກໍາມະການພັກ, ຫົວໜ້າຄະນະປັດຊະຍາ, ມີບັນດາພະນັກງານ, ຄູ-ອາຈານ, ນັກສຶກສາປະລິນຍາໂທຮຸ່ນທີ XX ຫ້ອງ ກໍ ແລະຂໍ, ມີຕາງໜ້ານັກສຶກສາທິດສະດີຂັ້ນສູງ 9 ເດືອນຮຸ່ນ ທີ 6 ແລະມີຕາງໜ້ານັກສຶກສາທິດສະດີຂັ້ນກາງຮຸ່ນທີ 3ເຂົ້າຮ່ວມຢ່າງພ້ອມພຽງ ລວມທັງໝົດມີ 266ທ່ານ, ຍິງ 101 ທ່ານ.
ໃນການຈັດພິທີປາຖະກະຖາກໍ່ເພື່ອທົບທວນຄືນ, ລະນຶກເຖິງວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະເດັກນ້ອຍ 25 ພະຈິກປະຈໍາປີ 2024
ໃນພິທີທ່ານ ປອ ສາຍຄໍາ ມູນມະນີວົງ ກໍາມະການພັກ, ຫົວໜ້າຄະນະປັດຊະຍາ ໄດ້ໃຫ້ກຽດເຜີຍແຜ່ເອກະ ສານປະຫວັດຄວາມເປັນມາຂອງວັນສາກົນ ແລະຢຸດຕິຄວາມຮຸນແຮງຕໍ່ແມ່ຍິງໃນວັນທີ 25 ພະຈິກ ແລະຜ່ານສານພານະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ຫົວຂໍ້: ກ້າວສູ່ 30 ປີ ຂອງຖະແຫຼງການ ແລະແຜນປະຕິບັດງານທີ່ປັກກິ່ງ: ຮ່ວມກັນເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະເດັກຍິງ.
ພ້ອມກັນນັ້ນ,ທ່ານ ປອ ນາງ ລໍາພູນ ດວນສຸວັນ ປະທານສະຫະພັນແມ່ຍິງ ສມປຊ, ຫົວໜ້າສູນຄົ້ນຄວ້າແນວຄິດ ໄກສອນ ພົມວິຫານກໍ່ໄດ້ເຜີຍແຜ່ກົດໜາຍວ່າດ້ວຍການຕ້ານ ແລະສະກັດກັ້ນການນໍາໃຊ້ຄວາມຮຸນແຮງຕໍ່ແມ່ຍິງ ແລະເດັກ (ເອກະສານຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ ຂອງກົມໂຄສະນາເຜີຍແຜ່ກົດໜາຍ, ກະຊວງຍຸດຕິທໍາປີ 2021)
ບັນດາເອກະສານທີ່ນຳມາເຜີຍແຜ່ຄັ້ງນີ້ ແມ່ນໄດ້ສ່ອງແສງເຖິງການປຸກລະດົມ ເພື່ອໂຄສະນາຍຸດທະສາດໃນໄລຍະຍາວ, ແຜນງານ ແລະຊັບພະຍາກອນມະນຸດໃນການປ້ອງກັນ ແລະລົບລ້າງຄວາມຮຸນແຮງຕໍ່ແມ່ຍິງ ແລະເດັກ ໂດຍໃຫ້ບູລິມະສິດແກ່ແມ່ຍິງ ແລະເດັກທີ່ດ້ອຍໂອກາດ, ທີ່ສະແດງໃຫ້ເຫັນວ່າຄວາມຮຸນແຮງຕໍ່ແມ່ຍິງ ແລະເດັກຍິງເປັນສິ່ງທີ່ສາມາດປ້ອງກັນໄດ້ດ້ວຍການເຊື່ອມ ເຂົ້າຍຸດທະສາດການສົ່ງເສີມພາວະຄວາມເປັນຜູ້ນຳ ແລະຄວາມກ້າ ຫານຂອງແມ່ຍິງຢ່າງເຕັມສ່ວນເຂົ້າໃນການຕັດສິນບັນຫາ ແລະມີສ່ວນຮ່ວມໃນການສ້າງນະໂຍບາຍຕ່າງໆ ລວມທັງການສ້າງແຮງບັນດານໃຈໃຫ້ທຸກພາກສ່ວນໄດ້ຄົ້ນຄິດວິທີໃນການຈັດຕັ້ງປະຕິບັດການປ້ອງກັນ ແລະລົບລ້າງຄວາມຮຸນແຮງຕໍ່ແມ່ຍິງ ແລະເດັກນ້ອຍ.
ໃນຕອນທ້າຍພິທີ ທ່ານ ປະທານ ກໍ່ໄດ້ສະແດງຄໍາຂອບໃຈມາຍັງພະນັກງານ, ຄູ-ອາຈານ ແລະນັກສຶກສາທີ່ເຂົ້າຮ່ວມຮັບຟັງຢ່າງພ້ອມພຽງ ພ້ອມຍັງໄດ້ເໜັ້ນຢໍ້າໃຫ້ນໍາເອົາເອກະສານ ທີ່ໄດ້ເຊື່ອມຊືມໃນມື້ນີ້ໄປຄົ້ນຄວ້າສຶກສາ ແລະເຊື່ອມຊຶມດ້ວຍຕົນເອງຕື່ມ.
ພາບ-ຂ່າວ: ນາງ ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ